Ụmụ gị nwere ike imejọ ihe ụfọdụ ugbu a ma ọ bụ n’ọdịnihu. Nke a nwere ike ime ka obi jọwa ha njọ. Olee otú ị ga-esi enyere ha aka inweta onwe ha?

•  Ihe i kwesịrị ịma

•  Ihe i nwere ike ime

 Anyị niile na-emejọ ihe mgbe ụfọdụ. Baịbụl sịrị na “anyị niile na-asụ ngọngọ.” (Jems 3:2) Ụmụaka na-emejọkwa ihe. Ma, o nwere ihe ha nwere ike ịmụta n’ihe ha mejọrọ. Ọ ga-akụziri ha otú ha ga-esi na-edi ihe ndị ha mejọrọ. Ụmụaka anaghị esi n’afọ ama otú e si edi ihe, ma ha nwere ike ịmụta ya. Otu nne aha ya bụ Laura kwuru sị: “Mụ na di m chọpụtara na ọ ka mma ka ụmụntakiri mụta ịna-edi nsogbu ndị na-abịara ha kama imewe ka à ga-asị na o nweghi ihe merenụ. Ọ ga-eme ka ha mụta otú ha ga-esi edi nsogbu ha mgbe ihe na-agaghị otú a tụru anya ya.”

 Ọtụtụ ụmụaka amaghị otú e si emezi ihe ha mebiri. Ụfọdụ ụmụaka anaghị ama otú ha ga-esi emezi ihe ha mebiri n’ihi na ndị mụrụ ha na-agbachitere ha mgbe niile. Dị ka ihe atụ, ọ bụrụ na nwatakịrị emeghị nke ọma n’ule, ụfọdụ ndị nne na nna na-ebo ya onye nkụzi ha. Ọ bụrụ na nwatakịrị na enyi ya esee okwu, ndị mụrụ ya na-asị na ọ bụ enyi nwa ha chọrọ ya okwu.

 Oleekwanụ otú nwatakịrị ga-esi ekweta na o mejọrọ ihe ma gbalịa imezi ya ma ọ bụrụ na ndị mụrụ ya anaghị ekwe ka ọ taa ahụhụ ihe o metara?

•   Mee ka ụmụ gị mata na ihe ọ bụla ha mere nwere ihe ga-esi na ya apụta.

   Baịbụl sịrị: “Mkpụrụ ọ bụla mmadụ na-agha, ọ bụ ya ka ọ ga-aghọrọkwa.”​—Ndị Galeshia 6:7.

   Ihe ọ bụla anyị na-eme nwere ike ịbara anyị uru ma ọ bụ ghọ anyị ahịa. Anyị mebie ihe, ọ ga efu anyị ihe iji mezie ya. Anyị mejọọ ihe, ọ ga-akpatara anyị nsogbu. E kwesịrị ịkụziri ụmụaka na ihe ọ bụla anyị mere, nwere ihe ọ na-akpata. E kwesịkwara inyere ha aka ikweta na ha mejọrọ ihe. N’ihi ya, adịkwala na-ata onye ọzọ ụta ma ọ bụ na-agbachitere ụmụ gị maka ihe ha mejọrọ. Kama, kwee ka ha tatụ ahụhụ ihe ha mejọrọ, dabere n’afọ ndụ ha. Ma, e kwesịrị ime ka nwatakịrị mata na ọ bụ ihe o mejọrọ mere e ji taa ya ahụhụ.

•   Kụziere ụmụ gị otú ha ga-esi na-emezi ihe ha mejọrọ.

   Amaokwu Baịbụl ga-enyere gị aka: “Onye ezi omume nwere ike ịda ọbụna ugboro asaa, ma ọ ga-ebilicha.”​—Ilu 24:16.

   Anyị mejọọ ihe, o nwere ike ịgbawa anyị obi, ma ọ pụtaghị na nke anyị na-eme agwụla. Ụmụ gị mejọọ ihe, nyere ha aka ka ha na-eche otú ha ga-esi ghara ime ihe ahụ ọzọ, kama ịna-eche na ihe ahụ merenụ e kwesịghị ime. Dị ka ihe atụ, ọ bụrụ na nwa gị adaa n’ule, nyere ya aka ka ọ gụsie akwụkwọ ike ma kpebisi ike na ya ga-eme nke ọma n’ule ọzọ. (Ilu 20:4) Ọ bụrụ na nwa gị nwaanyị na enyi ya nwere nghọtahie, nyere ya aka ka ọ mata otú ọ ga-esi agakwuru ya ka ha kpezie n’agbanyeghị onye mejọrọ ibe ya.​—Ndị Rom 12:18; 2 Timoti 2:24.

•   Kụziere ụmụ gị ka ha dịrị umeala n’obi.

   Amaokwu Baịbụl ga-enyere gị aka: “Ana m agwa onye ọ bụla n’etiti unu n’ebe ahụ ka ọ ghara iche banyere onwe ya karịa ka o kwesịrị iche.”​—Ndị Rom 12:3.

   Ịna-agwa nwa gị na ọ ka ndị ọzọ mma ekwesịghị ekwesị, ọ gaghịkwa enyere ya aka. A sị ka e kwukwe, ọ bụghị mgbe niile ka nwatakịrị ụbụrụ na-aghọ nkọ ga-eme nke ọma n’ule. Ọ bụghịkwa mgbe niile ka nwatakịrị na-eme nke ọma n’egwuregwu ga-emeri. Ụmụntakịrị ndị dị umeala n’obi na-aka edi ihe ha mejọrọ karịa ụmụaka ndị ọzọ. Ha na-akakwa ha edi ihe mgbe ihe na-agaghị otú ha tụru anya ya.

   Baịbụl kwuru na nsogbu bịaara anyị nwere ike ime ka anyị sikwuo ike, meekwa ka anyị na-enwekwu ndidi. (Jems 1:​2-4) N’agbanyeghị na ọ na-ewute mmadụ ma o mejọọ ihe ma ọ bụkwanụ ma ihe agaghị otú ọ tụrụ anya ya, ma i nwere ike inyere ụmụ gị aka ka ha ghara ikwe ka o mee ka ha daa mbà.

   Ịkụziri ụmụaka idi ihe mere ha na-ewe oge otú ahụ ịkụziri mmadụ aka ọrụ na-ewe oge. Ọ chọkwara ịgbasi mbọ ike. Ma ọ ga-abara ha uru mgbe ha na-eto eto. Akwụkwọ bụ́ Letting Go With Love and Confidence kwuru, sị: “O yiri ka ndị na-eto eto ma otú e si edi nsogbu bịaara ha agachaghị agbara ọsọ mee ihe ọjọọ ma ha nwee nsogbu. Ihe ha na-atụghị anya ya mee ha, ha ga-aka edi ya.” O doro anya na nwatakịrị mụta otú e si edi nsogbu mgbe ọ na-eto eto, ọ ga-abara ya uru ma o too.

 Aro: Jiri ihe ị na-eme kụziere ụmụ gị ihe. Cheta na ihe ị na-eme mgbe ihe na-agaghị otú ị tụrụ anya ya ga-akụziri ụmụ gị ihe ha ga-eme ma ihe ha na-atụghị anya ya mee.