LAGANI momo lalonai Russia ai iseda haroro gaukara idia taravatua, to 1991 ai, Iehova ena Witnes taudia idia moale bada, badina gavamani ese gwaumaoro ia henia idia haroro lou totona. Unai nega ai, momo idia diba lasi Witnes taudia edia namba be nega 10 amo do ia bada daekau, badina hari pablisa edia namba be 170,000 bamona! Basileia harorolaia taudia haida be tano haida amo idia mai Russia dekenai, gogoa gaukarana idia durua totona. (Mat. 9:37, 38) Hari idia haida edia sivarai do ita itaia.

Russia ai taravatu idia kokia neganai, Great Britain amo ia mai tadikaka ladana Matthew ena mauri lagani be 28. Unai lagani ena hebouhebou ta ai, tadikaka ta ena tok ai ia hahedinaraia Eastern Europe ai kongrigeisen haida be heduru idia ura. Russia ai kongrigeisen ta ladana St. Petersburg ia gwauraia, unuseniai hesiai tauna be tamona sibona bona elda be lasi. To, pablisa edia Baibel stadi ibounai be handred haida bamona! Matthew ia gwau: “Unai tok murinai, Russia lau lalohadailaia, unai dainai Iehova dekenai egu ura gauna lau gwauraia.” Moni ia haboua, ena kohu haida ia hoihoilaia, bona 1992 ai Russia dekenai ia lao. Dahaka ia vara?

Matthew ia gwau: “Edia gado be auka, unai dainai taunimanima dekenai Baibel lau herevalaia be mai ena hekwarahi.” Ia davaria hekwakwanai ma ta be noho gabuna. Ia gwau: “Lau be nega momo apatmen lau haidaua dainai, apatmen idauidau ai lau noho.” Ena be unai ia vara, to ia gwau: “Russia dekenai lau lao be abia hidi namona.” Ma ia gwau: “Unuseniai egu hesiai gaukara lau karaia dainai, Iehova dekenai lau tabekau bona nega momo lau ia durua.” Gabeai Matthew be elda ai ia lao, bona hari St. Petersburg kahirakahira ia noho brens opesi ai ia gaukara.

Lagani 1999 ai, Hiroo ena mauri lagani be 25 neganai, Japan ai Hesiai Gaukara Hadibaia Sikulina amo ia gradueit. Tisa ta ese ia hagoadaia tano ma ta ai hesiai gaukara do ia karaia. Hiroo ia kamonai Russia dekenai heduru idia ura. Unai dainai Russia gado ia dibaia bona dala ia karaia unuseni ia lao totona. Ia gwau:  “Hua siks lalonai Russia dekenai lau noho. Unai be keru bada gabuna dainai, November ai lau lao badina lau ura diba bema lau be hegeregere unai tano dekenai lau noho totona.” Unai murinai, Japan dekenai ia giroa bona moni ia haboua, unai amo Russia dekenai ia giroa lou diba.

Hari, Hiroo be lagani 12 lalonai Russia dekenai ia noho, bona kongrigeisen haida ia bamoa vadaeni. Kongrigeisen ta ai, ia sibona be elda bona pablisa ibounai be 100 bamona. Ma kongrigeisen ma ta dekenai, wiki ta ta ai Tiokratik Haroro Sikuli, Hesiai Hebou, Gima Kohorona Stadi, bona Kongrigeisen Buka Stadi faiv ia naria. Mamoe vadivadi momo ia karaia danu. Unai laganidia lalonai ia karaia gaudia ia laloa neganai, ia gwau: “Lau moale bada, badina tadikaka taihu lau durua hebou idia lao bona haroro gaukara idia karaia totona.” Unai ese edena dala ai ia durua? Ia gwau: “Russia dekenai lau do lao lasi neganai, elda bona painia gaukara lau karaia, to iniseni lau mai neganai lau mamia egu hetura karana Iehova ida ia goada ia lao. Bona egu mauri lalonai Iehova tabekau henia karana lau dibaia.” Lagani 2005 ai, Hiroo be Svetlana ia adavaia, bona painia gaukara idia karaia hebou.

Matthew, ena mauri lagani be 34, bona ena tadina Michael, ena mauri lagani be 28. Idia be Canada taudia. Russia idia vadivadi henia neganai, idia hoa badina kamonai taudia momo be hebou dekenai idia lao, to tadikaka be momo lasi hebou idia naria totona. Matthew ia gwau: “Lau vadivadi henia kongrigeisen ena atendens be 200, to unuseni elda tadikaka burukana bona hesiai tauna ta ese hebou idia naria. Unai ese egu lalona ia veria unai tano dekenai lau lao bona tadikaka lau durua totona.” Lagani 2002 ai Russia dekenai ia lao.

