INDU ove poo umwe wovasuverwa woye tja munikwa kutja u nomutjise omuzepe, tjiri tji rira otjiṋa otjikendise. Kombanda yanao, omundu ngu ri mongaro ndji, u hakahana okupindika, nu u kurungisiwa tjimanga poo u kara nomerikendero. Omundu u yenena okukara nemuma nomerikendero, indu tji ma sokukahakaena nonganga poo tji pe hi nomapangero omasemba poo ovimariva, poo omauzeu nge etwa i omiti nozopera nḓu ma ungurisa. Omeripura otja ingo ngu maye tjama nomutjise ye tjita kutja omundu ma kare mozombameno.

Hapo ombatero yokutjinda omitjise matu ka isapi? Ovengi va muna omahuhumiṋino mokuriyameka ku  Mukuru mongumbiro, nokulesa omatjangwa omahuhumiṋe mOmbeibela. Otjiṋa tjarwe tji matji yenene okutuvatera okutjinda omutjise, orusuvero nombatero okuza komaṱunḓu nomapanga wetu.

Robert, wozombura 58 wa tja: “Kara nongamburiro mu Mukuru, nu Eye me ku vatere okutjinda omutjise woye mbo. Kumba ku Jehova, nu mu raera ozombameno zoye. Ningira ombepo Ye ondjapuke, nu mu ningira kutja me ku vatere kutja u kare noumune ouwa, nokuyanḓiparisa eṱunḓu roye, nu nge ku pe omasa wokutjinda omutjise woye noupore.”

“Tjiri otjiṋa otjiwa tjinene indu eṱunḓu roye tji ma ri ku vatere momiano avihe. Eyuva arihe mbi tonenwa ongoze i omundu umwe poo vevari nu ve ndji pura kutja, ‘Wa penduka vi ndino?’ Nu wina mbi muna omahuhumiṋino okuza komapanga wandje mbe ri kokure. Owo tjiri ve ndji pa omasa kutja ehe rihahiza.”

Indu tji mokavarura omundu ngwa vera, yandja ombango komambo wa Linda nga: “Ouatjiri kutja omuvere u zera okuhupa tjimuna ovandu avihe, nu kaaruhe tji ma vanga okuhungira ohunga nomutjise we. Kunao hungira ohunga noviṋa vyarwe.”

Nombatero okuza ku Mukuru nomatunduuziro okuza mOmatjangwa, na wina ombatero okuza komaṱunḓu nomapanga, eṱe matu yenene okukara nongamburiro yokutja ohepero okuhupa, nandarire kutja tu tjinda omutjise omuzeu.