Bup Kudus nadai madah kemaya, sereta ni pengelama Petara ngaga dunya raya. Bup Kudus semina madah: ‘Ba pun iya kelia, lebuh Petara berengkah ngaga langit enggau dunya.’ (Pemungkal 1:1) Ari ayat tu, taja pan bisi leka jaku “berengkah” tang nya enda nyemetak madahka kemaya Petara belabuh ngaga dunya raya. Tang, kitai nemu Petara ngepunka pengawa nya sebedau enam hari tauka timpuh Iya ngaga semua utai.

•  Kati pemanjai enam hari tu dalam timpuh 24 jam?

•  Nama utai ke nyadi dalam timpuh enam hari nya?

•  Kati utai ke ditulis ba bup Pemungkal betul ba sains?

•  Kemaya mata panas, bulan sereta bintang digaga?

•  Nitihka penerang Bup Kudus, berapa umur bumi kitai?

 Ukai. Dalam Bup Kudus, leka jaku “hari” dikena nerangka sesiti timpuh ti bebida nitihka utai ke nyadi. Chunto, bisi ayat Bup Kudus ke ngambarka enam hari ke dikena Petara ngaga semua utai nya baka sehari aja.—Pemungkal 2:4.

 Petara ngubah “dunya endang apin bisi bakal tauka gamal,” nyadi siti endur alai mensia diau. (Pemungkal 1:2) Udah nya, Petara ngaga utai idup ba bumi. Ba baruh bisi nunjukka utai ke digaga Petara dalam timpuh enam hari nya:

•  Hari Kesatu: Petara meri penampak ngagai bumi. Asil iya, bumi bisi maya siang enggau maya malam.—Pemungkal 1:3-5.

•  Hari Kedua: Petara nyeraraka ai ti di atas ari ai ti di baruh.—Pemungkal 1:6-8.

•  Hari Ketiga: Petara ngaga darat sereta ngasilka mayuh utai tumbuh.—Pemungkal 1:9-13.

•  Hari Keempat: Petara ngaga mata panas, bulan sereta bintang. Semua utai tu tampak dipeda lalu ngelawaka bumi.—Pemungkal 1:14-19.

•  Hari Kelima: Petara ngaga utai idup dalam tasik, sereta utai terebai ba langit.—Pemungkal 1:20-23.

•  Hari Keenam: Petara ngaga jelu ke idup ba darat sereta mensia.—Pemungkal 1:24-31.

 Ba pengujung hari keenam nya, Petara belelak ari pengawa Iya, tauka ngetu ngaga utai.—Pemungkal 2:1, 2.

 Dalam Bup Kudus, enda nyemetak madahka baka ni pengawa Petara nempa dunya. Tang, pengawa nempa diterangka enggau chara ti senang dimeretika orang. Nyadi, semua orang ke macha, indah orang ke idup ba jeman Bup Kudus, mega ulih mereti ripih semua utai ditempa. Nambahka nya, semua penerang Bup Kudus enda kala ngelaban fakta ari sains. Nitihka utai ke ditulis Robert Jastrow: “Penerang iya engka enda sama. Tang asal iya, prinsip astronomi sama enggau utai ke dipadah ba bup Pemungkal; bisi utai ke nyadi sebedau mensia bisi, lalu utai nya nyadi tekala nya, ba siti maya ke udah ditetapka.”

 Bup Kudus nerangka, ‘ba pun kelia, Petara berengkah ngaga langit.’ (Pemungkal 1:2) Maya tu, mata panas, bulan enggau bintang endang udah bisi. Tang, atmosfera dunya agi tebal. (Pemungkal 1:2) Ba hari keterubah, semina mimit aja penampak ayan ke bumi. Tang, ba hari keempat, Bup Kudus madahka, penampak ke datai ari mata panas, bulan enggau bintang belabuh “manchar ngagai dunya.” Ketegal atmosfera ba bumi enda kelalu tebal maya tu, nyadi semua penampak nya ulih manchar enggau terang.—Pemungkal 1:17.

 Bup Kudus enda nyemetak madahka ni pengelama bumi tu udah bisi. Pemungkal 1:1 semina ngayanka pasal dunya raya nyengkaum bumi endur kitai diau tu, bisi pun. Penerang tu sejalai enggau fakta sains sereta pakar sains ke mansik pasal pengelama bumi udah ditempa.