Satu Korint 16:1-24
16 Bekaul enggau ngumpul duit pemeri ke nembiak Petara ti kudus, kita ulih nitihka iring ke udah diberi aku ngagai bala raban gempuru ba Galatia.
2 Ba hari keterubah ninting minggu, tiap iku kita patut nyimpan mimit duit nitihka ulih siku-siku, ngambika kita enda ibuh ngumpul duit nya maya aku datai.
3 Lebuh aku datai din, aku deka ngasuh orang mai pemeri ke diberi kita enggau gerah jari ngagai Jerusalem. Sida ke dianjung aku nya orang ke dipilih kita, baka ke disebut ba surat kita.
4 Tang enti sema manah agi aku empu ke mansang kin, aku deka mupuk enggau sida.
5 Diatu, aku deka bejalai nengah Masedonia. Pengudah nengah Masedonia, aku deka datai betemu enggau kita.
6 Engka aku deka diau enggau kita enda lama. Engka sepemanjai musin chelap aku diau enggau kita. Udah nya, kita ulih bejalai enggau aku setengah jalai ngagai endur ke dituju aku.
7 Aku enggai betemu enggau kita enda lama aja. Aku ngarapka diri ulih diau lama agi enggau kita, enti Jehovah ngemendarka nya.
8 Tang aku deka diau ba Epesus nyentuk ngagai Pengerami Pentikos,
9 laban aku bulih peluang ti besai* alai ngereja pengawa nginjil. Taja pia, bisi mayuh orang ngelaban aku.
10 Lebuh Timoti datai, tentuka iya enda irau lebuh begulai enggau kita, laban iya mega ngereja pengawa ke Jehovah, baka aku.
11 Nya alai, anang nejuka sapa-sapa ngemaruhka iya. Tulung meh iya neruska pejalai iya enggau selamat, ngambika iya ulih datai ngagai aku, laban aku enggau bala menyadi ke bukai benung nganti iya.
12 Pasal menyadi kitai Apollos, aku udah bebendar ngasuh iya datai ngagai kita begulai enggau bala menyadi ke bukai. Tang, iya bedau deka mansang ngagai kita diatu. Lebuh iya bisi peluang, nya baru iya kin.
13 Awakka kita bejaga, bepegai rat ba pengarap kita, nyadi berani, sereta kering.
14 Kereja meh semua utai enggau pengerindu.
15 Bala menyadi, kita nemu sida Stepanas serumah meh ke nyadi murid Kristus ti keterubah ba Akaya. Sida ransing amat ngintu bala nembiak Petara ti kudus. Nya alai, tu meh utai ke diasuh aku gaga bala kita:
16 Terus meh nunduk ngagai orang ke baka sida sereta ngagai semua orang ke bebendar gawa begulai enggau kitai.
17 Taja pan kita nadai ba ditu, tang aku gaga ati laban bisi Stepanas, Fortunatus, enggau Akaius enggau aku.
18 Sida udah meransang aku enggau kita. Nya alai, kita patut beterima kasih laban bisi orang ke baka nya.
19 Bala raban gempuru ba Asia* ngirumka salam ngagai kita. Akuila enggau Priska* sereta bala menyadi ke begempuru ba rumah seduai iya mega ngirumka salam pengerindu Kristian ngagai kita.
20 Semua bala menyadi ngirumka salam ngagai kita. Sambut meh pangan diri enggau penuh pengerindu.*
21 Aku, Paul, ngirumka salam ngagai kita, lalu tu ditulis aku empu.
22 Awakka orang ke enda rinduka Tuan kena sumpah. O Tuan kami, datai meh nuan!
23 Ngarapka pemanah ati Tuan Jesus ti besai bisi enggau kita.
24 Aku rinduka semua kita ke beserakup enggau Jesus Kristus.
Nota Kaki
^ Jaku Asal, “laban pintu ti besai udah dibuka ke aku.”
^ Mega dikumbai Prisila.
^ Jaku Asal, “sium ti kudus.” Suba orang Kristian nyium pangan diri lebuh sida betemu.
