ƐLĀ Ō NWU 02

Ubáyíbu Gē Je Eyiyoce Lɛ Alɔ

GBƆƆ

Ācɛ ipu oduudu ɛcɛ lɛ unwalu ɛyɛɛyɛyi nōo gē cɛ lɛ uwa cɔnu, lɛ ɔtooplico, klla gē jɔɔnɔ. Ɔdā duuma ya da uwɔ nōo cɛ gā uwɔ yɔ ipu ɛdɔ āhɔ̄ ɛgɔɔma gbɔbu ɛɛ? Á jé ŋ, a yɔ i má owe ohigbu ōcē amāŋ ohigbu ka ɔcɛ nɛ a yihɔtu nu kwū ɛ. A lɔfu da iyi uwɔ ɔka, ‘Oyeeyi géē lɔhi gla kpɔ ɛ?’ Ubáyíbu je ohi ō ta ɔtu kwu ɔtu ku ɔka nyā.

1. Eyiyoce lɛyikwu ɛcɔbu nyá nɛ Ubáyíbu je lɛ alɔ a?

Ubáyíbu da alɔ ɔdā nōo ya ɛɛ nɛ ɛcɛ nyā le mu mla unwalu ɛyɛɛyɛyi a. Ó klla da alɔ ɔkoolɔhi kóō gboji ŋ, Ɔwɔico géē bi ɛjɛɛji unwalu a wa oŋmɛyi. Aokonu ō ce ku Ubáyíbu lɔfu ‘je eyiyoce ku ɛcɔbu gā uwɔ.’ (Jé Ujɛrɛmíya 29:11, 12.) Aokonu ō ce nyā géē ta alɔ abɔ lé ɔtu unwalu nɛ alɔ yɔ i má babanya ku alɔ klla lɛ eeye duu. Aokonu ō ce nyā kē ta alɔ ɔtu kwu ɔtu ku alɔ géē gweeye piyoo.

2. Ɛgɛnyá nɛ Ubáyíbu cokonu ka ɛcɔbu a gáā lɛ a?

Ubáyíbu ka ɛcɔbu “ikwū í gáā yɔ̄ gɛ ŋ́, ācɛ í gáā yēkwu gɛ ŋ́, ācɛ í gáā jikwū gɛ ŋ́, ācɛ í kē gáā jɔ́ɔnɔ gɛ ŋ́.” (Jé Ɔdā Nēé Mafú Lɛ Ujɔ́ni 21:4.) Unwalu nōo gē cɛ lɛ ācɛ má owe icɛ bɛɛka ɛha, o ya ŋmo, ōcē mla ikwū a i gáā yɔ gɛ ŋ. Ubáyíbu cokonu ka alɛɛcɛ géē jɔɔnyɛ oyeeyi opiyoo ipu Uparadais ɛcɛ nyā.

3. Ɛgɛnyá nɛ a géē lɔtuce ka ɛjɛɛji okonu ō ce nōo yɔ ipu Ubáyíbu géē ya jila a?

Ācɛ alɛwa gē leyice ka aɔdā olɔhi géē ya, amáŋ é jé kpɔcii ɔdaŋ ka eyiyoce ku uwa géē ya jila ŋ. Amáŋ, aokonu ō ce ku Ubáyíbu wɛ ɛyɛɛyi. Alɔ lɔfu lɔtuce aɛlā nōo yɔ ipu Ubáyíbu a ŋma lɛ ō “jila ɛlɔ̄ɔwɔicō ā ɛ̄cī dóódu.” (Úklɔ́ kú Ācotɛ̄hɔ̄ 17:11) Abɔ a yɔ i ya oklɔcɛ ku Ubáyíbu a, a géē wa i miya abɔyi uwɔ ɔdaŋ ku a géē lɔtuce aɛlā nōó ka lɛyikwu ɛcɔbu a.

JÉ GƆBU

Leyi yɛ ɔdā ōhī nɛ Ubáyíbu ka lɛyikwu ɛcɔbu. Leyi má ɛgɛ nɛ eyiyoce nɛ Ubáyíbu je a yɔ i ta ācɛ alɛwa abɔ icɛ a.

