Surat Kereja Rasul 4:1-37
4 Bala imam, ketuai jejaga Rumah Sembiang, enggau orang Saduki, datai ngagai Peter enggau John, lebuh seduai iya benung bejaku ngagai orang mayuh.
2 Sida pedis ati laban dua iku rasul nya ngajar orang mayuh, lalu terus terang madah ngagai orang Jesus udah diidupka baru ari mati.
3 Nya alai, sida nangkap Peter enggau John lalu ngejil seduai iya nyentuk ngagai hari siti, laban maya nya hari nyauka malam.
4 Taja pia, mayuh orang arap pengudah ninga utai ke diajar seduai iya, lalu penyampau orang lelaki ke arap nambah nyadi kira-kira 5,000 iku orang.
5 Hari siti, bala tuai bansa orang Judah enggau bala penulis Adat begelumu ba Jerusalem.
6 Anas, iya nya tuai imam, Kaiapas, John, Aleksander, enggau kaban belayan tuai imam, mega bisi ba dia.
7 Sida ngasuh Peter enggau John bediri ba mua sida lalu nanya: “Ngena kuasa nama tauka dalam nama sapa seduai ngereja utai tu?”
8 Nya alai, Peter ke penuh laban kuasa kudus Petara lalu bejaku ngagai sida:
“Bala ketuai,
9 enti seharitu kita nanya kami duai pasal pengawa ti manah ke digaga kami duai ngagai lelaki ke mati kaki tu, lalu kita deka nemu sapa ke ngeraika iya,
10 kami duai deka madah ngagai kita sereta semua orang Israel: Lelaki tu gerai dalam nama Jesus Kristus, orang Nasaret nya. Kita ngukum bunuh iya ba tiang, tang Petara udah ngidupka iya baru ari mati. Nengah Jesus meh lelaki tu gerai sereta bediri ba mua kita.
11 Jesus meh ke disebut ba ayat tu: ‘Bala tukang rumah, batu ke dikumbai kita enda beguna udah nyadi batu sukut ti pemadu beguna.’
12 Kelimpah ari nya, semina nengah Jesus, orang ulih diselamatka, laban nadai nama bukai ba baruh langit sereta ba bala mensia ke udah dipilih Petara kena nyelamatka kitai.”
13 Sida iran ati meda pemerani Peter enggau John, laban sida nemu seduai iya orang biasa aja sereta ukai orang ke bepelajar.* Lalu sida mega sedar seduai iya kala begulai enggau Jesus.
14 Tang lebuh sida meda lelaki ke udah digeraika nya bediri enggau Peter seduai John, sida enda tepansutka jaku.
15 Nya alai, sida ngasuh tiga iku nya pansut ari Balai Raban Kunsil Orang Judah. Udah nya, sida berandau enggau pangan diri:
16 “Nama patut digaga kitai enggau sida? Semua orang ke diau ba Jerusalem nemu sida udah ngereja pengawa ajih ke ngalitka ati, lalu kitai nadai jalai deka nyangkal utai nya.
17 Tang ngambika pekara tu enda majak ngelekai ba bala orang mayuh, aram kitai ngenakutka* sida, lalu ngasuh sida badu agi bejaku enggau sapa-sapa dalam nama orang nya.”
18 Nya alai, sida ngangauka Peter enggau John, lalu ngasuh seduai iya badu agi nyebut nama-nama utai tauka ngajar orang dalam nama Jesus.
19 Tang ku Peter enggau John nyaut sida: “Ba mata Petara, sekalika kami patut ngasika kita ari ke ngasika Petara, barang ku kita meh berundingka nya.
20 Tang kami enda ulih ngetu bejaku pasal utai ke udah dipeda sereta didinga kami.”
21 Nya alai, pengudah ngenakutka* dua iku rasul nya baru, sida ngelepaska seduai iya laban sida nadai tetemuka penyalah ti tau ngasuh seduai iya diukum. Nambahka nya, sida takutka orang mayuh ke muji Petara pengudah meda utai ke nyadi nya.
22 Orang ke digeraika nengah kereja ajih nya, beumur lebih ari 40 taun.
23 Pengudah Peter enggau John dilepaska, seduai iya mupuk ngagai bala murid ke bukai lalu madahka utai ti udah disebut bala tuai imam enggau bala tuai bansa orang Judah.
24 Pengudah ninga nya, semua sida begulai besampi enggau nyawa ti inggar ngagai Petara:
“Tuan ti Pemadu Tinggi, Nuan meh ke ngaga langit, dunya, tasik, enggau semua utai dalam nya.
25 Ngena kuasa kudus Nuan, Nuan kala bejaku nengah mulut aki kami David, ke mega ulun Nuan: ‘Nama kebuah orang ari bemacham bansa pedis ati? Nama kebuah orang ari serata menua berundingka utai ti nadai guna?
26 Bala raja ba dunya besedia deka beperang, lalu bala pemerintah begempung deka ngelaban Jehovah sereta orang ke dipilih* Iya.’
27 Nya endang amat. Laban Herod* enggau Pontius Pilate sereta bansa Israel enggau bansa bukai udah begempuru ba nengeri tu lalu ngelaban Jesus, ulun Nuan ti kudus ke udah dipilih* Nuan.
28 Semua sida begempuru ngereja utai ke udah ditetapka Nuan. Pekara tu nyadi laban Nuan bisi kuasa, lalu utai nya sejalai enggau peneka Nuan.
29 Tang diatu, O Jehovah, dingaka meh jaku ugut* sida, lalu tulung meh ulun Nuan ngambika terus nusui jaku Nuan enggau berani.
30 Terus meh ngunjurka jari Nuan kena ngeraika mayuh macham penyakit sereta gaga meh kereja ajih enggau tanda dalam nama Jesus, ulun Nuan ti kudus.”
31 Pengudah sida bebendar besampi, endur sida begempuru nya lalu berenyang. Semua sida penuh laban kuasa kudus Petara, lalu sida belabuh nusui jaku Petara enggau berani.
32 Semua sida ke arap sama seati enggau sama runding. Nadai siku pan ngumbai utai ti dikemisi sida nya semina diempu sida kediri. Tang sida bekunsika semua utai ke dikemisi sida enggau pangan diri.
33 Nambahka nya, bala rasul terus meri saksi pasal pengangkat Tuan Jesus ari mati enggau chara ti amat mujur. Nya alai, semua sida bulih pemanah ati Petara ti besai enggau chukup mayuh.
34 Nadai siku pan ari sida suntuk utai ke diguna. Semua sida ke bisi ladang tauka rumah nyual reta sida, lalu duit ke diulih sida
35 diberi ngagai bala rasul. Udah nya, duit nya dibagi ngagai tiap iku orang nitihka utai ke diguna siku-siku.
36 Bisi siku lelaki ke benama Josep. Iya ari peturun Lewi ke datai ari Saiprus. Bala rasul mega ngangauka iya Barnabas (ke mai reti, “Orang ke Mai Pengelantang”).
37 Iya nyual tanah iya lalu meri duit nya ngagai bala rasul.
Nota Kaki
^ Iya nya, enda belajar ba sekula pengarap orang Judah. Ukai reti nya, enda nemu macha.
^ Tauka “ngugut; ngemba.”
^ Tauka “ngugut; ngemba.”
^ Tauka “sereta Kristus.” Jaku Asal, “ke ditata.” Peda Penerang Leka Jaku, “Tata.”
^ Iya nya, Herod Antipas. Peda Penerang Leka Jaku.
^ Jaku Asal, “ditata.” Peda Penerang Leka Jaku, “Tata.”
^ Tauka “jaku emba.”
