Au. Petara tentu nulung orang minta utai ti sejalai enggau peneka Iya. Taja pan nuan engka enda kala besampi, bisi mayuh chunto dalam Bup Kudus pasal orang ke minta tulung ngagai Petara ti ulih meransang nuan. Chunto iya:

•   ‘O Jehovah Petara aku. Selamatka aku ketegal pengerindu Nuan ti meruan belama iya!’—Masmur 109:26.

•   ‘Aku lemi sereta seranta, O Jehovah, tang Nuan nadai kala enda ingatka aku.’—Masmur 40:17.

 Endang amat, orang ke nulis ayat nya tentu orang ke ngembuan pengarap ti kering ngagai Petara. Tang, Petara ninga semua sampi orang ke datai semak ngagai Iya enggau tuju ti betul. Tu nyengkaum sida ke “tusah ati” tauka sida ke “nadai agi pengadang.”—Masmur 34:18.

 Anang meh ngumbai Petara nya kelalu jauh, nyentukka Iya enda ibuhka penanggul nuan. Bup Kudus madahka, ‘Laban taja pen Jehovah diau tinggi di atas, tang Iya ngintu orang ke baruh pendiau, lalu orang ke sumbung enda ulih belalai ari Iya.’ (Masmur 138:6) Jesus empu kala madahka nembiak iya, “Indah semua lambar buk ba pala kita deh udah diitung magang.” (Matthew 10:30) Petara beratika tiap pekara pasal nuan, indah nuan empu mega enda nemu. Nya alai, Iya tentu besedia sereta deka nulung enti nuan besampi madahka pasal pengirau nuan ngagai Iya.—1 Peter 5:7.