Եհովան երկիրը տվել է մարդկությանը։ Սա մեր տունն է։ Ադամն ու Եվան չէին ստեղծվել, որ նրանց միջոցով բնակեցվեր երկինքը։ Երկնքում ապրելու համար Աստված արդեն ստեղծել էր հրեշտակներին (Հոբ 38։4, 7)։ Աստված առաջին մարդուն բնակեցրեց մի սքանչելի պարտեզում, որը կոչվում էր Եդեմ (Ծննդոց 2։15–17)։ Եհովան Ադամին ու իր սերունդներին տվեց երկրի վրա անվերջ ապրելու հեռանկարը։ Կարդա՛ Սաղմոս 37։29; 115։16։

Սկզբում երկրի վրա միայն Եդեմի պարտեզն էր դրախտ։ Առաջին մարդկային զույգը պետք է լցներ երկիրը իր սերունդներով։ Ժամանակի ընթացքում նրանք պետք է բնակվեին ողջ երկրի վրա և այն դրախտի վերածեին (Ծննդոց 1։28)։ Երկիրը երբեք չի կործանվելու. այն միշտ լինելու է մարդկանց տունը։ Կարդա՛ Սաղմոս 104։5։

Դիտեք «Ինչո՞ւ է Աստված ստեղծել երկիրը» տեսանյութը։

Ադամն ու Եվան չհնազանդվեցին Աստծուն, ուստի նա դուրս հանեց նրանց Եդեմի պարտեզից։ Դրախտը կորած էր. ոչ ոքի չի հաջողվել վերականգնել կորածը։ Աստվածաշունչն ասում է. «Երկիրը ամբարշտի ձեռքն է տրվել» (Հոբ 9։24)։ Կարդա՛ Ծննդոց 3։23, 24։

Արդյոք մարդկության առնչությամբ Եհովայի նպատակը ձախողվե՞ց։ Ո՛չ. նա ամենակարող է, և միշտ իրականացնում է իր նպատակները (Եսայիա 45։18)։ Անկասկած, հեզ մարդիկ կապրեն դրախտ-երկրի վրա, ինչպես որ սկզբից նպատակադրել էր Աստված։ Կարդա՛ Սաղմոս 37։11, 34։

Երկրի վրա դրախտը կվերականգնվի, երբ Հիսուսը՝ որպես Աստծու նշանակած Թագավոր, սկսի իշխել երկրի վրա։ Արմագեդոն պատերազմի ժամանակ նա կառաջնորդի Աստծու հրեշտակներին և կվերացնի բոլոր նրանց, ովքեր հակառակվում են Աստծուն։ Դրանից հետո Հիսուսը 1000 տարով կբանտարկի Սատանային։  Աստծու ժողովուրդը կվերապրի այդ կործանումից, քանի որ Հիսուսը կառաջնորդի և կպաշտպանի նրանց։ Դրախտ-երկրի վրա նրանք կվայելեն հավիտենական կյանքը։ Կարդա՛ Հայտնություն 20։1–3; 21։3, 4։

Ե՞րբ է Աստված վերջ դնելու երկրի վրա տիրող տառապանքին։ Հիսուսը վերջին օրերը բնորոշելու համար «նշան» տվեց։ Աշխարհի ներկայիս պայմանները սպառնում են մարդկության գոյությանը, և դա ցույց է տալիս, որ ապրում ենք այն ժամանակահատվածում, որը կոչվում է «աշխարհի վախճան»։ Կարդա՛ Մատթեոս 24։3, 7–14, 21, 22։

Հիսուսը իր հազարամյա իշխանության ընթացքում երկնքից կիշխի երկրի վրա և իսպառ կվերացնի ամեն տեսակ տառապանք (Եսայիա 9։6, 7; 11։9)։ Նա ոչ միայն Թագավոր է լինելու, այլև գործելու է որպես Քահանայապետ և մաքրելու է նրանց մեղքերը, ովքեր սիրում են Աստծուն։ Այսպիսով Աստված Հիսուսի միջոցով վերջ կդնի հիվանդություններին, ծերությանը և մահին։ Կարդա՛ Եսայիա 25։8; 33։24։

Այն մարդիկ, ովքեր հնազանդվում են Աստծուն, կապրեն դրախտում (1 Հովհաննես 2։17)։ Հիսուսը ուղարկեց իր հետևորդներին, որ փնտրեն խոնարհ մարդկանց և սովորեցնեն նրանց, թե ինչպես կարող են հաճեցնել Աստծուն։ Այսօր Եհովան միլիոնավոր մարդկանց պատրաստում է այն դրախտային կյանքին, որ հաստատվելու է երկրի վրա ապագայում (Սոփոնիա 2։3)։ Եհովայի վկաների Թագավորության սրահներում մարդիկ սովորում են լինել ավելի լավ ամուսիններ ու հայրեր և ավելի լավ կանայք ու մայրեր։ Երեխաներն ու ծնողները միասին երկրպագում են Աստծուն և սովորում են, թե ինչպես կարող է բարի լուրը նպաստել իրենց կյանքի բարելավմանը։ Կարդա՛ Միքիա 4։1–4։