Adam enggau Awa mensia keterubah ke bedosa. Sida enda ngasika pesan Petara ti nagang sida makai “buah ari kayu penemu”, lalu nya meh asal iya dosa berengkah. a (Pemungkal 2:16, 17; 3:6; Rome 5:19) Pun kayu nya ngambarka hak Petara ti ulih netapka standard moral. Reti iya, semina Petara aja ke ulih nentuka utai ti betul tauka salah. Tang maya sida enggai ngasika pesan nya, tu nunjukka enggau terang, sida enda bebasa sereta nulak hak Petara ti patut netapka standard ba pengidup mensia.

•  Ketegal dosa tu, nama penyadi ngagai Adam enggau Awa?

•  Nama mega nyadi ngagai kitai ketegal dosa tu?

•  Kati kitai ulih bibas ari dosa tu?

•  Salah penemu pasal “penatai dosa”

 Ketegal Adam enggau Awa bedosa, sida nyadi tuai lalu ngujungka sida mati. Kaul sida enggau Petara mega rusak. Sida mega lenyau peluang idup belama iya, sereta nadai ngembuan pengerai ti manah.—Pemungkal 3:19.

 Ketegal Adam enggau Awa bedosa, semua peturun tauka purih iya mega sama bedosa. Tu sempama penyakit ke datai ari peturun. (Rome 5:12) Nya alai, semua mensia endang diadaka enggau dosa. b Reti iya, kenyau ari ada, kitai endang sigi enda sempurna, lalu senang ngereja penyalah.—Masmur 51:5; Epesus 2:3.

 Ketegal enda sempurna, kitai ulih nyadi sakit, tuai, lalu mati. (Rome 6:23) Kitai mega ulih merinsa ketegal penyalah diri empu tauka penyalah orang bukai.—Pengajar 8:9; James 3:2.

 Ulih. Bup Kudus madahka, Jesus mati ketegal iya deka nebus kitai ari dosa. (1 John 4:10) Nya alai, tebus Jesus ulih ngelepaska kitai ari dosa. Nambahka nya, tebus tu muka baru peluang ke kala dikembuan Adam enggau Awa suba, iya nya idup belama iya sereta ngembuan pengerai ti sempurna.—John 3:16. c

 Salah penemu: Ketegal dosa tu, kitai enda ulih bisi kaul ti manah enggau Petara.

 Fakta: Petara enda nyalahka kitai ketegal dosa Adam enggau Awa. Petara nemu kitai enda sempurna, lalu Iya mega enda minta lebih ari ke ulih kitai. (Masmur 103:14) Taja pan kitai merinsa ketegal dosa Adam, kitai bisi peluang sereta nerima basa laban kitai ulih ngembuan kaul ti manah enggau Petara.—Jaku Dalam 3:32.

 Salah penemu: Enti kitai dibaptisa, kitai ulih bibas ari dosa. Nya kebuah, anak mit ke baru ada pan dibaptisa.

 Fakta: Amat, kitai patut dibaptisa ngambi ulih selamat. Tang, utai ke ulih ngelepaska kitai ari dosa, semina pengarap kitai ngagai tebus Jesus. (1 Peter 3:21; 1 John 1:7) Lalu enti deka bisi pengarap ke baka nya, kitai patut nemu reti Jaku Petara dalam Bup Kudus. Nya alai, anak mit ke baru ada tentu bedau nemu reti Jaku Petara, lalu tentu bedau bisi pengarap. Nya kebuah, maptisa anak mit ke baru ada nya ukai ajar ari Bup Kudus. Indah, orang Kristian kelia pan enda maptisa anak mit ke baru ada, tang sida maptisa “lelaki enggau indu” ke bisi pengarap ngagai Jaku Petara ba Bup Kudus.—Kereja Rasul 2:41; 8:12.

 Salah penemu: Petara nyumpah orang indu, laban Awa meh keterubah makai buah nya.

 Fakta: Iya ke disumpah Petara ukai indu, tang “ular ti tuai, ti dikumbai Antu tauka Sitan.” Laban iya meh ke ngasuh Awa ngereja dosa. (Pemandang 12:9; Pemungkal 3:14) Nambahka nya, iya ke balat agi dipesalahka ketegal mensia bedosa nya Adam, ukai Awa.—Rome 5:12.

 Nama kebuah Petara madahka Adam deka nguasa bini iya? (Pemungkal 3:16) Leka jaku tu ukai nunjukka Petara setuju enti Adam nguasa bini iya. Tang, Iya semina nerangka, ketegal dosa, kaul ba entara laki bini mega deka bisi penanggul. Iya ke bendar, Petara dekaka laki rindu sereta bebasaka bini iya,, pia mega semua orang indu ke bukai.—Epesus 5:25; 1 Peter 3:7.

 Salah penemu: Dosa tu bekaul enggau seks.

 Fakta: Dosa tu nadai bekaul enggau seks, laban:

•   Maya Petara nagang Adam makai buah ari pun penemu nya, Adam bedau bisi bini.—Pemungkal 2:17, 18.

•   Petara dekaka Adam enggau Awa ‘beranak betelesak lalu ngemenuhka dunya.’ (Pemungkal 1:28) Enti Petara ngukum sepasang mensia keterubah nya enggau chara ngasuh sida ngereja perintah tu, Iya Petara ti amat jai. Tang, Iya ukai baka nya, laban Iya Petara ti pengerindu.

•   Awa dulu bedosa, udah nya baru Adam.—Pemungkal 3:6.

•   Bup Kudus nadai ajar ti nagang laki bini bisi seks enggau pangan diri.—Jaku Dalam 5:18, 19; 1 Korint 7:3.