Ania ti maimadyinmo iti tao a madandanagan? a Baka mapanunotmo a maab-abak iti buteng, kasla saanna a kaya ti bumangon iti bigat, wenno puro problema ti ibagbagana.

 Kasta ti mapaspasamak iti dadduma no madandanaganda. Ngem nakita dagiti researcher a sabali ti reaksion ti dadduma—nangruna kadagiti lallaki. Kuna ti maysa a report a “kaykayat [dagiti lallaki] ti aginum ken agdroga no adda problemada, isu a no kanayon nga aginum ti maysa, baka adda nakaro a pagdandanaganna. Ken kaaduanna a naunget ken iritable dagiti problemado a lallaki.”

 Siempre, saan met nga agpapada ti reaksion ti amin a lallaki. Ngem aniaman ti reaksion ti maysa, ti panagdanag ket kumarkaro a problema kadagitoy “delikado ken narigat a tiempo.” (2 Timoteo 3:1) No madandanaganka, makatulong kadi kenka ti Biblia?

 Nakaad-adu dagiti mapagtalkan a pammagbaga ti Biblia a makatulong kadatayo no madandanagantayo. Kitaem ti tallo a pagarigan.

1.  1. “Diyo pakadanagan ti problema iti sumaganad nga aldaw, ta adda bukod a problema ti tunggal aldaw. Ti laeng problema ita nga aldaw ti panunotenyo.”—Mateo 6:34.

    Kaipapananna: Nasaysayaat no saantayo a sobra a pagdanagan dagiti mabalin a mapasamak (wenno baka saanto met laeng a mapasamak) iti masanguanan. Kaaduanna a saanto met laeng a mapasamak dagiti pagbutbutngantayo a kas iti pampanunotentayo. No dadduma, saantayo nga ekspektaren a sumayaat pay ketdi ti bambanag.

    Padasem: Lagipem dagiti tiempo a siguradom idi a madi ti mapasamak—ngem saan a napasamak. Sa timbangem dagiti pagdandanagam ita. Agbalinka koma a realistiko tapno makitam no dagita ket kumaronto a problema.

2.  2. “No kasano a ti landok patademenna ti landok, patademen met ti maysa a tao ti gayyemna.”—Proverbio 27:17.

    Kaipapananna: Matulongandatayo ti dadduma tapno kayatayo a sanguen dagiti pakadanagantayo—no palubosantayo ida. Baka adda dagiti makatulong a suhestionda maibatay iti kapadasanda. Baka matulongandatayo a mangkita iti sabali nga anggulo ti situasiontayo a saantayo idi a napanunot.

    Padasem: Mangpanunotka no asino ti mabalin a makaited iti nasayaat a pammagbaga, kas iti maysa a gayyem a naipasango iti kas iti problemam. Damagem no ania ti nakatulong wenno saan a nakatulong kenkuana.

3.  3. “Ipalladawyo kenkuana ti amin a pakadanaganyo [wenno “pakaseknanyo,” footnote], ta ipatpategnakayo.”—1 Pedro 5:7.

    Kaipapananna: Talaga a kayat ti Dios a tulongan dagiti agrigrigat. Aw-awisennatayo nga ikararagtayo kenkuana ti aniaman a pakadandanagantayo.

    Padasem: Ilistam dagiti pagdandanagam, sa ikararagmo dagita iti Dios. Saggaysaem nga ibaga dagiti problemam, ken agpatulongka a mangsango kadagita.

 Saan laeng a mangted ti Biblia kadagiti pammagbaga no kasano a sanguen dagiti pakadanagan. Ikarkarina pay nga asidegen ti tiempo nga awanton a pulos dagiti pagdanagantayo. Kasano a mapasamak dayta?

 Ikkatento ti Pagarian ti Dios dagiti makagapu kadagiti pagdandanagantayo. (Apocalipsis 21:4) Kinapudnona, inton agturay dayta a Pagarian, saantayton a masaktan uray malagiptayo dagiti pakadanagan ken stress-tayo idi.—Isaias 65:17.

 Dayta a masakbayan ti kayat “ti Dios a mangted iti talna” para kenka. (Roma 16:20) Ikarkarina kadatayo: “Sigurado nga ammok ti pampanunotek para kadakayo, . . . ikkankayo iti talna, saan a didigra, tapno maaddaankayo iti nasayaat a masakbayan ken namnama.”—Jeremias 29:11.