Awan pay ti tao a nakakita iti Dios. (Exodo 33:20; Juan 1:​18; 1 Juan 4:​12) Kuna ti Biblia a ti ‘Dios ket maysa nga Espiritu,’ maysa a kita ti biag a di makita ti tao.—Juan 4:24; 1 Timoteo 1:17.

 Ngem dagiti anghel makitada ti Dios gapu ta espirituda. (Mateo 18:10) Kasta met, adda dagiti tattao a mapagungar idiay langit kas espiritu ken makitadanton ti Dios.​—Filipos 3:​20, 21; 1 Juan 3:2.

 Masansan nga usaren ti Biblia ti sao a makita iti piguratibo a pamay-an a kayatna a sawen nalawlawagan. (Isaias 6:​10; Jeremias 5:​21; Juan 9:​39-​41) Iti daytoy nga anag, ti tao makitana ita ti Dios kadagiti “mata ti puso[na]” no maaddaan iti pammati tapno maam-ammona ti Dios ken ipategna dagiti galadna. (Efeso 1:​18) Ibaga ti Biblia no ania dagiti aramiden tapno maaddaan iti kasta a pammati.

•   Ammuem dagiti galad ti Dios, kas iti ayat ken kinaparaburna, kasta met ti sirib ken pannakabalinna, babaen kadagiti pinarsuana. (Roma 1:​20) Idi naipalagip ken matalek a Job dagiti pinarsua ti Dios, kasla nakitana a mismo ti Dios.—Job 42:5.

•   Ammuem ti maipapan iti Dios babaen ti panagadal iti Biblia. Ipasigurado ti Biblia a “no birokem [ti Dios], ipalubosnanto nga isu masarakam.”​—1 Cronicas 28:9; Salmo 119:2; Juan 17:3.

•   Ammuem ti maipapan iti Dios babaen iti biag ni Jesus. Gapu ta naan-anay nga imparangarang ni Jesus ti personalidad ti amana a ni Jehova a Dios, umiso a maikunana: “Ti nakakita kaniak nakitana met ti Ama.”—Juan 14:9.

•   Agbiag iti wagas a makaay-ayo iti Dios, ken kitaem no kasanonaka a tulongan. Kinuna ni Jesus: “Naragsak dagiti nasin-aw ti pusoda, yantangay makitadanto ti Dios.” Kas nadakamaten, mapagungarto idiay langit ti dadduma a nagbiag iti wagas a makaay-ayo iti Dios ket “makitadanto ti Dios” sadiay.—Mateo 5:8; Salmo 11:7.

 Kadagiti salaysay a kasla ibaga ti Biblia a nakita dagiti tattao ti Dios, ipakita ti kontekstona nga inusar ti Dios ti maysa nga anghel a mangirepresentar kenkuana wenno nagpakita babaen iti sirmata.

 Dagiti anghel.

Idi un-unana, imbaon ti Dios dagiti anghel kas pannakabagina tapno agparang kadagiti tattao ken ibagada ti maipapan kenkuana. (Salmo 103:20) Kas pagarigan, idi nakisarita ti Dios ken Moises manipud iti sumsumged a bassit a kayo, kuna ti Biblia nga “inlinged ni Moises ti rupana, gapu ta mabuteng idi a kumita iti pudno a Dios.” (Exodo 3:4, 6) Ngem saan a literal a nakita ni Moises ti rupa ti Dios, ta ipakita ti konteksto nga “anghel ni Jehova” ti talaga a nakitana.​—Exodo 3:2.

 Maitunos iti dayta, idi kinuna ti Biblia a ti Dios ket “nakisao ken Moises a rupanrupa,” kayatna a sawen a nasinged ti pannakisarita ti Dios ken Moises. (Exodo 4:​10, 11; 33:11) Saan nga aktual a nakita ni Moises ti rupa ti Dios, ta ti mensahe nga inawatna iti Dios ket “nayallatiw dayta baeten kadagiti anghel.” (Galacia 3:19; Aramid 7:53) Ngem nabileg latta ti pammati ni Moises iti Dios, ta inladawan ti Biblia a kasla “kitkitaenna daydiay Maysa a di makita.”—Hebreo 11:27.

 Kas iti pannakisaritana ken Moises, nakisarita met ti Dios ken Abraham babaen iti anghel. No agbasbasaka iti Biblia, mabalin a panunotem a literal a nakita ni Abraham ti Dios. (Genesis 18:​1, 33) Ngem ipakita ti konteksto a ti “tallo a lallaki” a simmarungkar ken Abraham ket anghel nga imbaon ti Dios. Nabigbig ida ni Abraham kas pannakabagi ti Dios ken nakisarita kadakuada a kasla ni Jehova ti kasarsaritana.​—Genesis 18:​2, 3, 22, 32; 19:1.

 Dagiti sirmata.

Nagparang met ti Dios kadagiti tattao babaen iti sirmata, wenno ladawan a mapampanunot ti tao. Kas pagarigan, idi kuna ti Biblia a ni Moises ken ti dadduma nga Israelita “nakitada ti Dios ti Israel,” talaga a “nasirmatada ti pudno a Dios.” (Exodo 24:9-11) Adda met dagiti gundaway a kuna ti Biblia a nakita dagiti propeta ni Jehova. (Isaias 6:1; Daniel 7:9; Amos 9:1) Ngem ipakita dagiti konteksto a babaen iti sirmata a nakitada ti Dios, saan ket a literal a nakitada ti Dios.​—Isaias 1:1; Daniel 7:2; Amos 1:1.