ƐLĀ Ō NWU ƆMƐ 5
Ɔdi nɛ Ɔwɔico bi ɔtu lɛyikwu ɛcɛ nyā a?
1. Ɔdiya ɛɛ nɛ Ɔwɔico ya ɛcɛ nyā a?
Ujehofa ya ɛcɛ nyā o ya ɛɛ ku alɛɛcɛ kéē lā ipu nu. Ɛnyā ya ɛɛ nɛ Ɔwɔico i ya Adam mɛmla Iifu kéē lā ipu ɔkpanco ŋ ma. Amáŋ, aalelekwu otɛhɔ ku nu nɛ ó ya kéē lā ipu ɔkpanco á. (Ujóbu 38:4, 7) Eko nɛ Ɔwɔico ya Adam a, ó kwu ɔ u ta ipu uparadais, ɛga nōo lɔhi ō má eyī nɛhi, o ya ɛɛ kóō lā abɔɔ. É hi abɔɔ ka ɛhɔ̄ (iga) ku Idɛn. (Ohútu 2:15-17) Ó wɛ ɔtu ku Ujehofa ka Adam mɛmla ɛjɛɛji ayipɛ nɛ ó gáā ma a kéē lā ipu ɛcɛ nyā ogboogboo ɛcɛ.—Jé Aíjē kú Ɛ̄gbā 37:29; 115:16.
Eko nɛ Ɔwɔico ya Adam mɛmla Iifu a, ɛhɔ̄ (iga) ku Idɛn a foofunu wɛ uparadais a. Amáŋ, Ɔwɔico dɔka kéē ma ayi, ku ayi uwa kéē nyila gā ipu oduudu ɛcɛ. Cɛɛ, ɛmɛɛma, abɔ eko yɔ i nyɔ a, é géē je oduudu ɛcɛ a piya uparadais. (Ohútu 1:28) Ɔwɔico i gáā je ɛcɛ ku alɔ nyā yiifi gboogboo ŋ. Ó dɔka ku alɛɛcɛ kéē lā ipu nu piyoo.—Jé Aíjē kú Ɛ̄gbā 104:5.
Má uvidio nyā nōo kahinii Why Did God Create the Earth?
2. Ɔdiya nɛ ɛcɛ nyā i wɛ uparadais icɛ ŋ ma?
Adam mɛmla Iifu lɛ ikpɛyi olɔfu ya ta Ɔwɔico, ohigbu ɔɔma, ó kwu uwa i nu ŋma ipu ɛhɔ̄ (iga) ku Idɛn a. Ɔɔma ya ɛɛ nɛ ɛcɛ a i wɛ uparadais icɛ ŋ ma. Ŋmiifi eko ɔɔma, ó lɛ ɔcɛ duuma nōo lɔfu ya ku ɛcɛ nyā kóō je piya uparadais gla ɛ ŋ. Ubáyíbu da alɔ kahinii: “Ɛcɛ” a yɔ “ipú abɔ̄ kú ācobɔ̄bíipú” a.—Ujóbu 9:24.—Jé Ohútu 3:23, 24.
Ɔɔma lé ka ɛjɛɛji ɔdā nɛ Ujehofa bi ɔtu lɛyikwu alɔ a i gáā lɛyi gɛ ŋ nɛɛ? Ó géē lɛyi gboo! Ujehofa lɔfu fiyɛ duu á. Ó gáā je alɔ kwu ɔwɛ gboogboo ŋ. (Ayisáya 45:18) Igbihaajɛ, ó géē ya ɔdā nōo tɛtɛ bi ɔtu ō ya lɛ alɔ nōo wɛ alɛɛcɛ a kpɔ.—Jé Aíjē kú Ɛ̄gbā 37:11, 34.
3. Ɛgɛnyá nɛ Ɔwɔico gáā ya ku ɛcɛ nyā kóō kwu piya uparadais kpɔ a?
