Kati alam semesta bisi pun?

Pemungkal 1:1 madahka: ‘Ba pun iya kelia, lebuh Petara berengkah ngaga langit enggau dunya.’

Sebedau taun 1950, mayuh saintis ke tebilang pechaya alam semesta nadai pun. Tang nitihka pansik ti baru, mayuh saintis ke diatu setuju alam semesta bisi pun.

Ba pun iya, baka ni gaya bumi?

Pemungkal 1:2, 9 ngambarka, ba pun iya bumi “apin bisi bakal tauka gamal sereta nadai utai nguan,” lalu penuh enggau ai.

Utai ke digambarka tu sejalai enggau penemu sains. Patrick Shih, seiku pakar biologi madahka, ba pun iya planet kitai, “nadai ngembuan oksigen . . . lalu gaya bumi nya nyelai.” Majalah Astronomy nerangka, “Nitihka pansik empai lama ti udah, ba pun iya bumi penuh enggau ai lalu ngembuan mimit aja darat.”

 Baka ni atmosfera bumi belubah-lubah berubah?

Ba pun iya Pemungkal 3:1-5 madahka, atmosfera bumi amat tebal nyentukka penampak enda ulih nembus iya. Ba hari bukai, baru meh mata panas enggau bulan ulih dipeda enggau terang ari bumi.—Pemungkal 1:14-18.

Nitihka Smithsonian Environmental Research Center, ba pun iya, penampak ke tembus ngagai bumi enda terang. Pusat alai mansik nya madahka, “Ba pun sejarah bumi, bumi penuh enggau kabus tebal ti datai ari metana.” Udah nya, “kabus metana nya lenyau lalu langit nyadi biru.”

Nama ripih utai idup ke ditempa ba bumi?

Pemungkal 1:20-27 madahka, ikan ke dulu ditempa, udah nya baru meh burung, semua jelu bukai ba darat, lalu ke penudi nya mensia. Saintis pechaya, ikan udah lama bisi sebedau jelu mamalia ditempa. Lalu pengudah sesiti timpuh ti panjai, baru meh mensia bisi.

Sekeda orang berunding, Bup Kudus enda sejalai enggau penemu sains kemayaharitu. Kesuah iya, sida bisi runding baka nya laban sida saru penemu enggau utai ke dipadah dalam Bup Kudus

Bup Kudus nadai madahka alam semesta enggau bumi semina beumur 6,000 taun. Bup Kudus semina madahka, bumi enggau alam semesta ditempa “ba pun iya kelia,” tang enda nyemetak madahka kemaya nya nyadi.—Pemungkal 1:1.

Bup Kudus nadai madahka semua utai idup ba bumi ditempa dalam masa enam hari, enggau pemanjai 24 jam. Dalam Bup Kudus, leka jaku “hari” ulih mai reti timpuh ti panjai. Ambika chunto, Bup Kudus ngumbai awak ke dikena ngaga bumi enggau utai idup ba bumi digaga dalam timpuh enam “hari” ke disebut ba bup Pemungkal bagi 1, dikumbai satu “hari”, iya nya ‘lebuh [“hari,” NWT] Petara Jehovah * ngaga langit enggau dunya.’ (Pemungkal 2:4) Nya alai, ninting hari ke dikena Petara ngaga bumi ngambika ulih alai diau sereta nempa utai idup ke bukai, begunaka awak ti amat panjai.

Bup Kudus nadai madahka utai idup nya enda ulih berubah. Bup Pemungkal madahka, jelu ditempa nitihka “bansa jelu.” (Pemungkal 1:24, 25) Leka jaku “bansa” ke dikena dalam Bup Kudus ukai istilah sains, tang ulih mai reti kategori utai idup ke ulih mansang mayuh. Nya alai, siti “bansa” jelu ulih mai reti mayuh spesies. Leka jaku “bansa” dalam Bup Kudus mega enda nulak utai ke engka deka nyadi ngagai spesies jelu, ke engka ulih berubah tauka nyadi mayuh taja pan idup ba endur ti sama.

 Nama runding nuan?

Baka ke udah dipelajarka kitai tadi, Bup Kudus ulih ngambarka nya enggau senang sereta betul pasal pun penatai alam semesta, baka ni gaya bumi ba pun iya, sereta baka ni mayuh utai idup bisi ba bumi. Enti pia, kati Bup Kudus udah terang madahka sapa ke nempa semua tu? Encyclopædia Britannica nerangka, “Penemu pasal pengidup datai ari utai ke nyadi enggau luar biasa, sejalai enggau penemu sains kemayaharitu.” *