Lagani foa murinai, Michael be Russia dekenai ia lao, bona ia itaia tadikaka totona gaukara be momo. Ia be hesiai tauna dainai, akaun, buka bona magasin, bona teritori ia naria. Danu ia idia noia kongrigeisen seketere ena gaukara ia karaia, pablik tok ia henia, hebouhebou hegaegaelaia bona Kingdom Haginia gaukara ia durua totona. Hari danu kongrigeisen momo ai tadikaka totona gaukara be momo. Ena be asainmen momo karaia totona be mai ena hekwarahi, to Michael, hari elda gaukara ia karaia, ia gwau: “Tadikaka lau durua dainai lau moale bada. Egu mauri lalonai unai be gaukara namo herea!”

Matthew be Marina ia adavaia, bona Michael be Olga ia adavaia. Idia bona ma haida be mai ura ida kongrigeisen momo idia do durua noho.

Lagani 1994 ai, Tatyana ena mauri lagani be 16 neganai, Ukraine dekenai spesel painia taudia idia mai bona ena kongrigeisen idia durua. Idia be Czech Republic, Poland, bona Slovakia amo idia mai. Tatyana ia laloatao, ia gwau: “Idia be gaukara goada painia taudia bona idia oi hereva henia diba, bona ma haida idia laloa bada. Bona idia be Baibel idia diba namonamo.” Tatyana ia itaia, Iehova ese unai painia taudia ia hanamoa, badina Iehova ena ura idia karaia. Bona ia gwau: ‘Lau ura idia bamona do lau karaia.’

Tatyana be unai painia taudia edia haheitalai ese ia hagoadaia dainai, ena sikuli holidei negadiai ma haida ida idia lao Ukraine bona Belarus ena daudau gabudia dekenai, idia do haroro lasi gabudia unai. Unai negadia ia moalelaia bada dainai, ia ura Russia dekenai ia lao bona ena haroro gaukara ia habadaia. Guna, ia lao nega sisina sibona ena taihu ida ia noho, bona moni gaukara ia tahua ena painia gaukara durua totona. Bena lagani 2000 ai Russia dekenai ia giroa lou. Hekwakwanai haida ia davaria, a?

Tatyana ia gwau: “Egu moni be hegeregere lasi apatmen ta lau rentaia totona, unai dainai haida edia ruma dekenai daiutu ta lau rentaia. Unai be ia auka  lau dekenai. Bona nega haida lau ura egu hanua dekenai do lau giroa. To nega momo Iehova ese lau ia durua dainai, lau itaia bema egu hesiai gaukara lau karaia noho, namo do lau davaria.” Hari, Tatyana be Russia ai misinari gaukara ia karaia noho. Ia gwau: “Unai lagani iboudiai lalonai, ena be egu hanua bona tano lau rakatania, to ekspiriens namodia bona tura momo lau davaria. Unai ese egu abidadama ia hagoadaia.”

Masako be Japan amo, hari ena mauri lagani be 50 bamona. Ena mauri lalonai ia ura misinari gaukara ia karaia, to ia gorere dainai ia auka unai ia hagugurua totona. To, ena gorere ia ore neganai, Russia dekenai ia lao gogoa gaukara ia durua totona. Ena be noho gabuna namona bona moni gaukara ia davaria be auka, to taunimanima dekenai Japan gado ia hadibaia bona haida edia ruma ia hagoevaia amo moni ia abia, ena painia gaukara ia durua totona. Dahaka ese ia durua ena hesiai gaukara ia karaia noho totona?

Masako be Russia dekenai lagani 14 lalonai ia karaia hesiai gaukara ia laloa neganai, ia gwau: “Ena be haroro gaukara ai nega aukadia haida lau davaria, to ekspiriens namodia ese lau ia hamoalea bada. Pablisa momo lasi gabudiai oi haroro neganai, unai ese emu mauri lalonai moale bada do ia havaraia.” Ia gwau: “Idia hanaia laganidia lalonai Iehova ese lau dekenai aniani, dabua bona noho gabuna ia henia, unai be hoa gauna.” Masako be Kyrgyzstan dekenai gogoa gaukara ia karaia danu. Bona ia ese inai gado grup maragidia ia durua: English, Chinese, bona Uighur. Hari, St. Petersburg ai painia gaukara ia karaia.

