Kati Jesus Mati ba Regang?

TEBAH

Saut ari Bup Kudus

Mayuh orang ngumbai regang nya tanda agama Kristian ti pemadu nyulut. Taja pia, Bup Kudus nadai madah enggau nyemetak pasal perengka ke dikena munuh Jesus. Nya alai, nadai orang amat-amat nemu pasal gamal utai nya. Taja pia, Bup Kudus bisi bukti ti nunjukka Jesus mati ba tiang ti lurus, ukai ba regang.

Kesuah iya, Bup Kudus ngena leka jaku stau·rosʹ dalam jaku Gerika lebuh madahka pasal perengka ke dikena munuh Jesus. (Matthew 27:40; John 19:17) Taja pan mayuh salin Bup Kudus nyalin leka jaku tu “regang,” tang mayuh pakar setuju, stau·rosʹ mai reti “tiang ti lurus.” a Nitihka bup A Critical Lexicon and Concordance to the English and Greek New Testament, leka jaku stau·rosʹ “ukai reti iya dua batang kayu digaga melintang.”

Bup Kudus mega ngena leka jaku xyʹlon dalam jaku Gerika ke sebaka enggau leka jaku stau·rosʹ. (Surat Kereja Rasul 5:30; 1 Peter 2:24) Leka jaku tu mai reti “kayu,” “tiang,” tauka “pun kayu.” b Bup The Companion Bible nyimpulka: “Nadai utai ke disebut dalam jaku Gerika ba [Sempekat Baru] ke ngambarka dua batang kayu” ti dijantilka.

Enti ngena tanda regang maya besembayang, kati Petara deka nerima nya?

Siti crux simplex. Dalam jaku Latin, nya siti tiang ti lurus ke dikena maya mantang penjenayah

Enda ngira nama gaya perengka ke dikena munuh Jesus, utai ke ba baruh tu nunjukka kitai enda patut ngena tanda regang kena nyembah Petara.

Petara enda nerima sembah kitai enti ngena gambar tauka tanda, nyengkaum regang. Petara madahka ngagai orang Israel, sida enda tau ngena “nama-nama lambang” ba sembah sida, lalu orang Kristian diasuh “rari ari pengawa nyembah engkeramba.”—Ulang Adat 4:15-19; 1 Korint 10:14.
Orang Kristian abad keterubah enda ngena tanda regang ba sembah sida. c Semua orang Kristian patut nitihka ajar sereta teladan bala rasul.—2 Tesalonika 2:15.
Pengawa sembah ti ngena tanda regang bepun ari pengarap ke ukai Kristian. d Beratus taun pengudah pemati Jesus, gerija udah limpang ari ajar iya. Nyadi maya nya, lebuh orang pengarap bukai deka nyadi Kristian, sida “dikemendarka terus ngena tanda enggau lambang pengarap lama sida” nyengkaum tanda regang. (The Expanded Vine’s Expository Dictionary of New Testament Words) Taja pia, Bup Kudus enda nyagi orang Kristian ngena lambang pengarap bukai kena narit ati orang masuk pengarap Kristian.—2 Korint 6:17.

a Peda New Bible Dictionary, Edisi Ketiga, diedit D. R. W. Wood, lambar 245; Theological Dictionary of the New Testament, Jilid VII, lambar 572; The International Standard Bible Encyclopedia, Edisi Diaduka Baru, Jilid 1, lambar 825; enggau The Imperial Bible-Dictionary, Jilid II, lambar 84.

b Peda The Expanded Vine’s Expository Dictionary of New Testament Words, lambar 1165; A Greek-English Lexicon, ditulis Liddell enggau Scott, Edisi Kesemilan, lambar 1191-1192; enggau Theological Dictionary of the New Testament, Jilid V, lambar 37.

c Peda Encyclopædia Britannica, 2003, ba baruh tajuk “Cross”; The Cross—Its History and Symbolism, lambar 40; enggau The Companion Bible, Oxford University Press, appendiks 162, lambar 186.

d Peda The Encyclopedia of Religion, Jilid 4, lambar 165; The Encyclopedia Americana, Jilid 8, lambar 246; enggau Symbols Around Us, lambar 205-207.