Ajɔɔcɛ ku Ɔwɔico wɛ igɔmɛnti ku Ɔwɔico nōo yɔ ɔkpanco. Ajɔɔcɛ ɔɔma géē lɛ ɛjɛɛji igɔmɛnti ku ɛcɛ nyā cataajɛ. Ó klla géē ya ku ɔdā nɛ Ɔwɔico tine a kóō le ya ipu ɔkpanco mɛmla ɛcɛ nyā. Ɔtu he alɔ nɛhi ō jé ku Ɔwɔico géē bi Ajɔɔcɛ ku nu le ya aɔdā nōo ba nyā. Ó gáā gboji gɛ ŋ, Ɔwɔico géē bi Ajɔɔcɛ ku nu le ya ɛjɛɛji ɔdā nɛ alɛɛcɛ humayi dɔka ku igɔmɛnti olɔhi kóō ya lɛ uwa a. Ó géē ya ku ɛjɛɛji ācɛ kéē piyatɔha.—Jé Udánīyɛ̄lu 2:44; Umátiyu 6:9, 10; 24:14.

Ajɔɔcɛ duuma gē lɛ ɔcɛ́. Ujehofa lɛ Ɔyinɔnyilɔ ku nu nōo wɛ Ujisɔsi Ukraist a fu kóō wɛ ɔcɛ́ ku Ajɔɔcɛ ku nu.—Jé Ɔdā Nēé Mafú Lɛ Ujɔ́ni 11:15.

Má uvidio nyā nōo kahinii What Is Godʼs Kingdom?

Ɔdā nōo ya ɛɛ nɛ Ujisɔsi wɛ ɔcɛ́ nōó lɛ ɛdɔ ŋ ma wɛ ohigbu ka ó gbonɛnɛ nɛhi, ó klla gē ya ɔdā okpaakpa eko doodu. (Umátiyu 11:28-30) Ɔdā ɔhá kpɔ wɛ ka Ujisɔsi lɛ ɔfu. Ó géē bi ɔfu ku nu le ta ɛjɛɛji ācɛ abɔ, ohigbu ka ó géē lé ɔcɛ́ ku ɛcɛ nyā ŋma ɔkpanco. Eko néē lɛ Ujisɔsi heyi ŋma ɔlekwu a, ó le ta ɔkpanco gáā yaajɛ abɔlɔna ku Ujehofa yɔ i gbeyi ka ó lɛ ɔfu ku ɔcɛ́ je lɛ ɔ. (Ācɛ Uhíbru 10:12, 13) Ujehofa kē kwu ɔfu ku ɔcɛ́ u lɛ ɔ igbihaajɛ.—Jé Udánīyɛ̄lu 7:13, 14.

Ācɛ ōhī nɛ Ɔwɔico hi ipu Ubáyíbu ka “ācɛ ɔlɛ́ nū [“ācɛ otiihɔ a,” NW ]” gáā lé ɔcɛ́ mla Ujisɔsi ŋma ɔkpanco á. (Udánīyɛ̄lu 7:27) Acocɛhɔ ku Ujisɔsi nōo lɛyitaajɛ lɛ Ɔwɔico a wɛ ācɛ aflɛyi néē fu kéē wɛ ipu igwú ku ācɛ otiihɔ nyā a. Ŋmiifi eko ɔɔma a, Ujehofa humayi fu ŋma ipu alɛɛcɛ, acɛnyilɔ mɛmla acɛnya nōo gē lɛyitaajɛ lɛ ɔ a kéē wɛ ipu ācɛ otiihɔ nyā nōo géē lé ɔcɛ́ mɛmla Ujisɔsi a. Ɛgɛ  nɛ Ujisɔsi je piya alelekwu eko nɛ ó heyi ŋma ɔlekwu a, ɛgɔɔma nɛ ācɛ nōo ba nyā géē je piya alelekwu, eko nɛ Ɔwɔico lɛ uwa heyi ŋma ɔlekwu á.—Jé Ujɔ́ni 14:1-3; 1 Ācɛ Ukɔ́rīnti 15:42-44.