Tano haida dekenai moni ena hekwakwanai ia vara dainai, nega momo famili haida be edia tano idia rakatania bona tano ma ta dekenai idia lao. To Aberahamo bona Sara idia karaia bamona, famili haida be tano ma ta dekenai idia lao Iehova ena hesiai gaukara idia karaia totona. (Gen. 12:1-9) Mani headava taudia Mikhail bona Inga ita laloa, hari edia mauri lagani be 40 lalonai, bona lagani 2003 ai, Ukraine idia rakatania bona Russia dekenai idia lao.  Unuseniai Baibel ena hereva momokani idia ura henia taudia idia durua.

Mikhail ia gwau: “Nega ta taunimanima idia haroro lasi gabudia dekenai ai haroro neganai, tau burukana ta be ai ia nanadaia, ‘umui be haroro taudia, a?’ Ai haere ai gwau, ‘oibe.’ Bena ia gwau: ‘Lau diba nega ta do umui mai. Iesu ena hereva be do ia guguru. Bena unai tauna be Mataio 24:14 ena hereva ia gwauraia.” Mikhail ma ia gwau: “Inai gabu dekenai baptis dubu hahine 10 ai davaria, idia be hereva momokani totona idia hitolo. Idia dekenai Mauri Hanaihanai buka ia noho bona wiki ta ta ai Baibel stadi totona idia gaukaralaia. Hora momo lalonai edia henanadai ai haerelaia bona idia ida Basileia anedia ai abia, bona ai aniani hebou. Lau dekenai unai be nega namona.” Mikhail bona Inga idia gwau pablisa be momo lasi gabudia dekenai haroro gaukara idia karaia neganai, unai ese idia ia durua Iehova kahirakahira idia lao, edia lalokau taunimanima totona ia habadaia, bona edia mauri lalonai moale bada ia havaraia. Hari idia be sekit gaukara idia karaia.

Headava taudia Yury bona Oksana be Ukraine amo, edia mauri lagani be 30 lalonai, bona edia natuna mero, Aleksey, hari ena mauri lagani be 13. Lagani 2007 ai, Russia ena brens ofesi idia vadivadi henia. Bona idia itaia Russia ena mapu dekenai teritori momo be idia do haroro lasi. Oksana ia gwau: “Mapu ai itaia murinai, ai laloparara pablisa be momo lasi gabudia ai gaukara badana ia noho. Unai dainai ai ura Russia dekenai ai lao.” Dahaka gaudia ma haida ese idia ia durua? Yury ia gwau: “Eda magasin haida ai duahia bona unai ese ai ia durua, ai duahia atikol ta be, ‘Tano Idauna ai Hesiai Gaukara Oi Karaia Diba, A?’ * Russia ena brens ese ia gwauraia gabudia haida ai vadivadi henia, unai amo noho gabudia bona moni gaukara ai tahua diba.” Lagani 2008 ai, Russia dekenai ai lao.

Matamanai moni gaukara idia davaria be auka, bona apatmen idauidau dekenai idia noho. Yury ia gwau: “Ai lalohisihisi lasi totona, nega momo ai guriguri, bona haroro gaukara ai karaia noho, bona ai diba Iehova ese ai do ia durua. Ai itaia Basileia ai tahua guna neganai, Iehova be ai ia naria. Inai hesiai gaukara ese emai hetura karana famili bona Iehova ida ia hagoadaia bada.” (Mat. 6:22, 33) Pablisa momo lasi gabudia ai haroro karana ese edena dala ai Aleksey ia durua? Oksana ia gwau: “Unai ese ia hagoadaia bada, ena mauri lagani be 9 neganai, Iehova dekenai ena mauri ia gwauhamatalaia bona ia bapatiso. Ia itaia Basileia idia harorolaia taudia be momo lasi dainai, ena sikuli holidei ai heduru painia ia karaia. Haroro gaukara ia lalokau henia bona ia laloa bada dainai ai moale bada.” Hari Yury bona Oksana be spesel painia gaukara idia karaia.

Unai gogoa gaukara idia karaia taudia edia hereva ese ia hahedinaraia, tano ma ta dekenai hesiai gaukara oi karaia totona, Iehova dekenai do oi tabekau be namo. Tano ma ta ai hesiai gaukara idia karaia taudia be hekwakwanai idia davaria, to sivarai namona idia kamonai taudia dekenai Basileia idia harorolaia karana ese edia moale ia habadaia. Gogoa gaukara durua totona gaukara badana ia do noho dainai, pablisa momo lasi gabudia dekenai oi lao diba, a? Bema emu lalona oi hadaia pablisa be momo lasi gabudia ai oi gaukara totona, reana Yury bamona do oi laloa, ia gwau: “To lau lalohisihisilaia gauna be, lau matamata neganai unai gaukara lau karaia lasi.”