Ndị ọkà mmụta anaghị arụ ụka ma Jizọs ò biri ndụ n’ụwa a. N’oge ndịozi Jizọs, e nwere ndị ọkọ akụkọ ihe mere eme kwuru gbasara Jizọs na ndị Kraịst e nwere n’oge ahụ. Otu akwụkwọ ọkọwa okwu a na-akpọ Encyclopædia Britannica [nke afọ 2002] kwuru, sị: “Ihe ahụ ha kwuru gosiri na ndị na-achọghịdị iji anya ahụ Ndị Kraịst n’oge ahụ kwetara na Jizọs biri ndụ n’ụwa. Ọ bụzi n’oge anyị a ka ndị mmadụ bidoro na-ekwu na Jizọs ebighị ndụ n’ụwa a. O nweghịkwanụ ebe ha gbakwasịrị ụkwụ na-ekwu ya.”

 Otu akwụkwọ e bipụtara n’afọ 2006, a na-akpọ Jesus and Archaeology, kwuru, sị: “O nweghị ezigbote onye ọkà mmụta na-arụ ụka ma Josef, nwoke onye Juu, ò nwere nwa a kpọrọ Jizọs. Ọtụtụ n’ime ha kwuru na ndị mmadụ amatala ọtụtụ ihe Jizọs mere na ihe ndị ọ kụziri mgbe ọ nọ n’ụwa.”

 Baịbụl gosiri na e nwere onye bụ́ Jizọs. O kwudịrị aha ndị nna nna ya na aha ndị ezinụlọ a mụrụ ya. (Matiu 1:1; 13:55) O kwukwara aha ndị ọchịchị e nwere n’oge Jizọs. (Luk 3:1, 2) Ihe ndị a niile gosiri na akụkọ ndị a kọrọ na Baịbụl abụghị akụkọ ifo.