Ācɛ ɛmula gáā gā ɔkpanco a? Ujisɔsi hi ācɛ nōo gáā gā ɔkpanco a ka “aígwu nɛ̄ŋ́cɛ́.” (Ulúku 12:32) Oŋmɛyi ku nu a, é géē wɛ ācɛ ula ofu igwaahata (144,000). Uwa mla Ujisɔsi kē gáā lé ɔcɛ́ ku ɛcɛ nyā a.—Jé Ɔdā Nēé Mafú Lɛ Ujɔ́ni 14:1.

Ajɔɔcɛ ku Ɔwɔico gbɔɔ ō lé ɔcɛ́ ipu ɔkpanco ipu ihayi ku 1914. * Ɔdā aflɛyi nɛ Ujisɔsi ya, eko nɛ ó gbɔɔ ō lé ɔcɛ́ ipu ɔkpanco a wɛ ō lɛ Ebilii mɛmla aalelekwu obɔbi ku nu nu ŋma ɔkpanco wa ipu ɛcɛ nyā. Ɔdā nɛ Ujisɔsi ya nyā ya Ebilii cɔnu nɛhi, ɔɔma ya ɛɛ nōó yɔ i ya unwalu ɛga doodu ipu ɛcɛ nyā a. (Ɔdā Nēé Mafú Lɛ Ujɔ́ni 12:7-10, 12) Ŋmiifi eko ɔɔma, ɛdɔ unwalu nɛ alɔ humayi má a ba, ó le fiyɛ alɔ ɔfu, okonu ku alɔ i kóō ka ɔ gla ŋ. Unwalu nɛ alɔ yɔ i má babanya bɛɛka ɛfú ō kpo, ɔkpɛta, ōcē ɛyɛɛyɛyi nōo yɔ i tu, mɛmla ajɛ ō jiliye klla hɛ wulu a wɛ ipu aɔdā nōo yɔ i “cabɔ” lɛ alɔ ka eko nɛ Ajɔɔcɛ ku Ɔwɔico géē wa i ce ɔcɛ́ ku ɛcɛ nyā le ba ɛ.—Jé Ulúku 21:7, 10, 11, 31.

Ajɔɔcɛ ku Ɔwɔico yɔ i ya ku ɛwa nɛhi ku ācɛ nōo ŋma éwo ɛyɛɛyɛyi kéē piyatɔha ipu ɛbɔ. Uklɔ ku ɔna ō ta néē gē ya ipu oduudu ɛcɛ a nɛ Ɔwɔico yɔ i bi le ya ɛnyā a. Icɛ, ācɛ alɛwa nōo wɛ ācɛ ō gbonɛnɛ a kē yɔ i lɛyitaajɛ lɛ Uijsɔsi. Eko nɛ Ɔwɔico gáā bi Ajɔɔcɛ ku nu wa i lɛ ācɛ obɔbiipu kpo ŋmo ŋma ipu ɛcɛ nyā a, ó gáā cɛ ku ɔdā duuma kóō ya ācɛ nōo gē lɛyitaajɛ lɛ ɔ a ŋ. Ohigbu ɛnyā a, ɔcɛ duuma nōo dɔka ō gā ipu Ajɔɔcɛ ku Ɔwɔico, cika ō bēē lɛyitaajɛ lɛ Ujisɔsi babanya.—Jé Ɔdā Nēé Mafú Lɛ Ujɔ́ni 7:9, 14, 16, 17.

Ujisɔsi géē lé ɔcɛ́ ku ɛcɛ nyā ihayi ula ɛpa ce ofu igwo. Ipu ihayi ula ɛpa ce ofu igwo ɔɔma, ó géē ya ɔdā nɛ Ɔwɔico tɛtɛ bi ɔtu ō ya lɛ alɔ a. Oduudu ɛcɛ a géē je piya uparadais. Cɛɛ, eko nɛ ihayi ula ɛpa ce ofu igwo a mɛ, Ujisɔsi géē kwu íkwu ku ɔcɛ́ nɛ ó lé a u lɛ Adā nu cigbihi. (1 Ācɛ Ukɔ́rīnti 15:24-26) Ó lɛ ɔcɛ duuma nɛ a jé, nɛ a géē dɔka ō da ɔ lɛyikwu Ajɔɔcɛ ku Ɔwɔico?—Jé Aíjē kú Ɛ̄gbā 37:10, 11, 29.