Nicolas bala Céline la akama ọdatị. Ị myọnụ nya ụkụrwọ ọlẹ ká egbeju ẹpwa ọla France ya haa du kị mwụ bwu ọjịra-jịra ọlẹ kị ji ene ka onyeewe. Ị ­yẹkẹẹ: “Ahị chị ọkẹkẹnị yẹẹyẹẹ ụka nya ọgbanyẹ, ma ahị tị dọmwụ nyọka wu iwoo nya aligu nyahị i-ijata. Áhị jẹ́ yẹ jula aanahị ịla ọjịra-jịra onyeewe nwà lẹka.” a Nyọlẹ kọ kaa lujwo ị-ịwẹ wẹẹ, ányị a tị́ ka họ ká ka jẹ́-ẹ chị ọkẹkẹnị ụka ká mwụ ka ọjịra-jịra onyeewe? Ịyẹ angịkịla à tị́ ka họ nyọka da ụbwọ? Agbẹyị iyina a tị́ ka jẹ́-ẹ ye ọhụ ojuju bwu ẹga nya angị ịla ọjịra-jịra onyeewe bala ahụ ọ-jwaa ọhụ ịnyịnyị?

ANG INE ỊLẸ KỊ KA DANG ỤBWỌ NYỌKA BỌHỤ MYỊ́

1. Kpụnịrọ iJihova. (Eje. 37:5) Kazumi, kọ juwa ịị Japan rụ bwu ọjịra-jịra ọlẹ kọ ji ẹ-ẹpwụ nya ẹka 20 lẹ, ụka ká ụkụrwọ kpa ọrụmwụ rụ ka ẹga ọkịla. Ányị ọ tị́ bwu ‘hu ịlọmwụ wuu ju iJihova ụ-ụbwọ’? Ọ yẹkẹẹ: “M̀ ya ọkịlẹtụ nyam wuu je iJihova u-uhye nya uhi, ịlọm ọ-la ụbwọm, bala uko ọchịchị ọlẹ kọ ji ẹpwụ nyam. Ụka myị́ ụka kam họ ịnyị, ọ kaa ya ọngịrị ọlẹ kam baba ham.”

Ányị a tị́ ka bwu kpụnịrọ iJihova gụ́ ọọwa? Jaabwọ ká okoji baba nya enyi bala eyo nya ọpyị nyọka jẹ́-ẹ nwà, ahị baba nyọka ju ọmyịmyị nyahị ọngịrị chajị kọ ka nwà ịnyịnyị. Nicolas, ọngọlẹ kahị gu ẹnyị lalẹ ene, yẹ nyori irya ọ-kụ ju oja nya angịnyị lala Ebiraham, iJisọsị, bala ịPọlụ—kị ri angịlẹ kị chị ịlaa imyi kpẹpwụ nyọka họ irya nya Ohe—jwọọ ọngịrị nyọka dahịhile gụ́ olene nyori ­iJihova ka dọọ ụbwọ. Kori ká kaa jẹ́ ịBayịbụụ la ịlọng ụka myị́ ụka, ọ ka dang ụbwọ nyọka jẹ́-ẹ bọhụ ẹ-ẹpwụ nya iwe-ahụrụ nyang onyeewe, à tị ka jẹ́ ang ọlẹ ká ka jẹ́-ẹ kpa ju angịkịla ọhụ ọọjịra-jịra nyang onyeewe ịnyịnyị.

