John 8:12-59
8 12 Udah nya, Jesus lalu bejaku baru ngagai sida: “Aku tu meh penampak dunya. Barang sapa ke nitihka aku enda bejalai dalam pemetang, tang deka bulih penampak ke meri pengidup.”
13 Nya alai, orang Parisi bejaku ngagai iya: “Nuan meri saksi pasal diri empu. Nya alai, saksi nuan nya bula.”
14 Ku Jesus nyaut sida: “Taja pan aku meri saksi pasal diri empu, saksi ke diberi aku nya amat, laban aku nemu ari ni penatai aku sereta kini ke penunga aku. Tang kita enda nemu ari ni penatai aku sereta kini ke penunga aku.
15 Kita ngakim nitihka runding mensia, tang aku enda ngakim sapa-sapa.
16 Enti aku ngakim, aku ngakim enggau lurus, laban aku enda kediri, tang Apai ke ngirumka aku bisi enggau aku.
17 Pia mega, endang udah ditulis ba Adat kita: ‘Enti dua iku orang meri saksi, saksi nya amat.’
18 Aku meri saksi pasal diri empu, lalu Apai ke ngirumka aku mega meri saksi pasal aku.”
19 Ku sida bejaku ngagai iya: “Dini Apai nuan?” Ku Jesus nyaut: “Kita enda ngelala aku tauka Apai aku. Enti kita ngelala aku, kita mega tentu ngelala Apai aku.”
20 Iya bejaku munyi nya lebuh ngajar ba Rumah Sembiang, semak enggau tabung duit. Tang nadai orang nangkap iya, laban maya iya bedau datai.
21 Ku iya madah baru ngagai sida: “Aku deka mupuk, lalu kita deka ngiga aku. Tang kita deka mati dalam dosa kita. Kita enda ulih datai ngagai endur ke dituju aku.”
22 Ku orang Judah bejaku: “Kati iya deka munuh diri? Laban iya madahka, ‘Kita enda ulih datai ngagai endur ke dituju aku.’”
23 Ku iya bejaku: “Kita datai ari baruh, tang aku datai ari atas. Kita datai ari dunya tu, tang aku ukai datai ari dunya tu.
24 Nya alai, aku madah ngagai kita: Kita deka mati dalam dosa kita. Enti kita enda arap aku meh orang ke disemaya nya, kita deka mati dalam dosa kita.”
25 Sida pan nanya iya: “Sapa nuan?” Ku Jesus nyaut: “Nama meh aku bejaku enggau kita?
26 Aku bisi mayuh utai ke patut dipadahka pasal kita, lalu aku bisi mayuh utai ke patut diakim. Kebendar iya, nama-nama utai ke disebut aku nya didinga aku ari Iya ke ngirumka aku ke dunya. Lalu Iya seruran nyebut utai ti bendar.”
27 Sida enda nemu iya benung bejaku pasal Apai.
28 Udah nya, Jesus madahka: “Pengudah kita nuatka* Anak Mensia, kita deka nemu aku meh iya, lalu aku enda ngereja nama-nama utai nitihka peneka aku empu. Nama-nama utai ke diajar Apai ngagai aku, nya meh utai ke disebut aku.
29 Iya ke ngirumka aku bisi enggau aku. Iya enda ninggalka aku kediri, laban aku seruran ngereja utai ke ngelantangka ati Iya.”
30 Mayuh orang arapka iya maya iya nyebut semua tu.
31 Udah nya, Jesus bejaku ngagai orang Judah ke arapka iya: “Enti kita seruran nitihka ajar aku, kita amat murid aku.
32 Kita deka nemu pemendar, lalu pemendar deka ngelepaska kita.”
33 Ku sida madahka: “Kami peturun Abraham. Kami enda kala nyadi ulun sapa-sapa. Nya alai, baka ni ku nuan tau madahka, ‘Kita deka dilepaska’?”
