Enda. Kitai enggau tetap nginjil ari rumah ke rumah, tang kitai enda nyangka kitai ulih selamat ketegal ngereja pengawa tu. (Epesus 2:8) Nama kebuah?

 Peratika bida utai tu: Gambarka seiku lelaki ke kaya deka meri pemeri ti pemadu mar ngagai sapa ke ulih datai ngagai endur enggau maya ke udah ditetapka. Enti nuan amat pechayaka semaya lelaki nya, kati nuan deka nitihka atur iya? Tentu! Pia mega, nuan engka jampat madahka bala diri sebilik enggau bala kawan nuan pasal peluang nya, ngambika sida pan bulih penguntung ari nya. Taja pia, nuan enda tentu ulih pemeri nya ari nitihka atur lelaki nya. Pemeri nya tetap pemeri.

 Baka nya mega, Saksi-Saksi Jehovah pechaya semaya Petara pasal pengidup belama iya nya dituju ngagai orang ke ngasika Iya. (Rome 6:23) Kami keran deka bekunsika berita manah enggau orang bukai, ngarapka sida mega tau bulih penguntung ari semaya Petara. Tang kami enda nyangka kami ulih selamat ketegal ngereja pengawa tu. (Rome 1:17; 3:28) Endang amat, nadai mensia ulih ngereja utai lebih ari ke diberekat Petara “Iya nyelamatka kitai, ukai laban kitai udah ngereja pengawa ti lurus, tang ulih pengasih Iya.”—Titus 3:5, Contemporary English Version.