 2. A chụ ọjịra-jịra pwoku awụlẹ ka. (Ọngọ. 7:10) Jules gbachị ọhọhọ ọlẹ kọ datị gbang-gbang hi ọlẹ kọ jẹ́ ene, ụka kọ mwụ bwu Benin ka United States. Ọ kpịptịya yẹkẹẹ: “Ọ kaa lam lala o-ri am nyị ka ja oja nya ọhịhị nyam je ọngọnyeewe ọnyị myị́ ọnyị kam tọ.” Chajị nyọlẹ ká ọhọhọ ọlụwa datị hi ẹla ọlẹ kọ bọọ ahị wẹẹ, ọ dọmwụ nyọka chị ịlọmwụ ebwo hi aanahị ịla ọjịra-jịra. Ma nyọlẹ kọ jẹ́ aanahị alẹng bala anyang pwụ ẹgẹhẹ, ọ yẹ irya nyamwụ da lẹlẹ. Ọ yẹkẹẹ: “M̀ jẹ́ lẹẹlẹẹ nyori ẹga myị́ ẹga kahị ji odehe ọlẹ, angịnyị ehe wuu la ookpokpo. Ị kaa ya ẹla bala ọ-họ ẹla ụ-ụgbẹyị ọdatị-datị ịnyị. Ọ baba nyọka ye angịnyị myị jaabwọ kị la.” Lẹ a chụ angịnyị kaka pwoku ala ọjịra-jịra nyang olene ka. Ọ la jaabwọ ká ọọnahị Anne-Lise, kọ kaa ye ịlahị nya ụgbẹyị ya yẹkẹẹ: “Ḿ mwụ nyọka yẹ ang ọlẹ kam rụ hi ka. M̀ mwụ nyọka jẹ́ ang inyeewe ịnyị.”

Angịgbahị nya ọjịra-jịra ịnyịnyị á ka chụ ang kaka pwoku ọla ọjịra-jịra nyaa olene ka. Kori ká ­aanahị á ja họ ang a-agbeyị ịdatị, ọ́ mẹjẹ nyori ị họ tịpyọ lẹ ka. Ọ ka ri ẹla ọjẹ́jẹ nyọka jẹ́ iwe-ahụrụ ọla oye nya ụwa ene nyọka gba irya ọkịla kpehe. (Ọngọ. 3:1, 7) Ọ kaa há gụ́ kori ká angịkịla á jẹ ang bwu ọgụ-ẹpẹtẹ nyang ọkọkọ nyọka hu ẹla ọlẹ kọ ri irya nyang chụ ala ọjịra-jịra u-uhye.—2 Kọr. 1:24.

3. Họ ụkụrwọ ọla ọjịra-jịra onyeewe. (Filip. 1:27) Ọ-mwụ ka ẹga ọkịla kaa ye ụka bala ọngịrị nya ọngịnyị, ma ọ tị baba nyọka kpa ẹta pwụ ọjịra-jịra ụka ká pwụ eji bwaa, kori ká ọọwa á chịkpẹẹ. Aanahị ịla ọjịra-jịra nyang onyeewe baba nyọka yẹng ụka myị́ ụka chajị kị ka jẹ́-ẹ tụ bang bala o-jung ọhụ. Lucinda, kọ mwụ bala anyị anyang nyamwụ imiiye ka epweji ọtụka ọhẹ ịị South Africa, kpịtịya yẹkẹẹ: “Aligu nyam jum ọhụ nyọka ya ẹhị ku ọ-ka jẹ́ aanahị ịla ọjịra-jịra onyeewe yẹẹyẹẹ, họ ụkụrwọ balaa ẹ-ẹrụ ọnyịịla ọ-kpa pyẹ, bala ọ-wẹ ẹla ụka nya ọjịra-jịra. Ahị dọmwụ wụrụ ẹpwa nyahị da nyọka kpa họ ọjịra-jịra nya ẹrụ ọnyịịla ọ-kpa pyẹ ịnyịnyị.”

Ahị ọ-ka “chẹkpẹ ju awụlẹ” ẹ-ẹpwụ nya ụkụrwọ nya Ohe ọhọhọ bala aanahị ịla ọjịra-jịra onyeewe ri ụgbẹyị ọnyịịla ọlẹ kahị ka ju ịlọhị bala angịkịla ọngịrị. Angịgbahị nya ọjịra-jịra ju Anne-Lise ọlẹ kahị ya ẹla rụ lalẹ ene ọhụ nyọka bajẹ kpehe nya ẹla Ohe bala ọng myị́ ọng ọọjịra-jịra onyeewe. Ịyẹ à tị́ ri ocheju nya ọọwa? Ọ yẹkẹẹ: “M̀ yẹ i-ijata nyori ọwẹ ri ụgbẹyị ọnyịịla ọlẹ kam ka jẹ́-ẹ họ ẹla pwoku ala ọjịra-jịra.” Ịnyịnyị, o-kpehe nya ụkụrwọ lala Ube nya Ịpyị-Adịrahụ ọ-kpa cheeri-cheri bala ọ-kpahị jwoo kaa mẹjẹ nyori à yẹ ọjịra-jịra ọwẹ lala ịnya ịlọng lẹ. Jaabwọ ká wẹẹ ya ụbwọ ju ụkụrwọ ọlụwa ẹ-ẹpwụ gụ́ ọọwa, ịnyịnyị aanahị ịlụwa à ka jẹ́-ẹ yẹ julang i-ijata bala ahụ ọ-ka jẹ́ nyori i ri ugbiyegu nyang lẹ.

