“Makadadaelen ti klima. Dandani saanen a mabalin a pagbiagan ti daga.”—The Guardian.

 Maipaspasango dagiti tattao iti problema nga isuda met laeng ti makin-aramid. Mamati ti kaaduan a sientista a dagiti aktibidad ti tattao ti makagapu iti panagbara ti planetatayo a daga (global warming). Daytoy nga ibabara ti temperatura binalbaliwannan ti klima ket makadadael ti resultana, a pakairamanan dagitoy:

•   Masansan ken nakaro a pudot, tikag, ken bagyo, nga agresulta iti ad-adu a panaglayus ken puor ti kabakiran.

•   Pannakarunaw dagiti dadakkel a yelo iti daga ken baybay.

•   Panagadalem ti baybay.

 Apektado ti amin a suli ti daga kadagiti problema iti klima. Kalpasan nga inammo ti New York Times ti situasion ti 193 a pagilian, inreportda: “Agpatpatulongen ti planetatayo.” Gapu iti ipapatay ken panagrigat a resulta ti panagbaliw ti klima (climate change), inawagan dayta ti World Health Organization iti “kadelikaduan iti salun-at ti tao.”

 Ngem adda padpadaanantayo a nagsayaat a masakbayan. Impakpakauna ti Biblia dagiti mapaspasamak ita, ken no apay nga ekspektarentayo a solbaren ti Dios dagita ken no ania ti aramidenna tapno maaddaantayo iti nasayaat a masanguanan.

 Wen. Dagiti problema iti klima gapu iti panagbara ti daga ket kapada dagiti naipadto iti Biblia a mapasamak iti panawentayo.

 Padto: “Iti maudi nga al-aldaw, dumtengto dagiti delikado ken narigat a tiempo ta ay-ayatento laeng dagiti tattao ti bagbagida, managayat iti kuarta, . . . saan a matalek, . . . saanda a kayat ti makitulag, . . . traidor, natangken ti uloda.”—2 Timoteo 3:1-4.

 Impakpakauna ti Biblia dagiti ugali ken kababalin a makagapu kadagiti problema iti klima. Iyun-una dagiti gobierno ken dagiti negosiante ti kuarta imbes a ti pagsayaatan dagiti sumaruno a henerasion. Uray no ikagkagumaanda ti agtitinnulong, saanda nga agkaykaysa no ania ti aramidenda tapno mapasardeng ti panagbara ti daga.

 Ipakita dayta a padto a saantayo nga ekspektaren a balbaliwan dagiti tattao ti ugalida ket protektaranda ti daga. Imbes ketdi, ibaga ti Biblia nga “ad-addanto pay a dumakes” dagiti naagum a tattao.—2 Timoteo 3:13.

 Ipakita ti Biblia nga ipatpateg unay ni Jehova a a Dios, ti Namarsua kadatayo, ti planetatayo ken dagiti aggigian iti dayta. Kitaentayo ti tallo a bersikulo ti Biblia a mangipakita nga addanto aramiden ti Dios.

1.  1. “[Ti Dios] saanna a pinarsua ti daga nga awan serserbina, no di ket pinormana a pagnaedan.”—Isaias 45:18.

    Aramidento ti Dios ti panggepna para iti daga. (Isaias 55:11) Saanna nga ipalubos a madadael wenno saan a mapagyanan.

2.  2. “Dagiti naemma kukuadanto ti daga, ken maragragsakandanto unay iti naruay a talna. Dagiti nalinteg kukuadanto ti daga, ket agyandanto iti dayta iti agnanayon.”—Salmo 37:11, 29.

    Inkari ti Dios nga agbiagto nga agnanayon ti tao ditoy daga iti natalna a kasasaad.

3.  3. “Maikkatto dagiti dakes ditoy daga.”—Proverbio 2:22.

    Inkari ti Dios a pukawenna dagidiay agtultuloy nga agar-aramid iti kinadakes ken dagidiay mangdaddadael iti daga.

 Kasano a tungpalen ti Dios dagiti karina para iti daga? Usarenna ti maysa a gobierno a mangituray iti intero a lubong, a maawagan iti Pagarian ti Dios. (Mateo 6:10) Agturay dayta a Pagarian manipud langit. Saanna a kasapulan ti suporta dagiti gobierno ti tao kadagiti problema maipapan iti daga ken iti aglawlawna. Imbes ketdi, suktan ti Pagarian ti Dios dagiti gobierno ti tao.—Daniel 2:44.

 Aramidento ti Pagarian ti Dios ti pagsayaatan ti amin a tao ken ti aglawlaw. (Salmo 96:10-13) Kitaentayo no ania ti aramiden ni Jehova a Dios babaen ti Pagarianna.

•   Tarimaanennanto ti aglawlaw

   Ti kuna ti Biblia: “Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.

   No ania ti maaramidanna para iti masakbayantayo: Paimbagento ni Jehova ti planetatayo—tarimaanenna uray dagiti lugar a nakaro a dinadael dagiti tattao.

•   Kontrolenna ti abnormal a paniempo

   Ti kuna ti Biblia: “Pinagkalma [ni Jehova] ti nakapigpigsa nga angin; ket nagtalna dagiti dalluyon ti baybay.”—Salmo 107:29.

   No ania ti maaramidanna para iti masakbayantayo: Adda pannakabalin ni Jehova a mangkontrol kadagiti bambanag wenno elemento. Saanton nga agrigat dagiti tattao gapu kadagiti abnormal a paniempo.

•   Suruanna dagiti tattao a mangaywan a naimbag iti daga

   Ti kuna ti Biblia: “Ikkankanto iti pannakaawat ket isuroka iti dalan a rebbeng a papanam.”—Salmo 32:8.

   No ania ti maaramidanna para iti masakbayantayo: Inikkan ni Jehova dagiti tattao iti responsabilidad a mangaywan iti daga. (Genesis 1:28; 2:15) Isurona no kasanotayo nga aywanan a naimbag dagiti parsuana, ken agbiag a saan a mangdadael iti aglawlaw.