Siti ari utai ke digaga orang Israel kelia kena nyukung sembah ngagai Petara, iya nya meri pemeri sepuluh peratus a. Petara ngasuh sida: “Serahka pemeri sepuluh peratus kita ari utai ti diketau kita tiap taun.”—Ulang Adat 14:22

 Pesan tu sebagi ari Adat Moses, iya nya, undang-undang ke diberi Petara ngagai bansa Israel kelia. Orang Kristian nadai agi di baruh Adat moses nya, nya alai, sida enda dipejal meri pemeri sepuluh peratus nya. (Kolosi 2:13,14) Ari ke dipejal meri pemeri sepuluh peratus, genap iku orang Kristian ‘patut meri nitihka pemutus runding diri, ukai enggau ati ti lembau, tauka ari pejal, laban Petara rinduka orang ke meri enggau ati ti gaga.’—2 Korint 9:7

•  Pemeri Sepuluh Peratus dalam Bup Kudus—“Sempekat Lama”

•  Pemeri Sepuluh Peratus dalam Bup Kudus—“Sempekat Baru”

 Begian Bup Kudus ke dikumbai Sempekat Lama ngundan beberapa ayat ke nerangka pasal pemeri sepuluh peratus. Kesuah iya, Bup Kudus madahka pasal pemeri sepuluh peratus pengudah Adat Moses diberi ngagai bansa Israel. Tang, sekeda ayat madahka pasal atur tu sebedau jeman Moses.

Sebedau Adat Moses Diberi

 Orang keterubah dalam Bup Kudus ke meri pemeri sepuluh peratus nya Abram (iya nya, Abraham). (Pemungkal 14:18-20; Hebrew 7:4) Ke ditemu kitai, pemeri sepuluh peratus ari Abram nya diberi sekali aja ngagai Melkisedek, ke nyadi imam enggau raja Salem. Bup Kudus nadai madah pasal Abraham tauka bala anak iya meri pemeri sepuluh peratus baru udah nya.

 Orang kedua dalam Bup Kudus ke meri pemeri sepuluh peratus nya uchu Abraham, Jakop. Iya besemaya enggau Petara, enti Petara merekatka iya, iya deka meri “sepuluh peratus” ari semua utai ke diulih iya. (Pemungkal 28:20-22) Sekeda pakar Bup Kudus ngumbai Jakop ngamatka semaya iya ari meri sepuluh peratus ari jelu tupi iya nyadika pemeri tunu. Taja pan Jakop agi ditanggam ngena semaya iya, tang iya enda ngarapka ruang bilik iya ke bukai disengkaum ba semaya nya.

Baruh Adat Moses

 Orang Israel kelia diasuh meri pemeri sepuluh peratus ngambika melanja pengawa bekaul enggau sembah ngagai Petara.

•   Orang ke gawa penuh jam dalam langkau kain Petara, iya nya, orang Lewi, nyengkaum bala imam, nadai ungkup tanah alai sida ulih bumai. Nya alai, pemeri sepuluh peratus ke diberi nya nyadika utai kena sida beridup. (Penyampau 18:20,21) Orang Lewi ke enda nyadi imam, nerima pemeri sepuluh peratus ari orang Israel bukai. Ari utai ke diterima sida, sida patut meri sepuluh peratus ti pemadu manah ari semua pemeri nya ngagai bala imam.—Penyampau 18:26-29.

•   Orang Israel engka meri pemeri sepuluh peratus nya dua kali dalam setaun. Kali kedua nya mai penguntung ngagai orang Lewi, enggau sida ari raban bansa bukai mega. (Ulang Adat 14:22,23) Maya pengerami ti spesial, semua ruang bilik ba menua Israel ulih makai enggau ngirup ari pemeri sida empu, lalu bisi mega sekeda taun ti ditetapka alai pemeri nya deka diberi ngagai orang ke seranta kena sida beridup.—Ulang Adat 14:28, 29; 26:12.

