Kati Petara Amat Ningaka Sampi Kitai?
Kala nuan berunding, kati Petara ningaka sampi nuan? Enti pia, ukai nuan aja baka nya. Mayuh orang kala besampi ngagai Petara pasal sesiti penanggul, tang penanggul nya tetap bisi. Kati reti iya, Petara enda ningaka sampi kitai? Ukai baka nya! Bup Kudus nerangka, Petara ningaka sampi enti kitai besampi enggau chara ti betul. Aram kitai meda penerang ari Bup Kudus.
PETARA NINGAKA SAMPI.
“Nuan nyaut sampi. Semua mensia deka datai ngagai Nuan.”—Masmur 65:2.
Sekeda orang besampi laban sida ngumbai nya ngasuh sida berasai nyamai agi, taja pan sida enda amat pechaya bisi orang ninga. Tang sampi ukai semina ngasuh kitai berasai nyamai lebuh napi penanggul. Bup Kudus bisi madahka, “Iya diau semak sida ke ngangauka Iya . . . enggau ati ti bendar. . . . Iya ninga sabak sida.”—Masmur 145:18, 19.
Kitai ulih andal, Petara Jehovah * deka ningaka sampi nembiak Iya. Enggau pengerindu Iya madahka: “Kita deka ngangauka Aku, datai lalu besampi ngagai Aku, lalu aku deka ninga kita.”—Jeremiah 29:12.
PETARA DEKA NUAN BESAMPI NGAGAI IYA.
“Majak besampi.”—Rome 12:12.
Nitihka Bup Kudus, kitai diperansang “seruran besampi” sereta ‘majak besampi.’ Terang amat Petara Jehovah deka kitai besampi ngagai Iya.—1 Tesalonika 5:17; Epesus 6:18.
Nama kebuah Petara deka kitai besampi ngagai Iya? Perundingka: Seiku apai tentu gaga ati lebuh anak iya ke agi mit minta tulung. Taja pan apai nya udah nemu utai ke diguna sereta asai ati anak iya, tang lebuh iya ninga peminta anak nya, tu nunjukka anak nya andalka iya lalu deka semak iya. Sama mega lebuh kitai besampi ngagai Petara Jehovah, kitai nunjukka diri andal sereta deka semak Iya.—Jaku Dalam 15:8; James 4:8.
PETARA AMAT IBUHKA NUAN.
“Serahka semua pengirau kita ngagai Iya, laban Iya ngibun kita.”—1 Peter 5:7.
Petara deka kitai besampi ngagai Iya laban Iya rindu sereta ibuhka kitai. Iya nemu penanggul sereta pengirau kitai, lalu deka nulung.
Sepemanjai pengidup Raja David, iya seruran besampi ngagai Petara Jehovah minta tulung lalu madahka asai ati sereta runding diri. (Masmur 23:1-6) Nama asai ati Petara ngagai David? Petara amat rinduka David lalu ningaka sampi Iya. (Kereja Rasul 13:22) Pia mega, Petara ningaka sampi kitai laban Iya ibuhka kitai.
‘AKU RINDUKA JEHOVAH, LABAN IYA UDAH NINGA AKU, ENGGAU SAMPI AKU’
Tu leka sampi seiku penulis bup Masmur dalam Bup Kudus. Iya amat andal, Petara ningaka sampi lalu tu ngeringka iya. Iya ngasaika diri semak agi ngagai Petara, lalu bulih peransang lebuh iya napi pemerinsa sereta penusah ati ba pengidup.—Masmur 116:1-9.
Enti kitai andalka Petara ninga sampi, kitai deka majak besampi ngagai Iya. Peratika utai ti nyadi ba Pedro, ke diau ba utara menua Sepanyol. Anak lelaki iya ke beumur 19 taun bebadi ketegal eksiden jalai alun. Pedro madahka asai ati ti balat tusah ngagai Petara, nengah sampi kena ngulihka pengelantang sereta sukung. Nyadi, nama diulih Pedro? Ku iya madahka, “Jehovah nyaut sampi aku lalu meri pengelantang sereta sukung ngagai kami duai bini aku nengah bala menyadi Kristian.”
Kesuah iya, sampi kitai disaut nengah sukung sereta tulung ari bala kaban ke ibuhka kitai
Taja pan anak lelaki Pedro enda ulih idup baru, tang sampi nulung Pedro sebilik bulih pengelantang. María Carmen, iya nya bini Pedro madahka: “Sampi nulung aku betan napi penusah ati. Aku nemu Petara Jehovah meretika asai ati aku laban lebuh aku besampi ngagai Iya, aku ngasaika pemaik sereta lantang agi.”
Bup Kudus enggau utai ke nyadi ba pengidup bukti Petara ningaka sampi. Taja pia, ukai semua sampi didinga Petara. Nama kebuah Petara nyaut sekeda sampi aja?
^ per. 6 Jehovah nya nama Petara ke bisi ayan ba Bup Kudus. Peda Jaku Penerang, genteran 3 ba Bup Kudus Baru.
Nuan Engka Rindu Meda Tu
MENARA JAGA
Kati Petara Deka Nyaut sereta Ninga Sampi Kitai?
SAUT NGAGAI TANYA PASAL BUP KUDUS
Kati Petara Deka Nulung Enti Aku Besampi?
Kati Petara amat ibuhka penanggul kitai?
