Ania ti makunam iti Disiembre 21, 2012, ti petsa iti kalendario dagiti Maya nga ibagbaga ti adu a mangyeg iti sangalubongan a panagbalbaliw? Depende dayta iti namnamaem. Mabalin a mabang-aran, maupay, wenno saanka nga interesado. Sabali laeng kadi manen dayta a di umiso a prediksion maipapan iti panungpalan ti lubong?

Komusta met ngay ti dinakamat ti Biblia a “panungpalan ti lubong”? (Mateo 24:3, King James Version) Maamak ti dadduma a mapuoranto ti daga. Magagaran met ti dadduma a makakita iti panagbalbaliw a mapasamak iti panungpalan ti lubong, idinto ta nauman ti dadduma a makangkangngeg nga asidegen ti panungpalan. Ngem reaksion laeng kadi dagita maipapan kadagiti sarsarita imbes nga iti agpayso a mapasamak?

Mabalin a masdaawka a makaammo no ania a talaga ti ibagbaga ti Biblia maipapan iti panungpalan ti lubong. Saan laeng nga ibaga ti Biblia dagiti rason no apay a seggaantayo ti panungpalan no di ket ibagana pay a maupay ti dadduma no mabayag pay a dumteng dayta. Ammuem ti sungbat ti Biblia kadagiti gagangay a saludsod maipapan iti panungpalan ti lubong.

TI SUNGBAT TI BIBLIA: “[Ti Dios] imbangonna ti daga kadagiti naipasdek a dissona; saanto a mapagdiwengdiweng dayta agingga iti tiempo a di nakedngan, wenno iti agnanayon.”—SALMO 104:5.

Saan a madadael ti daga babaen iti apuy wenno iti dadduma a pamay-an. Imbes ketdi, isursuro ti Biblia a daytoy a planeta ket agnanayon a pagnaedan ti tao. Kuna ti Salmo 37:29: “Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 115:16; Isaias 45:18.

Kinuna ti Dios a “nasayaat unay” ti daga kalpasan a pinarsuana dayta ket agingga ita, kasta pay laeng ti panangmatmatna. (Genesis 1:31) Imbes a dadaelenna, inkarina ketdi a ‘dadaelen dagidiay mangdaddadael iti daga,’ ken saanna nga ipalubos a naan-anay a madadael ti daga.—Apocalipsis 11:18.

Ngem mabalin a malagipmo ti kuna ti Biblia iti 2 Pedro 3:7, “ti langlangit ken ti daga nga adda ita maipaay iti apuy.” Saan kadi nga ipakita dayta a mauram ti daga? Kinapudnona, no dadduma usaren ti Biblia dagiti termino a “langlangit,” “daga,” ken “apuy” iti piguratibo a pamay-an. Kas pagarigan, kuna ti Genesis 11:1: “Ti intero a daga nagtultuloy nga addaan maymaysa a pagsasao.” Ti “daga” ditoy ket tumukoy iti kagimongan ti tao.

Ipakita ti konteksto iti 2 Pedro 3:7 a ti nadakamat a langlangit, daga, ken apuy ket simboliko met. Kunaen ti bersikulo 5 ken 6 nga adda pagpadaan dayta iti napasamak a Layus idi kaaldawan ni Noe. Nadadael idi ti nagkauna a lubong ngem saan a napukaw ti planetatayo. Imbes ketdi, pinukaw ti Layus ti naranggas a kagimongan ti tao, wenno “daga.” Dinadaelna met ti “langlangit”—dagiti tattao a mangiturturay iti dayta a kagimongan. (Genesis 6:11) Kasta met, ipadto ti 2 Pedro 3:7 ti agnanayon a pannakadadael ti dakes a kagimongan ken dakes a gobierno babaen iti apuy.

TI SUNGBAT TI BIBLIA: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 JUAN 2:17.

“Ti lubong” nga aglabas ket saan a ti daga, no di ket ti kagimongan ti tao a saan nga agbibiag a maitunos iti pagayatan ti Dios. No kasano nga ikkaten ti doktor ti tumor tapno maispal ti biag ti pasiente, ikkaten met ti Dios ti dakes tapno sagrapen dagiti  naimbag a tattao ti naragsak a biag ditoy daga. (Salmo 37:9) No kasta, agpaay a pagimbagan ti tao “ti panungpalan ti lubong.”

Ipasimudaag dagiti patarus ti Biblia ti kasta a positibo a panangmatmat iti “panungpalan ti lubong” ta inusarda ti sasao a “ti panagpatingga ti sistema ti bambanag,” wenno “ti panungpalan ti panawen.” (Mateo 24:3; New International Version) Yantangay ti sangatauan ken ti daga ket nakalasat iti panungpalan, saan kadi a nainkalintegan a sumaruno ti baro a panawen, wenno baro a sistema ti bambanag? Wen ti sungbat ti Biblia, ta tukoyenna ti “um-umay a sistema ti bambanag.”—Lucas 18:30.

