Enti diasuh milih, ni bagi ke dipilih anak nuan? Meda video tauka macha? Kati sida rindu agi megai talipun tauka bup?

 Bepuluh taun udah belalu, majak mayuh orang enda rindu macha. Nama kebuah? Laban, bisi TV sereta utai ke ngagitka ati, chunto iya online. Ba bup Endangered Minds, ke ditulis Jane Healy ti dikeluarka kena 1990 madahka, “Enda lama da agi, orang engka ngetu macha.”

 Maya iya nulis tu, jaku ke disebut iya tu baka ke bula. Tang diatu, mayuh pemansik ba menua ti mayuh pemansang berati, kemayaharitu bala anak mit nyau majak kurang lanchar macha.

Ba artikel tu

•  Nama kebuah macha penting ba bala anak?

•  Chara ngemansangka tebiat macha

•  Runding apai indai

•   Macha ulih meransang sida ngambarka sesiti utai. Orang ke nulis ulih ngenataika sekeda penerang. Tang, orang ke macha patut ngambarka cherita penuh nya kediri empu. Ngambika chunto, kati bunyi nyawa watak nya? Baka ni gamal iya? Baka ni gamal utai ke bisi dalam cherita nya?

   “Lebuh kitai meda cherita, kitai benung meda utai ke digambarka orang bukai,” ku seiku indai ke benama Laura. “Nya endang best. Tang best agi enti kitai empu ngambarka utai ke ditulis.”

•   Macha ulih ngemansangka ulah ti manah. Lebuh bala anak macha, sida ulih ngasuh runding sida kreatif lalu ulih mutarka penanggul. Nambahka nya, macha ngasuh sida fokus. Tu ngajar sida enda limpang, sabar, nemu nagang diri, sereta siru.

   Nama kebuah macha tau ngasuh siru? Bala pemansik pechaya, maya bala anak enda begaut macha, sida ulih ngasaika watak dalam cherita nya. Tu nulung sida ngemansangka ulah ti siru ba pengidup.

•   Macha ulih meransang berunding enggau dalam. Orang ke macha enggau bejimat sigi enda beguai, lalu sida engka ngulang baru ba sekeda begian ngambika ulih faham agi jalai cherita nya. Tu ngasuh utai ke dibacha sida lekat agi, lalu sida belajar ari utai ke dibacha sida.—1 Timoti 4:15.

   Seiku apai ke benama Joseph madah, “Lebuh macha, nuan ulih berundingka jaku dalam ba cherita nya, ngaitka cherita nya enggau utai ke ditemu nuan, lalu belajar. Tang maya meda video, kitai enda ibuh kelalu balat berunding.”

 Nyadika simpul: Video enggau utai ke ulih dipeda enda bula manah, tang bala anak deka rugi enti jarang macha.

•   Berengkah ari mit. Chloe, ngembuan dua iku anak lelaki. Ku iya, “Indah maya anak aku agi dalam kandung, kami udah macha ke sida. Kami neruska tebiat tu nyentukka sida ada. Diatu, sida amat rindu macha.”

   Prinsip Bup Kudus: “Kenyau ari nuan agi mit, endang udah nemu Bup Kudus.”—2 Timoti 3:15.

•   Endur ti ngena. Tentuka bup nya senang diambi. Tamara ke ngembuan empat iku anak madahka, “Giga meh bup ke dikerinduka anak nuan, lalu tepu nya ba endur ke semak katil iya.”

   Prinsip Bup Kudus: “Ajar anak mit jalai idup, nya baru sida deka ingatka ajar nya seumur idup.”—Jaku Dalam 22:6.

•   Mesti natak sida ngena Internet. Seiku apai ke benama Daniel netapka, bisi siti lemai nadai ngena perengka eletronik. Ku iya, “Taja pan kami ngereja tu sekali seminggu, tang nya meh maya kami macha begulai tauka kediri, lalu nadai meda TV.”

   Prinsip Bup Kudus: “Nemu milih utai ti pemadu badas.”—Pilipi 1:10.

•   Nyadi teladan ti manah. Karina, seiku indai ke bisi dua iku anak indu madahka, “Bacha meh enggau pengabis ati lalu asuh cherita nya idup. Tu ulih meransang sida ka agi macha. Enti nuan rindu macha, engka sida pan deka neladan nuan.”

   Prinsip Bup Kudus: ‘Bacha di mua orang mayuh.’—1 Timoti 4:13.

 Amat, ukai semua anak rindu macha. Tang, peransang ari nuan ulih mai kesan ti positif ngagai sida. David, seiku apai ke bisi dua iku anak indu, naka ulih nulung anak iya. Ku iya, “Aku ka nemu nama utai ke dikerinduka anak aku, lalu nama utai ke ulih dikerandauka kami. Nyadi, aku macha bup ke dibacha sida. Indah, kami bisi kelab macha kediri empu. Endang best!”