Pemandang 4:1-11
4 Udah nya, aku tepedaka siti pintu tebuka ba serega. Nyawa ti keterubah ke didinga aku ke baka bunyi terumpit bejaku ngagai aku: “Niki kitu! Aku deka nunjukka ngagai nuan utai ke mesti nyadi.”
2 Tekala nya, aku penuh laban kuasa kudus lalu aku meda siti kerusi diraja ba serega, lalu bisi orang benung duduk ba kerusi nya.
3 Iya ke duduk ba kerusi diraja nya beperenching baka batu jasper enggau batu sardius.* Kerusi nya dikelingi pelangi ke baka batu zamrud.
4 Ngelingi kerusi diraja nya bisi 24 iti kerusi diraja, lalu aku meda 24 iku bala tuai duduk ba kerusi nya. Sida ngena gari burak, lalu bisi makota emas ba pala sida.
5 Aku meda kilat manchar ari kerusi nya, lalu ninga bunyi nyawa enggau guntur pansut ari kerusi nya. Ba mua kerusi nya, bisi tujuh iti lampu ke bisi api ti mau, lalu nya ngambarka tujuh iti kuasa Petara.
6 Ba mua kerusi nya mega bisi utai ke baka tasik kacha ke baka kristal.
Kerusi nya ba tengah-tengah, lalu iya dikelingi empat iku melikat. Ba depan enggau ba belakang tubuh sida penuh enggau mata.
7 Melikat ti keterubah, baka gamal singa. Melikat ti kedua, baka gamal sapi lelaki ti biak. Melikat ti ketiga, baka gamal mensia. Lalu melikat ti keempat, baka gamal burung menaul ke terebai.
8 Tiap iku melikat nya bisi enam iti sayap ke penuh enggau mata ba semua begian. Siang malam sida terus madahka: “Kudus, kudus, kudus meh Petara Jehovah ke Pemadu Bekuasa, ke bisi suba, ke bisi diatu, sereta ke deka datai.”
9 Tiap kali bala melikat nya meri mulia, basa, enggau meri terima kasih ngagai Iya ke duduk ba kerusi diraja nya sereta ke idup belama iya,
10 semua 24 iku bala tuai deka besugang ba mua Iya ke duduk ba kerusi diraja nya, lalu nyembah Iya ke idup belama iya. Sida mega nikauka makota sida ke depan kerusi diraja nya, lalu madahka:
11 “Petara kami, Jehovah, Nuan endang layak nerima mulia, basa, enggau kuasa laban Nuan udah ngaga semua utai. Ketegal peneka Nuan, semua utai digaga lalu ketegal nya mega semua utai tau bisi.”
Nota Kaki
^ Tauka “batu berega ke bewarna mirah.”