Ujisɔsi géē ya ku ɛcɛ nyā kóō kwu piya uparadais kpɔ, eko nɛ ó géē gbɔɔ ō lé ɔcɛ́ ku ɛcɛ nyā a. Ipu ɛfú ō kpo nɛ Ubáyíbu hi ka Amagɛdɔn a, Ujisɔsi géē bi aalelekwu otɛhɔ ku Ɔwɔico wa i ŋmo ɛjɛɛji ācɛ nōó gē lɛyitaajɛ lɛ Ujehofa ŋ ma. Cɛɛ, ó géē lɛ Ebilii ta agba ihayi ula ɛpa ce ofu igwo. Ipu ɛfú ō kpo ɔɔma a, ācɛ nōo gē lɛyitaajɛ lɛ Ujehofa a i gáā kwū ŋ, ohigbu ka Ujisɔsi géē gbo uwa, o ya ɛɛ ku ɔdā duuma kóō hii ya uwa ŋ. É géē lā oyeeyi opiyoo ipu ɛcɛ nyā, eko nōó kwu piya uparadais.—Jé Ɔdā Nēé Mafú Lɛ Ujɔ́ni 20:1-3; 21:3, 4.
4. Eko nyá nɛ owe gáā mɛ a?
Eko nyá nɛ Ɔwɔico géē ya ku ɛjɛɛji owe kóō mɛ a? Ujisɔsi da alɔ lɛyikwu “ɔdōcābɔ̄” nōo géē mafu ku eko amoomɛ a le ba ɛ. Ɛjɛɛji ɔdā nōo kē yɔ i ya icɛ a mafu peee ku alɔ lā ɛpleeko “nɛ̄ ɛcɛ nyā” gáā “mɛ” a.—Jé Umátiyu 24:3, 7-14, 21, 22.
Ipu ihayi ula ɛpa ce ofu igwo (1,000) nɛ Ujisɔsi gáā lé ɔcɛ́ ku ɛcɛ nyā ŋma ɔkpanco a, ó géē ya ku alɔ kóō hii má owe gɛ ŋ. (Ayisáya 9:6, 7; 11:9) Ujisɔsi i gáā wɛ ɔcɛ́ foofunu ŋ, amáŋ, ó géē wɛ otrɛyi ku ācɛ ogwɛɛya duu. Ɔɔma le ka ó géē nya ɛjɛɛji oyabiya nɛ ācɛ nōo yihɔtu ku Ujehofa ya a. Ɔwɔico géē bi Ujisɔsi ya ku ōcē, ō hila okplici mɛmla ikwū kóō hii yɔ gɛ ŋ.—Jé Ayisáya 25:8; 33:24.
5. Anyɛ gáā lā ipu ɛcɛ nyā eko nōó kwu piya uparadais a?
Ɔdaŋ ku a wa Agbla Ku Ajɔɔcɛ ku alɔ, a géē piyatɔha mla ācɛ nōo yihɔtu Ɔwɔico, nōo klla yɔ i nwu ɔdā néē géē ya, o ya ɛɛ kéē ya ɔdā nōo he ɔ ɔtu a
Ācɛ nōo gē lɛyitaajɛ lɛ Ɔwɔico gáā lā ipu uparadais a. (1 Ujɔ́ni 2:17) Ujisɔsi da ācɛ nōo gē yɛce ɔ a kéē gáā dɔka ācɛ ō ta iyi uwa waajɛ, o ya ɛɛ kéē nwu uwa ɔdā néē géē ya kéē lɛ ɛma olɔhi mla Ɔwɔico. Icɛ, Ujehofa yɔ i nwu ācɛ alɛwa ɔdā néē géē ya, o ya ɛɛ kéē lɔfu lā ipu ɛcɛ nyā eko nōó kwu piya uparadais. (Usɛfaníya 2:3) Ipu Agbla Ku Ajɔɔcɛ Ku Ācɛ Ocijali Ku Ujehofa, é gē nwu ācɛ ɔdā néē géē ya kéē wɛ ɔba amāŋ ɔnyā olɔhi. Ɛ́nɛ́ mla adā mɛmla ayipɛ ɔlɛ uwa gē nwu ɛlā tɔha lɛyikwu ɔdā néē géē ya, o ya ɛɛ kéē lɛ itene ŋma ɔkoolɔhi nōo ŋma ɛgiyi Ɔwɔico a.—Jé Umáyíka 4:1-4.
