Nama Patut Digaga Nuan Enti Deka Nemu Mayuh Agi Pasal Bup Kudus?

TEBAH

Saut ari Bup Kudus

Bup Kudus bisi nerangka chara deka nemu utai ke ditulis dalam nya. Enda ngira baka ni chara pengidup nuan, utai ke ditulis dalam Bup Kudus “ukai utai ti kelalu mar dititihka kita, tauka enda ulih dijengkau kita.”—Ulang Adat 30:11.

Nuan patut

Ngembuan ulah ti betul. Nuan patut nerima Bup Kudus nya Jaku Petara. Kelimpah ari nya, ayanka ulah ti baruh ati laban Petara enda rinduka orang ke sumbung. (1 Tesalonika 2:13; James 4:6) Anang semina pechayaka utai ti dibacha tauka utai ti didinga nuan aja, tang nadai mansik. Laban Petara dekaka nuan berunding enggau dalam pasal utai ke dikearapka nuan.—Rome 12:1, 2.
Sampi minta penemu-dalam. Jaku Dalam 3:5 madahka, “Anang manggaika diri ba penemu diri empu.” Tang terus meh minta penemu-dalam ngagai Petara.—James 1:5.
Belajar enggau tetap. Nuan deka bulih mayuh penguntung enti nuan belajarka Bup Kudus enggau tetap.—Josua 1:8.
Belajar nitihka topik. Siti chara kena belajarka Bup Kudus enggau manah iya nya, mansik nya nitihka topik. Nuan ulih berengkah enggau batang ajar, udah nya enggau naka ulih belajarka utai nya enggau dalam agi. (Hebrew 6:1, 2) Nuan ulih mandingka siti ayat Bup Kudus enggau ayat ke bukai. Enggau chara nya, nuan ulih nemu, ayat nya ulih nerangka ayat ke bukai, nyengkaum ayat ke tusah.—2 Peter 3:16.
Ngiga bantu ari orang bukai. Bup Kudus meransang kitai ngiga bantu ari orang ke bepenemu agi pasal Bup Kudus. (Kereja Rasul 8:30, 31) Saksi-Saksi Jehovah bisi program belajarka Bup Kudus enggau pechuma. Baka orang Kristian abad kesatu, sida ngena ayat Bup Kudus kena nulung orang bukai pasal utai ti bendar diajar Bup Kudus.—Kereja Rasul 17:2, 3.

Nuan enda ibuh

Nyadi orang ke pandai tauka bepelajar tinggi. Dua belas iku rasul Jesus nemu reti ayat dalam Bup Kudus, lalu ngajar nya ngagai orang bukai. Taja pan sekeda ari sida “ukai orang ke bepelajar, tang orang ke sengapa-dia.”—Kereja Rasul 4:13.
Beduit. Nuan ulih belajarka Bup Kudus enggau pechuma. Jesus madahka bala murid iya, “Kita udah nerima ngena chara pechuma, nya alai beri ngena chara pechuma.”—Matthew 10:8.