4. La aligu inyeewe. (2 Kọr. 6:11-13) Kori ká angịnyị jẹ́ nyori à kpahị jwaa, ọ kaa chaa kpẹẹ la ọ-ka ri igu balang. Lẹ maga ká wẹ Ube nya Ịpyị-Adịrahụ ene ká ọjịra-jịra ka dọmwụ, a tị chị agaga rụ hyaa ka ịnyịnyị, chajị ká ka ye ụka ja oja bala ­aanahị nyọka jáa gụ́ ọọwa. Maga ká jẹ́ ẹnyị nyaa. Kori ká kpịtịya nya ẹnyị nya angịkịla bala ọ-kaa yi wawa, ị ka tịtọ nyọka jẹ́ng bala ọ-ka ri aligu nyang.

Ọkọkọ nyọka kpa ijẹẹhị họ ká aanahị ka yẹng ụ-ụgbẹyị ọdatị lẹ, ya iwe da kị jẹ́ ụma nya ọngịnyị ọlẹ ká ri kpangga. Jẹ́ ang bwu ẹga nya Lucinda, kọ yẹkẹẹ: “Ahị la aligu i-chii lẹẹlẹẹ chajị ahị kaa maga nyọka wụrụ angịkịla wẹ ẹpwa nyahị.”

“YE ANGỊKỊLA WẸ ẸPWỤ NYA OGU NYANỤ”

Ọ-jụ ka Ube nya Ịpyị-Adịrahụ ọlẹ ká jẹ́ ọngọngọhẹ ụ-ụwa ka kaa lujwo ha angịhyẹ. Lẹ ányị a tị́ ka họ kọ ká chịkpẹẹ ha angịlẹ kị mwụ warị onyeewe? Ọhụ ojuju nya ọlẹrụ ịPọlụ ri, “Ye angịkịla wẹ ẹpwụ nya ogu nyanụ, jaabwọ ká ịKịrayịsị ayịdang yenụ anụ ha ịlọmwụ” mẹ. (Rom. 15:7) Bwula ọ-gbịla ịKịrayịsị, angịgbahị ka jẹ́-ẹ da angịnyeewe ụbwọ nyọka jẹ́ nyori ị yaa myị. (Yẹ akpa ọlẹ kọ ri “ Ịyẹ à tị́ kaa Dụbwọ Ụka ká Ọngịnyị á Mwụ.”) Ma, ala  ọjịra-jịra wuu, ­tụ anjwo, la ụkụrwọ ka họ nyọka da angịnyeewe ụbwọ.

Ụga ọhọhọ ji ẹpwụ nya angịkịla o-ye myị, ụbwọ ọdada ẹ-ẹga ọlẹ kọ baba tị ji ẹpwụ nyamwụ ịnyịnyị. Ọ-chụ pwokwita, ọọnahị ọnyang ọhẹ pẹhi ụka ọlahịchịng nyamwụ kpa ọọnahị ọlẹ kọ mwụ ka ẹga nyaa jẹ nyọka mẹ epweji ọwẹ jọ́ọ bala abwọlẹ kị kaa bwu ju ang-ọrụnyẹ ụ-ụwa. ­Ẹlẹwẹ myị ọọnahị onyeewe lẹhị yẹẹyẹẹ bala ọ-dọọ ụbwọ nyọka jẹ́-ẹ bọhụ.

