Wen, pakawanennaka ti Dios no surotem dagiti addang a naibatay iti Biblia. Kuna ti Biblia a ti Dios ket “sisasagana a mamakawan” ken ‘dakkel ti pammakawanna.’ (Nehemias 9:​17; Salmo 86:5; Isaias 55:7) No mamakawan, siento porsiento ti panangpakawanna kadatayo. “Mapunas,” wenno mabura dagiti basoltayo. (Aramid 3:19) Permanente met ti panangpakawan ti Dios ta kunana: “Ti basolda saankonton a lagipen.” (Jeremias 31:34) No pinakawannatayon ti Dios, saannanton nga ungkaten dagiti basoltayo tapno akusaran wenno maulit-ulit a dusaennatayo.

 Ngem mamakawan ti Dios saan a gapu ta nakapuy wenno naisurot laeng iti emosionna. Saanna a pulos baliwan ti nalinteg nga estandartena. Dayta ti rason nga adda dagiti basol a saanna a pakawanen.—Josue 24:19, 20.

Addang tapno pakawanennaka ti Dios

1.   Aminem a ti basolmo ket maysa a panagsukir iti estandarte ti Dios. Uray no mabalin a nasaktan ti dadduma gapu iti naaramidmo, masapul a bigbigem nga umuna a gapu ta nagbasolka, nasaktam met ti Dios.—Salmo 51:1, 4; Aramid 24:16.

2.   Ipudnom ti basolmo iti Dios babaen iti kararag.—Salmo 32:5; 1 Juan 1:9.

3.   Pagladingitam ti basolmo. Daytoy a “kinaliday iti nadiosan a pamay-an” ti mangtignay kenka nga agbabawi, wenno naimpusuan nga agbalbaliw. (2 Corinto 7:10) Karaman iti dayta ti panagbabawi gapu kadagiti di umiso nga addang a naaramidam a nangiturong kenka nga agbasol.—Mateo 5:27, 28.

4.   ‘Agbaw-ingka,’ kayatna a sawen, agbalbaliwka. (Aramid 3:19) Mabalin a kaipapanan dayta a masapul a dimon ul-uliten ti maysa a kamali wenno di umiso nga aramid, wenno mabalin a kaipapanan dayta a baka masapul a balbaliwam nga interamente ti panagpampanunot ken panagtigtignaymo.—Efeso 4:23, 24.

5.   Mangaramidka kadagiti addang tapno mailinteg ti kamalim wenno tapno matarimaan ti aniaman a naperdi a relasion wenno banag. (Mateo 5:23, 24; 2 Corinto 7:11) Agpadispensarka kadagiti naapektaran iti inaramidmo, ken ikarigatam nga isubli ti aniaman a napukaw wenno naperdi.—Lucas 19:7-10.

6.   Babaen iti kararag, dumawatka iti pammakawan iti Dios maibatay iti subbot ni Jesus. (Efeso 1:7) Tapno masungbatan ti kararagmo, masapul a pakawanem dagiti nakabasol kenka.—Mateo 6:14, 15.

7.   No nadagsen ti basolmo, makisaritaka iti maysa a kualipikado a mangted iti naespirituan a tulong a kasapulam ken mangikararag para kenka.—Santiago 5:14-16.

Kamali a kapanunotan maipapan iti panangpakawan ti Dios

 “No agkompesarak iti maysa a padi wenno ministro, maabsuelton ti basolko.”

 Awan ti tao ita nga autorisado a mangpakawan iti basol ti padana a tao iti Dios. Agpayso a makatulong no ipudnom iti sabali a tao ti basolmo tapno mailintegmo ti naaramidam, ngem ti laeng Dios ti mabalin a mangpakawan kadagiti basol.—Efeso 4:32; 1 Juan 1:7, 9.

 No kasta, ania ngarud ti kayat a sawen ni Jesus idi kinunana kadagiti apostol: “No pakawanenyo ti basbasol ti asinoman a tattao, napakawandan kadakuada; no pagtalinaedenyo ti basbasol ti asinoman a tattao, mapagtalinaedda”? (Juan 20:23) Ibagbagana laeng idi ti espesial nga autoridad nga itedna kadagiti apostol no maawatdan ti nasantuan nga espiritu.—Juan 20:22.

 Kas naikari, naawat dagiti apostol dayta a sagut wenno autoridad idi naibukbok kadakuada ti nasantuan nga espiritu idi 33 C.E. (Aramid 2:1-4) Inusar ni apostol Pedro dayta nga autoridad idi inukomna dagiti adalan a da Ananias ken Safira. Simimilagro a naammuan ni Pedro ti planoda a panangluko, ket dagiti nadagsen a sasao nga imbagana kadakuada ipakitana a saan a mapakawan dagiti basolda.—Aramid 5:1-11.

 Kas iti dadduma a milagro a panangpaimbag ken panagsao iti sabali a lengguahe, dayta a milagro a sagut ti nasantuan nga espiritu ket nagpatingga idi natayen dagiti apostol. (1 Corinto 13:8-10) Dayta ti gapuna nga awan ti tao ita a mabalin a mangabsuelto iti sabali a tao iti basolna.