Satu Korint 11:1-34
11 Titihka meh teladan aku, baka aku ke nitihka teladan Kristus.
2 Aku muji kita laban kita seruran ingatka aku, lalu bepegai rat ba utai ke diajar aku ngagai kita.
3 Tang aku deka kita nemu, Kristus nya kepala tiap iku lelaki. Lelaki nya kepala indu, lalu Petara nya kepala Kristus.
4 Tiap iku lelaki ke nudung pala iya lebuh besampi tauka benabi ngemaluka pala iya empu.
5 Tang, tiap iku indu ke enda nudung pala lebuh iya besampi tauka benabi ngemaluka pala iya empu, laban iya sama baka indu ke udah dichukur pala.
6 Enti indu enda nudung pala, manah agi buk iya diguntin. Tang enti iya malu buk iya diguntin tauka pala iya dichukur, iya patut nudung pala iya.
7 Lelaki enda patut nudung pala, laban iya ngambarka Petara sereta mandangka mulia Petara. Tang indu mandangka mulia lelaki.
8 Tu ketegal lelaki ukai datai ari indu. Tang indu datai ari lelaki.
9 Nambahka nya, lelaki ukai digaga ketegal indu. Tang indu digaga ketegal lelaki.
10 Nya alai, ketegal bala melikat, indu patut nudung pala nyadika tanda iya nunduk ngagai kepala iya.
11 Kelimpah ari nya, ba raban gempuru Tuan kitai, lelaki begunaka indu, lalu indu begunaka lelaki.
12 Indu datai ari lelaki, lalu lelaki datai nengah indu. Tang semua utai datai ari Petara magang.
13 Perunding kediri empu: Patut indu enda nudung pala lebuh besampi ngagai Petara?
14 Nitihka gaya mensia digaga, enti lelaki panjai buk, endaka nya deka ngemaluka iya?
15 Tang enti indu panjai buk, endaka nya ngemuliaka iya? Nya ketegal indu diberi buk kena nudung pala iya.
16 Taja pia, enti bisi orang deka mantah pekara nya, lalu deka nitihka adat bukai, kitai nemu kitai nadai adat bukai. Pia mega enggau semua raban gempuru Petara.
17 Aku enda muji kita lebuh meri pesan tu, laban gempuru kita mai mayuh agi utai ke jai ari utai ke manah.
18 Keterubah, aku ninga kita bepechah-belah lebuh begempuru enggau bala menyadi. Ba aku, nya engka amat.
19 Ba bala kita, kita tentu bepechah-belah nyadi beberapa raban. Enggau nya, barang sapa entara kita ke diterima Petara deka nyata agi dipeda.
20 Lebuh kita begempuru ba siti-siti endur, kita ukai amat-amat deka ngintu Makai Malam Tuan.
21 Lebuh kita ngintu nya, sekeda ari kita udah dulu makai malam. Nya alai, bisi sekeda ari kita nya lapar, lalu sekeda agi udah mabuk.
22 Endaka kita bisi rumah kediri empu alai kita makai enggau ngirup? Tauka, kati kita enggai bebasaka raban gempuru Petara, lalu deka ngemaluka sida ke seranta? Nama patut disebut aku ngagai kita? Patut aku muji kita? Ba pekara tu, aku enda muji kita.
23 Aku ngajar kita utai ke diterima aku ari Tuan kitai. Ba malam Tuan Jesus diserahka ngagai munsuh, iya ngambi roti.
24 Pengudah besampi meri terima kasih, iya mechahka roti nya lalu bejaku: “Roti tu ngambarka tubuh aku, ke deka diserahka ke kita. Terus meh ngereja tu kena ngingatka aku.”
25 Pia mega, pengudah sida makai malam, iya ngambi mangkuk lalu madahka: “Mangkuk tu ngambarka sempekat baru, ke ditanggam ngena darah aku. Terus meh ngereja tu kena ngingatka aku, tiap kali kita ngirup ari mangkuk tu.”
26 Nya alai, tiap kali kita makai roti nya enggau ngirup ari mangkuk nya, kita benung madah pasal pemati Tuan kitai nyentuk ke iya datai.
27 Nyadi, enti orang ke enda layak makai roti nya tauka ngirup ari mangkuk Tuan kitai, iya udah bedosa ngagai tubuh enggau darah Tuan kitai.
28 Orang patut nentuka diri layak dulu sebedau iya ulih makai roti nya enggau ngirup ari mangkuk nya.
29 Enti orang makai enggau ngirup, tang iya enda meretika utai ke digambarka tubuh Tuan kitai, iya ngukum diri empu.
30 Ketegal nya, mayuh ari bala kita lemi, sakit, lalu benung mati.*
31 Tang enti kitai udah nentuka diri layak, kitai enda diakim.
32 Taja pia, lebuh kitai diakim, kebendar iya, Jehovah benung disiplin* kitai ngambika kitai enda diukum begulai enggau dunya tu.
33 Nya alai, bala menyadi, lebuh kita begempuru makai maya pengawa nya, kita patut nganti pangan diri.
34 Enti bisi bala kita ke lapar, sida patut makai dulu ba rumah, ngambika kita enda diukum lebuh kita begempuru. Pasal pekara bukai, aku deka mutarka nya lebuh aku datai kia ila.