IWE NYỌKA JẸ́-Ẹ NWÀ

Jaabwọ ká ọyịrị á ja nwà, ọ kaa nyẹ ụhụ ụka ịmanyị-manyị ene kọ ka jẹ́-ẹ hụ. Ịnyịnyị-ịnyịnyị, ụka ká mwụ ka ọjịra-jịra onyeewe, à baba nyọka nyẹ ụhụ la uhi ọnyị kọ ka wung kpa la ọ-pyẹ achwọ nyang maa ẹ-ẹpwụ nya ụkụrwọ nya iJihova. Nicolas bala ­Céline yẹkẹẹ: “Ẹga ọkịla ọ-mwụ ka kaa mẹ ang jẹ ọngịnyị. Ahị ka baba nyọka la abwẹla inyeewe chajị nyọka jẹ́-ẹ yẹ ba angịnyị bala iwe-ahụrụ ịdatị.” Jean-Charles, kahị ya ẹla nyamwụ bwu ọmwụ ọdada lalẹ, ya jaabwọ ká ọwa bala ugbiyegu nyamwụ ye apyobwuna. Ọ yẹkẹẹ: “Ọyẹda ọwẹ  da anjwo nyahị ụbwọ nyọka nwà ka ịlahị ẹ-ẹpwụ nya ang nya olegu ọọjịra-jịra onyeewe. Nyọlẹ kọ la ọya ịmanyị-ịmanyị, ọnyị nyahị ọnyang dọmwụ nyọka la ụpa ọọjịra-jịra ọla arịrị nya epwihi, ọnyị nyahị ọlẹng tị ri ọngọ kpa ẹrụ ọnyịịla pyẹ ịnyịnyị.”

Ọ́ tị ri ká iwe-ahụrụ nyang á myị a ka mwụ, lala ọ-ka ẹga ká ọbaba ji gụ́ ka bẹẹ? À ka jẹ́-ẹ họ ká ọjịra-jịra ọlẹ ká ji ka lang onyeewe-onyeewe ­bwula ọ-họ jaabwọ ká ang ọjẹ́jẹ ọlẹ gba irya ­kpehe hahị wẹ myị́? Jaabwọ ká wẹẹ kpụnịrọ ­iJihova, maga ká ya ụbwọ ju akụrwọ ịla ọjịra-jịra ẹ-ẹpwụ, lala ọ-nwụ ụka nyang họ nyọka jẹ́-ẹ kpa ẹrụ ọnyịịla pyẹ bala angịkịla bala ọ-la aligu inyeewe lee ọ-họ ká igu oriri nyang bala angịlẹ kị ri aligu nyang ene-ene ka wu gụ́ ọọwa. À ka jẹ tụ ba angịnyeewe lee angịlẹ kị la ọbaba, nyọka daa ụbwọ ụ-ụgbẹyị ọlẹ kọ chịla myị́? Nyọlẹ ká ọháha à ri ang-ẹjẹẹ nya Angịnyị nya ịKịrayịsị nya ịlẹhị wẹẹ, ọ-họ ịnyị ka tụng ju iJihova chwẹẹ gụ́ ọọwa. (Jọn. 13:35) Jẹ́ myị̀myị̀ nyori “abwẹla ọnyịịla ọhọhọ ọlịịwẹ wuu a ri ụma nya iya ọkịlaakịla ọlẹ kọ kaa kpụ Ohe Oluhye ịpyọ lụmẹ lẹ.”—Hib. 13:16.

Nanana nyori ọ kaa lujwo, Angịnyị nya ịKịrayịsị lụmẹ-lụmẹ jẹ́ yé ọkẹkẹnị ẹ-ẹpwụ nya ọ-mwụ ka ọjịra-jịra onyeewe lẹ—ahụ ka jwọọ họ ịnyịnyị myị́! Anne-Lise yẹkẹẹ: “Ọ-mwụ ka ọjịra-jịra onyeeewe dam ụbwọ nyọka jẹ́-ẹ wụrụ ọkịlẹtụ da gbadaa.” Kazumi jẹ́ lẹẹlẹẹ nyori bwula ọmwụmwụ, “à kaa yẹ ụbwọ ọdada nya iJihova a-agbẹyị ịlẹ ká yẹ ene-ene lẹka.” Jules ọwa tị bẹẹ? Ọ yẹkẹẹ: “Aligu ịlẹ kam jẹ́ la dam ụbwọ nyọka la ịlọm. M̀ yẹ ịlọm lala ụpa nya ọjịra-jịra nyam onyeewe gbee wẹẹ, ọ dọmwụ ka lam ujwo nyọka rụ hi ụwa lẹ.”