EPURIRO 1
Owami uṋe?
OVE OTJO TJITA VI?
Ripurira kongaro ndji: Ngunda Karen ngu ri kehi yozombura e ri popati oure wozominute ozonḓiṱi uriri, eye wa zuva eraka ndaa tjiwa nawa.
“Ongwaye tji wa kurama erike?”
Karen wa tanauka na tara kepanga re Jessica ngwa ri nomakende yevari wombira. Jessica wa ṱiza ekende rimwe momurungu waKaren okuzambo a tja: “Kaove omuṱiṱi tjinene okunwa nu, poo vi?”
Karen kaa vanga okukambura ekende, posiya Jessica epanga re. Nu kaa vanga kutja epanga re ri mune kutja eye katjiwa okurya otjimuinyo. Kombanda yanao, Jessica iumwe wovanatje ovakazona mbe novikaro oviwa. Neye tji ma nu, okutja katjiṋa otjivi tjinene. Karen otje rihungirira omuini kutja, ‘Okambira kemwe uriri, kavipurukise.’
Andakuzu ove wa ri mongaro yaKaren, otjo tjita vi?
KURAMA NU U RIPURE!
Kutja u yenene okutoora omukambo omusemba mongaro otja indji, ove mo hepa okuritjiwa omuini nawa. Okuritjiwa omuini nawa ku heya okuritjiwa kutja oove uṋe nokutja u nongurameno iṋe. Okukara nondjiviro ndji ku kupa omasa wokutya ehupo roye omuini moruveze rwokuyandjera varwe okukutyera po.—1 Ovakorinte 9:26, 27.
Mo yenene vi okukara nomasa wokutjita nao? Okuzira omapuriro ngu maye kongorere mba, omuano omuwa wokuuta okutjita nao.
1 OVIKEṊA MBI MBI UNGURA NAWA?
Tji wa tjiwa oviṋa mbi u yenena okuungura nawa novikaṋena vyoye oviwa ku kurisa ongamburiro yoye move omuini.
OTJIHORERA TJOMBEIBELA: Omuapostele Paulus wa tja: “Nandarire kutja ngahino owami omuhinamirya mokuhungira, imwi mondjiviro mbi nomirya.” (2 Ovakorinte 11:6) Mena rokutja wa ri nondjiviro ombwa yOmatjangwa, Paulus wa yenena okukara nongurameno indu varwe tjaave mu toko. Eye kena pa yandjera kutja omambo wawo omavi ye ngundiparise ongamburiro ndja ri na yo mu ye omuini.—2 Ovakorinte 10:10; 11:5.
RIKONḒONONA OMUINI: Tjanga otjiyandjewa tjimwe tji u na tjo poo otjiṋa tji we rihonga okutjita nawa.
Nambano tjanga otjikaṋena otjiwa tji u na tjo. (Okutara kotjihorera, oove omundu ngu rikendera kovandu? Oove ondjandje? Ovandu ve yenena okuṱaṱera kove? Oove omuṱakame?)
2 MBI NOUNGUNDIPARE WAYE?
Ongaro yomundu i yenena okurunduruka tjimanga nai rire ombi, indu tji ma yandjere kutja oungundipare we arire mbwa hongorere ehupo re.
OTJIHORERA TJOMBEIBELA: Paulus aa tjiwa oungundipare we. Eye wa tja: “Moukoto wongaro yandje oini ami mbi muna mo orutjato momatwako waNdjambi. Nungwari ami mbi rimuna kutja mouṋepo worutu rwandje mu nomatwako warwe, nge rwisa omatwako nga nge ri momutima wandje. Owo ye ndji isa po omupandekwa womatwako wouvi nge ungura mouṋepo worutu rwandje.”—Ovaroma 7:22, 23.
RIKONḒONONA OMUINI: Oungundipare waye ove mbu u hepa okuungurira ko?
3 MBI NOZONDANDO ZAYE?
Ove mape ya orondo motjihauto noraere omuhinge kutja nga kondoroke omuvanda povikando ovingi nga omaze wotjihauto tji yaanda? Tji wa tjiti nao mo raisa ouyova nu mo morosa ovimariva!
Matu rihongere ko tjike? Tji u nozondando mehupo roye, maze ku vatere kutja u kare nomuhunga. U tjiwa kutja mo i pi nu u kara nondjiviro yokutja mo vaza vi koṋa ngo.
OTJIHORERA TJOMBEIBELA: Paulus wa tja: “Ami opu me zu okutupuka otja omundu ngu hi nokutupuka ohei uriri.” (1 Ovakorinte 9:26) Moruveze rwokuhupa uriri nokuhina ozondando, Paulus we rizikamisira ozondando na hupu otja ku zo.—Ovafilipi 3:12-14.
RIKONḒONONA OMUINI: Tjanga ozondando 3 nḓu mo vanga okuyenenisa mombura ndji mai yende.
4 MBI KAMBURA MU YE?
Tji u ritjiwa omuini nawa, mo sana komuti mbu nomize vyomasa nu mbu yenena okutjinda ovivepo ovinamasa
Tji u ha tjiwa kutja u kambura mu ye, ove komoo kara nongurameno. Mo sana kesembi ndi rundurura otjivara tjaro otja koviṋa mbi ri ongondoroka na ro. Nu ihi otjiraisiro tjokutja ko ritjiwa omuini nawa.
Indu ovitjitwa vyoye tji vi hongorerwa i oviṋa mu u kambura, matji raisa kutja u ritjiwa omuini nawa, nu komoo yandja ombango koviṋa ovandu varwe mbi mave tjiti.
OTJIHORERA TJOMBEIBELA: Omuprofete Daniel ngahino ngunda a ri omutanda, “we rimana kutja” eye ma kara nonḓuviro komatwako waMukuru nandarire kutja wa ri kokure novanene ve. (Daniel 1:8) Mokutjita nao, eye wa raisa kutja wa ri nongurameno. Daniel aa hupu otja koviṋa maa kambura mo.
RIKONḒONONA OMUINI: Ove u kambura mu ye? Okutara kotjihorera: Ove u kambura mu Mukuru? Tji pe ri nao, omena raye? Otjikeṋa tji tji kupa ongamburiro kutja Mukuru okeri?
Ove u kambura kutja omirari Mukuru mbye tu pa ohunga nongaro yomeritjindiro vi eta ouwa kove omuini? Tji pe ri nao, omena raye?
Komaandero weyuva, ove otjo vanga okurira omundu ngu ri tjimuna otjiyaya tji tji vingwa i ombepo koṋa akuhe ku mai vanga, poo omuti mbu ha kurakurisiwa i otjiṋa nandarire i otjivepo otjinamasa tjinene? Kondja okuritjiwa omuini nawa, nu mo sana komuti mbwo. Tji wa tjiti nao maku ku vatere okuzira epuriro ndi, Owami uṋe?
Mo yenene okutara ku imbi wina
OZOVIDIO OZOPERENDWA
O yandjere kutja ovakweṋu ve ku ṋiṋikize!
Omikambo vine mbi mavi yenene okukuvatera okutwapo ozondando zoye omuini.