4. Ubáyíbu cokonu ku alɔ géē lā oyeeyi opiyoo nɛ alɔ i gáā má owe duuma gɛ ŋ

Leyi má okonu ō ce ɛyɛɛyɛyi nōo yɔ ipu Ubáyíbu a. Ɛnyá he uwɔ fiyɛ duu a? Ɔdiya a?

Jé aɛga ku Ubáyíbu néē ta ba okonu ō ce a iyē, cɛɛ ku aa kɔka lɛyikwu aɔka nōo ba nyā:

A gbɛla ka aɛga ku Ubáyíbu nyā je eyiyoce duuma gā uwɔ? É lɔfu je eyiyoce duuma lɛ ācɛ apɔlɛ amāŋ aoklobiya mla ancɛnya ku uwɔ?

Leyi má iyi uwɔ ku a lā ipu ɛcɛ

NƐ ƆCƐ DUUMA I GÁĀ . . .	ƐJƐƐJI ĀCƐ GÉĒ . . .
jɔɔnɔ gɛ ŋ, hilokplici amāŋ kwū gɛ ŋ.—Ayisáya 25:8.	má ācɛ néē yihɔtu uwa nōo kwū a heyi ŋma ɔlekwu ō wa i lā oyeeyi ipu ɛcɛ nyā kpɔ.—Ujɔ́ni 5:28, 29.
doōcē amāŋ nyɔnyi duuma gɛ ŋ.—Ayisáya 33:24; 35:5, 6.	jɔɔnyɛ oyeeyi néē gáā doōcē ŋ, é klla géē lɔfu iyē bɛɛka eko ɔyipoklobiya mla ɔyipɔncɛnya ku uwa kpɔ.—Ujóbu 33:25.
má o ya ŋmo gɛ ŋ.—Ayisáya 32:16, 17.	lɛ ɔdole nwune néē géē lé, ɛnɛɛnɛ ɔlɛ néē géē lā anu mla ɛnɛɛnɛ uklɔ néē géē jɔɔnyɛ nu.—Aíjē Kú Ɛ̄gbā 72:16; Ayisáya 65:21, 22.
má owe ohigbu ɛfu ō kpo gɛ ŋ.—Aíjē Kú Ɛ̄gbā 46:9.	jɔɔnyɛ ɛbɔ ipu oduudu ɛcɛ.—Aíjē Kú Ɛ̄gbā 37:11.
lɛ ɔtu nobi ohigbu ɛlá ku ɔdobɔbi nōo ya ɔ a gɛ ŋ.—Ayisáya 65:17.	lā oyeeyi opiyoo ipu āhɔ̄ olɔhi ipu ɛcɛ nyā.—Aíjē Kú Ɛ̄gbā 37:29.

5. Okonu ō ce ku Ubáyíbu lɔfu piya oyeeyi ku ɔcɛ abɔ gla

Abɔ le hɛ ācɛ alɛwa iyē, é klla yɔ i cɔnu ohigbu unwalu ɛyɛɛyɛyi néē yɔ i má nōo yɛ jila uwa ta a. Ācɛ ōhī gē ceyitikwu nɛhi o ya ɛɛ kéē lɛ āhɔ̄ a piyabɔ gā olɔhi. Má ɛgɛ nɛ okonu ō ce ku Ubáyíbu nōo ka āhɔ̄ ku alɛɛcɛ géē piyabɔ gā olɔhi a yɔ i ta ācɛ abɔ babanya. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.

UVIDIO: N Dɔka Ō Ya Ka O Ya Ŋmo Kóō Mɛ (4:07)

Ipu uvidio nyā, o ya ŋmo nyá junwalu lɛ u Rafika a?
Naana nɛ o ya ŋmo nɛ ó má a i mɛ ŋ ma a, ɛgɛnyá nɛ Ubáyíbu ta ɔ abɔ a?

Eko duuma nɛ alɔ kpɔtuce aokonu ō ce ku Ubáyíbu lɛyikwu ɛcɔbu a, ɔtu i gáā biya lɛ alɔ ŋ, alɔ klla géē lɛ eeye kpɔ naana nɛ alɔ yɔ i má unwalu a. Jé Aíita 17:22 mla Ācɛ Uróm 12:12, cɛɛ ku aa kɔka lɛyikwu aɔka nōo ba nyā: