Soti 29 janvye pou rive 11 mas 2024, plis pase 11 000 frè ak sè ki soti toupatou ann Afrik disid t al patisipe nan yon kanpay predikasyon nan lang kosa ki te fèt nan yon pwovens ki nan sid peyi a. Gen sèt milyon moun k ap viv nan pwovens sa a e majorite ladan yo pale kosa. Pandan kanpay lan, gen plis pase 2 700 moun ki mande etid.

Pandan kanpay lan, gen de sè ki te rankontre yon fi ki gen sèlman de semèn depi l pèdi frè l nan yon aksidan terib. Se ak dlo nan je li t ap pale ak sè yo de lanmò a. Sè yo te li pou li Revelasyon 21:3, 4 pou rekonfòte l. Fi a te vle konn plis bagay sou jan Bondye pral fè lanmò ak soufrans pa egziste ankò. Li te mande ki lè e ki kote yo fè reyinyon. Yo kòmanse yon etid biblik avè l.

Gen yon sè ki rele Zukiswa ki t al preche yon fi ki gen atrit ki ba l anpil doulè. Sa fè li difisil pou l fè manje pou pitit li. Sa te ba l pwoblèm lè l wè pitit li yo pa t ap jwenn anyen pou yo manje nan jou sa a, paske li te twò fèb pou l al brase pat pou l fè pen. Zukiswa te ofri l pou l brase pat la pou li pandan lòt sè a t ap preche l. Fi a te tèlman sezi pou sa sè yo fè pou li a, li mache di zanmi l sa. Sa pa t pran tan pou l etidye Labib ak Temwen yo.

Gen de frè, pandan yo t ap preche nan vil Gqeberha, ki t al pale ak yon mesye ki pèdi yon pye. Mesye a di sa gen lontan depi l ap mande tèt li poukisa Bondye kite se Satan k ap dirije monn nan, piske se Bondye ki fè limanite (1 Jan 5:19). Frè yo montre l sa Bib la di sou sa. Nan menm jou a, mesye a ak madanm li te gade videyo ki gen tit Poukisa Bondye pèmèt soufrans? lan, sa fè yo te toule de te byen kontan aksepte yon etid biblik.

Gen yon sè ki t ap preche nan menm vil Gqeberha a, ki te mande yon fi si l ta renmen li Sòm 37:29. Fi a li vèsè a nan pwòp Bib pa l, men li pa t ka konprann sa li li a. Apre sa, sè a li menm vèsè a pou li nan Tradiksyon monn nouvo a nan lang kosa. Lè sa a fi a di : “Jan lang kosa a ye nan Bib sa a sonnen byen. Mwen konprann li pi byen pase Bib mwen an!” L ap etidye Labib kounye a.

Nou byen kontan wè jan anpil moun ki pale kosa toupatou ann Afrik disid aksepte mesaj espwa “Bondye tout konsolasyon an” bay. — 2 Korentyen 1:3.