 Baka ni penyampau pemeri nya diitung? Orang Israel diasuh nyerahka sepuluh peratus ari semua asil ari tanah sida. (Adat Lewi 27:30) Enti sida deka agi meri duit ari ke meri utai tumbuh, sida patut mayar rega, ukai 10 peratus, tang 12 peratus. (Adat Lewi 27:31) Sida mega diasuh meri “seiku ari sepuluh iku jelu tupi.”—Adat Lewi 27:32.

 Kena netapka ni bagi jelu tupi sida deka diberi, orang Israel milih tiap jelu ti ke-sepuluh ke pansut ari kandang jelu. Di baruh Adat Moses, sida enda tau ngerintai tauka nganti jelu ke dipilih nya, tauka meri duit nganti rega jelu nya. (Adat Lewi 27:32,33) Tang, pemeri sepuluh peratus ti kedua kali - iya ke dikena maya pengerami besai - nya ulih ditukar ngagai duit. Atur tu digaga ngambika ngenyenangka pejalai sida ke datai ari jauh ngintu pengerami besai.—Ulang Adat 14:25, 26.

 Ni maya orang Israel meri pemeri sepuluh peratus? Orang Israel meri pemeri tu ninting taun. (Ulang Adat 14:22) Tang, tiap taun ti ke-tujuh nya lain. Nya meh taun sabat, alai orang Israel enda tau bumai tanah. (Adat Lewi 25:4, 5) Ketegal sida nadai ngulihka asil baka taun ke bukai, sida enda diasuh meri pemeri sepuluh peratus maya musin ngetau. Dalam timpuh tujuh taun, kena taun ti ke-tiga enggau ke-enam, orang Israel meri pemeri sepuluh peratus ke-dua nya ngagai orang ke seranta enggau orang Lewi.—Ulang Adat 14:28, 29.

 Nama ukum ngagai sida ke enda meri pemeri sepuluh peratus? Adat Moses nadai netapka ukum ke orang ti enda meri pemeri sepuluh peratus. Sida meri pemeri tu, ukai ketegal sida takut diukum, tang laban sida nemu nya utai ti patut dikereja sida. Pengudah meri pemeri nya, sida deka nyebut di mua Petara, sida udah meri pemeri sepuluh peratus nya, lalu minta berekat ari Iya. (Ulang Adat 26:12-15) Petara ngumbai sida ke enda meri pemeri sepuluh peratus nya baka ke ngerumpak Iya.—Malaki 3:8, 9.

 Kati atur pemeri sepuluh peratus nya ma ti berat ba sida? Enda. Petara besemaya, enti sida meri pemeri sepuluh peratus, iya deka meri berekat ngagai sida nyentukka sida nadai suntuk utai. (Malaki 3:10) Tang lebuh sida enggai meri pemeri sepuluh peratus, sida deka merinsa. Sida lenyau berekat ari Jehovah sereta nadai bulih penguntung ari pengawa bala imam enggau orang Lewi ke enda diibuhka sida.—Nehemiah 13:10; Malaki 3:7.

 Lebuh Jesus idup ba dunya, orang Israel agi diasuh meri pemeri sepuluh peratus. Tang, atur tu diketuka pengudah Jesus mati.

Maya Jeman Jesus

 Ari begian Bup Kudus ke dikumbai Sempekat Baru, kitai nemu orang Israel neruska adat pemeri sepuluh peratus indah maya Jesus bisi ba dunya. Jesus ngaku atur nya agi patut dititihka sida, tang iya nganu bala tuai pengarap Judah ke nitihka adat nya enggau terit, tang “enggai ngereja utai ti beguna agi dalam Adat, baka pengelurus, pengasih enggau pengarap.”—Matthew 23:23.

Pengudah pemati Jesus

 Orang nadai agi diasuh meri sepuluh peratus pengudah Jesus mati. Pemati Jesus nya muai Adat Moses, nyengkaum adat “ngumpul pemeri sepuluh peratus.”—Hebrew 7:5, 18; Epesus 2:13-15; Kolosi 2:13, 14.