Kati anak nuan rindu agi macha bup tauka ari keretas tauka nengah perengka elektronik?

 Mayuh bala nembiak rindu agi macha nengah perengka elektronik. Dr. Jean M. Twenge nulis, “Ba generasi ke udah teleba klik tauka scroll ke lambar nangkannya dalam beberapa saat aja, bup enda ulih narit minat sida.” a

 Macha nengah perengka elektronik endang amat bisi pemanah iya. John, ke beumur 20 taun madahka, “Sekula aku suba ngena bup-bup elektronik. Tu ngenyenangka aku bulih penerang enggau jampat.”

 Ba orang ke macha nengah perengka elektronik, mayuh chara jampat ke ulih dikena sida. Chunto iya, sida semina patut klik tauka nekan skrin kena ngiga reti sesiti jaku, tauka ngulihka penerang bukai. Tang, kati reti iya macha nengah bup tauka keretas kurang meri penguntung?

 Sekeda orang rindu agi macha nengah bup tauka keretas ke diprint maya belajarka sesiti pelajar enggau dalam. Nama kebuah?

•   Fokus. Seiku nembiak ke benama Nathan madah, “Maya aku benung macha nengah perengka elektronik, mayuh iklan tama ke ngachau aku ari fokus.”

   Karen, ke beumur 20 taun mega napi penanggul ti sama. Ku iya madah, “Enti aku macha ari hp tauka tablet, aku enda ulih fokus. Aku engka muka aplikasi bukai tauka main game.”

   Prinsip Bup Kudus: “Kita enda tau enda pintar lebuh . . . ngena semua peluang kita.”—Kolosi 4:5.

   Uji pikir: Kati anak nuan nemu nagang diri enti bisi utai ngachau sida maya benung macha tauka belajar ngena perengka elektronik? Enti enda, baka ni chara nuan ulih nulung sida fokus maya belajar?

   Tip: Padahka meh ngagai anak nuan, enti sida enda ulih fokus ketegal mayuh utai ke dipeda ba perengka elektronik sida, jam alai iya nembuka kereja rumah nya deka nyadi panjai agi. Lalu, awak ke dibasau nya ulih dikena iya ngereja pengawa ke dikerinduka iya.

•   Pemahaman. Jaku ke diambi ari bup Be the Parent, Please madahka, “Mayuh uji kaji digaga ti nunjukka, orang ke macha ari bup tauka ari keretas ke diprint lebih senang faham dibandingka ari orang ke macha nengah perengka elektronik.”

   Siti ari kebuah nya ketegal orang ke macha nengah perengka elektronik macha enggau ngelansa aja, sida enda macha enggau silik. Seiku penulis ke benama Nicholas Carr madah, “Maya ngena Internet, kitai ka ngumpul mayuh penerang enggau naka penyampat.” b

   Kekadang, macha enggau ngelansa aja pan bisi pemanah iya. Tang, baka ku Carr tadi, chara macha ke baka tu “udah nyadi trend orang kemayaharitu.” Kesan iya, anak nuan engka teleba macha enggau jampat tang enda faham enggau utai ke dibacha iya.”

   Prinsip Bup Kudus: “Enti nuan ngiga utai, giga runding ti dalam.”—Jaku-Dalam 4:7.

   Uji pikir: Enda ngira nya nengah perengka elektronik tauka ari utai ke diprint, baka ni nuan ulih nulung anak mansik sesiti topik enggau dalam?

   Tip: Patut nemu sapa anak nuan enggau dalam sereta tatak iya. Nuan enda ibuh semina nentuka siti aja chara macha. Kedua-dua chara nya sama bela bisi pemanah iya. Sekeda chara ngena perengka elektronik ulih nulung kitai faham agi pasal sesiti utai enggau senang. Nya kebuah, peratika meh tatak anak nuan maya berandauka pemanah sereta pengelemi chara tu. Kingatka mega, tiap iku anak enda sama sereta bisi keistimewaan sida empu.

•   Ni pengelama nuan ingatka utai ke dibacha. Ba siti artikel ke dikeluarka Scientific American, Ferris Jabr madahka, macha nengah perengka elektronik engka “ngasuh untak kitai jampat lelak . . . lalu ngasuh kitai tusah ka ingatka utai ke dibacha.”

   Ngambika chunto, macha ari bup ke diprint nulung nuan ingatka sesiti penerang, laban nuan ingat dini alai nuan meda penerang nya ba lambar ke udah dibacha. Tu sempama nyimpan “penanda buku” dalam untak lalu ulih dikingatka baru dudi hari.

   Nambahka nya, bala pemansik mega udah tetemuka bukti, orang ke macha ari bup ke diprint ulih ingatka penerang nya enggau manah agi. Tu ketegal, sida belajarka penerang nya enggau manah agi.

   Prinsip Bup Kudus: “Anak, bepegai erat ba penemu-dalam enggau ba penalam runding nuan. Anang nejuka sida ninggalka nuan.”—Jaku-Dalam 3:21.

   Uji pikir: Kati anak nuan tusah faham tauka ingatka utai ke dibacha sereta dipelajarka iya? Enti au, nama chara ke ulih dikena nuan nulung iya? Kati bup ke diprint ulih nulung iya agi?

   Tip: Peratika asil ari chara anak nuan belajar, ukai semina chara ke dikerinduka iya kena belajar. Suah iya, orang ngumbai sida faham agi enggau utai ke dibacha enti sida macha nya ari perengka elektronik. Tang, penemu tu enda selalu betul sereta ngena ba semua orang.