«Neʼets kin edhaʼ [an tsemélomchik].» (Hechos 24:15, An it jilchith cau.)

Tam jún i yanél ka tsemets neʼets ki elaʼ i tolmixtaláb abal tu ku jeldhanchij an yajal ti ichích (2 Corintios 1:3, 4).

Yabáts neʼets ki koʼoy jún i jikʼeltaláb kʼadhpidh kʼal an tsémláj (Hebreos 2:15).

Neʼets ki koʼoy jún i chubax aychixtaláb, abal neʼets ku wichiy ku elaxin kʼal i yanél axi tsémenek (Juan 5:28, 29).

Antsanaʼ, neʼets ki tsuʼuw expidh óx i tʼiplab:

• A Dios játs an Tsʼejkom kʼal an ejataláb. An Biblia in ulal abal a Jehová «tu pidhál i ejataláb ani i ixakʼ. Ani patal jawaʼ i kwaʼal játs jajáʼ axi tu pidhál» (Hechos 17:24, 25; Salmo 36:9). Max in ejtow kin pidhaʼ i ejataláb an atiklábchik, lej chubax in ejtowal kin wíchbanchij in ejatal axi tsémenek.

• A Dios in tsʼakbamalits i atiklábchik. An Biblia in ólnál waxik i atiklábchik axi tsʼakbáj —inik ani uxum axi pilchik in tamúb— ani wichiychik ka kʼwajiy tejéʼ ti Tsabál. Junchik in kwaʼalak wéʼ i kʼij ti tsémenek pero, jún i inik in neʼdhálakits tséʼ a kʼicháj ti an jolimtaláb (Juan 11:39-44).

• A Dios in léʼits kin wíchbanchij in ejatal an tsemélomchik. A Jehová in pojkál an tsémláj kom in tsuʼtal jantʼiniʼ jún i pojkax (1 Corintios 15:26). Jajáʼ in atsʼál jún i lupudh leʼnomtaláb abal kin talabedhaʼ axéʼ xi pojkax ani neʼets kin tʼajaʼ tam kin tsʼakbaʼ an tsemélomchik. In léʼ abal jitaʼchik kʼwajat tin tsalápil ka wichiy ka kʼwajiy tejéʼ ti Tsabál (Job 14:14, 15).