Ni Cain, nga inauna nga anak ti umuna a pagassawaan, innalana kas asawa ti maysa kadagiti adingna a babai wenno ti asideg a kabagianna. Kasta ti agbalin a konklusiontayo no usigentayo ti ibagbaga ti Biblia maipapan ken Cain ken iti pamiliana.

Kinapudno maipapan ken Cain ken iti pamiliana

•   Naggapu ti amin a tao kada Adan ken Eva. “Manipud iti maysa a tao [ni Adan] inaramid [ti Dios] ti tunggal nasion dagiti tattao, tapno agnaedda iti intero a rabaw ti daga.” (Aramid 17:26) Ti asawa ni Adan a ni Eva ti nagbalin nga “ina ti isuamin a sibibiag.” (Genesis 3:​20) Gapuna, sigurado a ti nagbalin nga asawa ni Cain ket naggapu met laeng kada Adan ken Eva.

•   Ni Cain ken ti kabsatna a ni Abel ti immuna iti adu nga annak ni Eva. (Genesis 4:​1, 2) Idi napagtalaw ni Cain gapu iti panangpatayna iti kabsatna, inreklamona: “Sigurado nga asinoman a makasarak kaniak papatayennakto.” (Genesis 4:​14) Asino ti pagbutbutngan ni Cain? Kuna ti Biblia a ni Adan ket “nagbalin nga ama ti annak a lallaki ken babbai.” (Genesis 5:4) Nabatad a dagitoy a kaputotan da Adan ken Eva ti posible a nagbalin a pangta iti biag ni Cain.

•   Idi un-unana, normal laeng ti makiasawa iti kabagian. Kas pagarigan, inasawa ti matalek a ni Abraham ti kabsatna iti ama. (Genesis 20:12) Damo a nagparang ti pannakaiparit ti kasta a panagasawa iti Mosaiko a Linteg, a naipaulog ginasut a tawen kalpasan ti panagbiag ni Cain. (Levitico 18:​9, 12, 13) Agparang a basbassit ti posibilidad nga adda depekto dagiti annak dagiti agassawa idi nga asideg nga agkabagian no ikompara ita.

•   Umiso ti salaysay ti Biblia maipapan kada Adan, Eva, ken ti pamiliada. Ti detalyado a linia ti kapuonan manipud ken Adan ket saan laeng a masarakan iti libro ti Genesis, nga insurat ni Moises. Insurat met dayta dagiti historiador a da Esdras ken Lucas. (Genesis 5:​3-5; 1 Cronicas 1:​1-4; Lucas 3:​38) Dinakamat dagiti mannurat ti Biblia ti salaysay maipapan ken Cain kas pudpudno a pasamak.​—Hebreo 11:4; 1 Juan 3:​12; Judas 11.