Marigrigatanka kadi iti pinansial gapu ta bimmaba ti ekonomia iti lugaryo ket bimmassit ti mabirbirokam a kuarta? Bigla a bumaba ti ekonomia no adda dagiti pandemic, kalamidad, gubat, ken nagulo a politika. Makapa-stress no bigla nga awanen ti masapulam a kuarta, ngem ania dagiti balakad iti Biblia a makatulong kenka a mangyan-anay iti bassit a kuarta?

 Prinsipio ti Biblia: “Nasursurok ti sekreto ti panagbalin a kontento . . . aduanak man wenno agkurkurang ti kasapulak.”—Filipos 4:12.

 Masursurom ti ag-adjust uray basbassiten ti masapulam a kuarta. No iti damo pay laeng ket awatemon a nagbaliwen ti situasionmo ken rugiamon ti ag-adjust, mas makatulong dayta kenka ken iti pamiliam.

 Kitaem no adda dagiti tulong a mabalin a maawatmo manipud iti gobierno ken iti dadduma pay nga organisasion. Asikasuem a dagus, ngamin, masansan nga ababa laeng a tiempo ti panagaplay para kadagita a programa.

 Prinsipio ti Biblia: “Mapaay dagiti plano no awan ti panagsasarita, ngem adda maitungpal no adu ti mamalbalakad.”—Proverbio 15:22.

 Pagtungtonganyo nga agassawa ken dagiti annakyo ti situasionyo. Makatulong dayta iti tunggal miembro iti pamilia tapno maawatan ken suportaranda dagiti aramidenyo a panagbalbaliw. No agtitinnulongkayo nga agin-inut ken saan unay nga aggasto, ad-adu ti pakausaran ti kuartayo.

 Prinsipio ti Biblia: ‘Agtugaw ken kuentaen ti magastos.’—Lucas 14:28.

 No marigrigatanka iti pinansial, mas importante itan nga ammuem ti amin a pangigastuam iti kuartam. Agbadyetka depende iti baro a situasionyo. Ilistam nga umuna no mano ti mabirokam a kuarta iti kada bulan sa ilistam dagiti binulan a babayadanyo ken ti dadduma pay a pangigasgastuanyo iti kuarta, uray no ammom a mabaliwan met laeng dagita. Mangilasinka met iti kuarta para kadagiti saan a ninamnama a paggastuan wenno emerhensia.

 Tip: No imonitormo dagiti paggastuam, dimo liplipatan nga iraman dagiti babassit a paggastuan. Baka makigtotka a dakkel gayam ti magasgastosmo para kadagita. Kas pagarigan, idi kinuenta ti maysa a lalaki no mano ti magasgastosna iti tinawen para iti bubble gum, ginasut a doliar gayam!

 Prinsipio ti Biblia: ‘Siguraduenyo dagiti napatpateg a bambanag.’—Filipos 1:10.

 Pagkomparaem ti mabirokam a kuarta ken dagiti paggastuam. Kitaem met no ania dagiti mabalinmo nga ikkaten wenno kissayan tapno mayan-anaymo ti bassit a kuartam, kas koma kadagitoy:

•   Transportasion. No saan laeng a maymaysa ti luganmo, mabalinmo kadi nga ilako ti maysa? No adda luxury car-mo, baka kayatmo a suktan iti nalaklaka a modelo? Mabalin kadi nga agluganka lattan iti pangpubliko a transportasion wenno agbisikleta tapno saanen a kasapulan nga adda bukodmo a lugan?

•   Dagiti us-usarem nga agrelaks. Mabalin kadi nga i-cancel-mo pay laeng dagiti in-subscribe-mo nga streaming, satellite, wenno cable iti TV? Adda kadi sabali a nalaklaka? Kas pagarigan, baka libre nga agipabulod ti libraria iti lugaryo kadagiti pelikula, elektroniko a libro, ken audiobook.

•   Dagiti babayadan iti balay. Pagsasaritaanyo a sangapamiliaan no kasanokayo a makainut iti danum, koriente, ken gas. Kasla bassit a banag laeng ti panangiddep iti silaw ken saan a napaut a panagdigus, ngem dakkel ti mainutmo a kuarta no aramidem dagita.

•   Makan. Imbes a manganka kadagiti restawran, aglutoka laengen iti balayyo. Planuem no ania dagiti kanenyo, ken no posible, iyad-adum ti gumatang iti lutuem ken aglutoka iti adu sa ipapudotmo dagiti mabati. Ilistam dagiti gatangem tapno saanmo a magatang dagiti dimo met kasapulan. Gumatangka kadagiti prutas ken nateng no kaaduna ta nalaklaka. Liklikam ti gumatang kadagiti junk food. Nasayaat met no agmulaka kadagiti nateng.

•   Bado. Gumatangka laeng iti badom no saanen a mabalin dagiti isusuotmo. Saanka a makiuso. Gumatangka kadagiti bado a naka-sale wenno dagiti magatang kadagiti secondhand store a nasayaat pay met. No mayat ti panawen ken ipalubos ti kasasaadmo, ibilagmo dagiti badom imbes nga i-dryer-mo tapno makainutka iti koriente.

•   Dagiti gatangemto pay laeng. Sakbay a gumatangka iti maysa a banag, isaludsodmo: ‘Kaya kadi ti badyetko? Kasapulak kadi?’ Mabalin kadi a saanka pay laeng nga ag-upgrade wenno agsukat kadagiti appliance, gadyet, wenno lugan? Adda kadi dagiti gamit a saanmon a maus-usar wenno saanmon a kasapulan a mabalinmo nga ilako? No aramidem dagita bumassit ti paggastuam ken isu pay a mainayon a kuartam.

 Tip: No bigla a bimmassit ti income-mo, addan rasonmo a mangisardeng kadagiti makadadael iti salun-at ken kadagiti nagastos a bisio, kas iti panagsigarilio, panagsugal, wenno panaginum iti arak. No isardengmo dagita saanka laeng a makainut iti kuarta, sumayaat pay ti biagmo.

 Prinsipio ti Biblia: “Naragsak dagiti sipapanunot iti naespirituan a kasapulanda.”—Mateo 5:3.

 Nagsayaat daytoy a balakad ti Biblia: “Ti sirib ket proteksion no kasano a ti kuarta ket proteksion, ngem daytoy ti pagsayaatan ti pannakaammo: Ti sirib taginayonenna ti biag daydiay addaan iti dayta.” (Eclesiastes 7:12) Makatulong ti Biblia tapno agbalinka a masirib. Napaneknekan ti adu a tattao nga idi inaramidda dagiti balakad ti Biblia, saanen a sobra ti panagdanagda maipapan iti kuarta.—Mateo 6:31, 32.