Tinukoy ni Jesus dayta a masanguanan a panawen kas “ti pannakapabaro ti amin a bambanag.” Iti dayta a tiempo, isublinto ti Dios ti dati a kasasaad ti tao. (Mateo 19:28, NIV) Matagiragsaktayton ti:

• Naragsak ken natalged a biag iti Paraiso a daga. —Isaias 35:1; Mikias 4:4.
• Makagunggona ken makapnek a trabaho. —Isaias 65:21-23.
• Pannakapaimbag ti amin a sakit.—Isaias 33:24.
• Pannakaisubli ti kinaagtutubo.—Job 33:25.
• Pannakapagungar dagiti natay.—Juan 5:28, 29.

Ditay pagbutngan ti panungpalan ti lubong no aramidentayo “ti pagayatan ti Dios” ken ti kalikagumanna. Seggaantayo ketdi dayta.

TI SUNGBAT TI BIBLIA: “Inton makitayo a mapaspasamak dagitoy a banag, ammuenyo a ti pagarian ti Dios asidegen.”—LUCAS 21:31.

Iti librona a The Last Days Are Here Again, kuna ni Propesor Richard Kyle a ti “bigla a panagbalbaliw ken riribuk ti kagimongan ti mangallukoy kadagiti dadduma a mangipadto iti panungpalan ti lubong,” nangruna no kasla narigat nga ilawlawag dayta.

Nupay kasta, dagiti propeta iti Biblia a nangdakamat iti panungpalan saanda nga ilawlawag dagiti dida matarusan a pasamak idi kaaldawanda. Imbes ketdi, pinaltiingan ida ti Dios a mangiladawan kadagiti kasasaad a mangipakita nga asidegen ti panungpalan. Paliiwem ti dadduma kadagita a padto ket ibagam no matungtungpaldan.

•   Gubgubat, bisin, ginggined, ken makapapatay a sakit. —Mateo 24:7; Lucas 21:11.
• Napartak nga iyaadu ti krimen.—Mateo 24:12.
• Ti panangdadael dagiti tattao iti daga.—Apocalipsis 11:18.
• Panagayat dagiti tattao iti bagbagida, kuarta, ken ragragsak ngem awan panagayatda iti Dios.—2 Timoteo 3:2, 4.
• Ti pannakasinasina ti pamilia.—2 Timoteo 3:2, 3.
• Adu ti saan a mangikankano kadagiti ebidensia nga asidegen ti panungpalan.—Mateo 24:37-39.
• Ti pannakaikasaba iti naimbag a damag ti Pagarian iti intero a lubong.—Mateo 24:14.

Kas kinuna ni Jesus, no makitatayo “dagitoy amin a banag,” ammuentayo nga asidegen ti panungpalan ti lubong. (Mateo 24:33) Mamati dagiti Saksi ni Jehova a pudno dagiti ebidensia ken iranranudda ti patpatienda babaen ti panangasabada iti 236 a nasion.

TI SUNGBAT TI BIBLIA: “Inton sasawenda: ‘Talna ken talged!’ iti kasta giddato a dumteng kadakuada ti kellaat a pannakadadael kas iti ut-ot ti panagrigat a dumteng iti masikog a babai; ket saandanto a pulos makalisi.”—1 TESALONICA 5:3.

Inyarig ti Biblia ti pannakadadael ti lubong iti rugi ti panagpasikal—ti ut-ot a mapasaran ti ina ket saan a maliklikan ken kellaat a dumteng. Ti iyaay ti panungpalan ket kas iti panagsikog, ammo ti ina dagiti pagilasinan a dandanin agpasngay. Mabalin a pattapattaen ti doktorna ti petsa a panagpasngayna; uray no maitantan dayta, sigurado nga ipasngaynanto ti anakna. Umasping iti dayta, aniaman a di umiso nga inanamaen maipapan iti iyaay ti panungpalan, dina balbaliwan ti di agbiddut a pagilasinan ti “maudi nga aldaw.”—2 Timoteo 3:1.

‘No nalawagen dagiti pagilasinan nga asidegen ti panungpalan,’ mabalin a maisaludsodmo, ‘apay ngarud nga adu a tattao ti saan a makailasin iti dayta?’ Ipakita ti Biblia a no asidegen ti panungpalan, adu ti di mangikankano kadagiti ebidensia. Imbes a bigbigenda ti dakkel a panagbalbaliw bayat ti maudi nga al-aldaw, tagibassitenda dagita. Kunada: “Nanipud iti  aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.” (2 Pedro 3:3, 4) Nalawag ngaruden dagiti pagilasinan iti maudi nga al-aldaw ngem adu ti di mangikankano iti dayta.—Mateo 24:38, 39.

Inlawlawag daytoy nga artikulo ti sumagmamano laeng nga ebidensia iti Biblia nga asidegen ti panungpalan. * Kayatmo kadi a maammuan ti ad-adu pay? No wen, makisaritaka kadagiti Saksi ni Jehova ken awatem ti libre a panangyadalda iti Biblia. Mabalin nga iyadalandaka iti mismo a pagtaengam, iti lugar a kayatmo, wenno uray babaen ti telepono. Kasapulan laeng a mangiwayaka iti tiempo ket di magatadan ti magun-odmo a gunggona.