34 Ku Jesus nyaut: “Enggau bendar aku madah ngagai kita: Tiap iku orang ke ngereja dosa deka nyadi ulun dosa.
35 Nambahka nya, ulun enda diau ba rumah tuan iya belama iya. Tang anak deka diau ba rumah nya belama iya.
36 Nya alai, enti Anak ngelepaska kita, kita amat-amat lepas.
37 Aku nemu kita peturun Abraham, tang kita deka munuh aku, laban kita enda nerima utai ke diajar aku.
38 Aku nyebut pasal utai ke dipeda aku lebuh aku enggau Apai, tang kita ngereja utai ke didinga kita ari apai kita.”
39 Ku sida bejaku: “Apai kami Abraham.” Ku Jesus madahka: “Enti kita anak Abraham, kita tentu ngereja utai ke digaga Abraham.
40 Tang diatu, kita deka munuh aku taja pan aku madahka pemendar ke didinga aku ari Petara. Abraham enda ngereja utai ke baka nya.
41 Kita ngereja utai ke digaga apai kita.” Ku sida nyaut: “Kami ukai anak ke enda sah.* Kami bisi siku Apai, iya nya Petara.”
42 Ku Jesus madah ngagai sida: “Enti Petara nya Apai kita, kita tentu rinduka aku, laban aku dikirumka Petara kitu. Aku ukai datai ketegal peneka aku empu, tang ketegal Iya ngirumka aku.
43 Kita enda meretika utai ku aku, laban kita enggai nerima jaku aku.
44 Kita datai ari apai kita, Sitan,* lalu kita ingin deka ngereja peneka apai kita. Iya nyadi pemunuh, kenyau ari maya iya bula pasal Petara.* Iya enda bepegai tegut ba pemendar, laban pemendar nadai ba dalam iya. Enti iya bula, nya endang sigi ulah iya, laban iya nya pemula sereta apai semua pemula.
45 Tang aku madahka utai ti amat. Nya alai, kita enda arapka aku.
46 Sapa entara kita ke ulih nunjukka* aku tu bedosa? Enti aku nyebut utai ti amat, nama kebuah kita enda arapka aku?
47 Orang ke datai ari Petara ningaka jaku Petara. Kita enggai ninga, laban kita enda datai ari Petara.”
48 Nya alai, orang Judah bejaku ngagai iya: “Endang amat utai ku kami, ‘Nuan tu orang Samaria lalu dirasuk melikat ti jai.’”
49 Ku Jesus nyaut: “Aku enda dirasuk melikat ti jai. Aku bebasaka Apai aku, tang kita enda bebasaka aku.
50 Aku enggai ngemuliaka diri empu, tang Iya ke benung ngakim deka ngemuliaka aku.
51 Enggau bendar aku madah ngagai kita: Barang sapa ke nitihka jaku ajar aku, iya enda mati.”
52 Orang Judah bejaku ngagai iya: “Diatu kami nemu, nuan sigi amat dirasuk melikat ti jai. Abraham udah mati, pia mega enggau sida nabi. Tang nuan madahka, ‘Barang sapa ke nitihka jaku ajar aku, iya enda mati.’
53 Kati nuan besai agi ari apai kami, Abraham? Abraham udah mati. Sida nabi mega udah mati. Sapa nuan nya ku nuan?”
54 Ku Jesus nyaut: “Enti aku ngemuliaka diri empu, mulia nya nadai reti. Iya ke ngemuliaka aku nya Apai aku, ke dikumbai kita Petara kita.
55 Kita enda ngelala Iya, tang aku ngelala Iya. Enti aku madahka diri enda ngelala Iya, aku deka nyadi pemula, baka kita. Tang aku amat ngelala Iya, lalu nitihka jaku Iya.
56 Apai kita, Abraham, balat gaga laban iya bisi peluang meda hari penatai aku. Iya udah meda nya, lalu iya gaga ati.”
57 Nya alai, orang Judah madah ngagai iya: “Umur nuan bedau agi 50 taun, tang nuan udah meda Abraham?”
58 Ku Jesus nyaut: “Enggau bendar aku madah ngagai kita: Sebedau Abraham ada, aku endang udah bisi.”
59 Nya alai, sida ngambi batu kena nuku Jesus. Tang Jesus belalai lalu pansut ari Rumah Sembiang.
Nota Kaki
^ Jaku Asal, “ngangkat tinggi.”
^ Tauka “anak ke diadaka ketegal ulah seks ti kamah.” Jaku Gerika, “por·nei′a.” Peda Penerang Leka Jaku.
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Tauka “kenyau ari pun.”
^ Tauka “meri bukti.”
