Ripurira kongaro ndji: Julia tji me ritara motjispili, u muna kutja wa ṋuna tjinene. Nandarire kutja ovanene ve nomapanga we ve mu raera kutja eye u “nerambu,” Julia u ripura kutja, “Me sokuisako orutu kaṱiṱi.”

Nai Julia wa utire okuripura kutja ma sokutoora omikambo vyapeke kutja ma “iseko ozokilo 2.” Otjiṋa tji ma hepa okutjita okuriṱisa ondjara oure womayuva omaṱiṱi uriri . . .

Ove tji u noumune tjimuna owaJulia otjo tjita vi?

Kanavi okurikenda nombuniko yoye. Ombeibela nandarire i tanga ovarumendu novakazendu tjiva mba ri nombuniko ombwa tjimuna Sara, Rahel, Abigajil, Josef na David. Ombeibela i tja omukazendu wena Abisag wa ri “omuwa tjinene.”—1 Ozombara 1:4.

Posi yokutja, omitanda omingi vi yandja ombango tjinene kombuniko yawo. Otjiṋa hi tji eta omauzeu omanene. Ripurira ku imbi:

• Momakonḓononeno yemwe, ozoperesende 58 zovanatje ovakazona aave rimunu kutja va ṋuna tjinene, ngunda e ri ozoperesende 17 uriri mba ṋunine tjiri.

• Momakonḓononeno warwe, ozoperesende 45 zovakazendu mba rambukire aave ripura kutja va ṋuna tjinene!

• Mozongondjero zawo zokuisako orutu, omitanda tjiva vya kavera omutjise mbu isanewa o-anorexia. Owo omutjise omuzepe wokuritjaerera owina kovikurya.

 Tji u novikaṋena vyomutjise mbwi poo ongaro yarwe yokuhina okuvanga okurya, paha ombatero. Hungira ku nomunene woye poo omundu warwe omunene ngu u kambura mo. Ombeibela mai tja: “Epanga aruhe ri raisa orusuvero rwaro; nungwari omuangu nerumbi ve riraisa moruveze rwombamisiro.”—Omiano 17:17.

Otjiṋa otjinanḓengu tji tji nana varwe komundu, ouwa womoukoto. Tara kotjihorera tjomuzandu wOmbara David wena Absalom. Ombeibela mai tja:

“Nu moIsrael arihe kamwa ri omurumendu ngwa tjuṋikwa otja Absalom mena rouwa wombunikiro ye. Eye kari notjipo okuza kombaze nga kotjiuru.”—2 Samuel 14:25.

Posi yokutja omuzandu ngwi wa ri omuritongamise, wa ri nozondando ozombi nu wa ri novineya! Mena roviṋa mbi, Ombeibela kai hungire oviṋa oviwa ohunga na Absalom. Oyo i hungira ohunga na ye otja omurumendu ngu ha ri nouṱakame, ngwa ri nonyengo nomuzepe.

Kunao, Ombeibela i tu pa omurari omusemba mbwi:

‘Rihwikikeye omundu omupe.’—Ovakolose 3:10.

‘Eṋe amu zara omizaro ongongo. Moruveze rwanao ouwa weṋu ngau rire ouwa watjiri womoukoto womundu.’—1 Petrus 3:3, 4.

Nandarire kutja kanavi okuvanga okumunika nawa, otjiṋa otjinanḓengu tjinene pombuniko yoye otjikaro tjoye. Komaandero weyuva, ovikaro oviwa ombi mavi tjiti kutja varwe ve ku suvere, nungwari kamuhapo omuwa poo ouwa womurungu! Omukazona wena Sofia wa tja: “Ouwa womomurungu u nana ombango yovandu tjimanga, posi yokutja ovikaro vyoye ombi zemburukwa tjinene i ovandu.”

Hapo omuano mbu u munika u ku tjatera?

Ove wa rora okuripura ohunga nokukeriṱunisa ombuniko yoye poo okuriṱisa ondjara kutja u rambuke?

Otjikeṋa tjo tjo rundurura korutu rwoye andakuzu mo yenene okutjita nao? (Toorora mbyo tjo vanga okurundurura.)

• OURE

• OHAVEHA

• OZONDJISE

• OMUHAPO

• OMURUNGU

• OTJIVARA

Ndovazu wa tja ii komapuriro yevari inga omatenga nu wa toorora oviṋa 3 poo kombanda yanao pepuriro oritjatatu, tjiwa kutja: Ovandu kave ku munu momuano omuvi mu u ri muna omuini. Oupupu okuuta okuvanga okutoora omikambo vyapeke kutja u rundurure ombuniko yoye nokurikenda tjinene ohunga nombuniko yoye.—1 Samuel 16:7.