“UMA ANIANI gogoa gaukarana be bada, to gaukara taudia be momo lasi. Unai dainai gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.” (Luka 10:2) Lagani 2,000 gunanai Iesu ese unai hereva ia gwauraia, unai ese hari Myanmar ai idia karaia noho gaukara ia hahedinaraia. Dahaka dainai? Myanmar ai, pablisa ibounai 4,200 bamona be taunimanima 55 milioni dekenai sivarai namona idia harorolaia noho.

To, “gogoa gaukara ena Biaguna,” Iehova, be tadikaka bona taihu handred momo edia kudouna ia hamarerea dainai, tano idauidau amo idia mai inai tano saut ist Asia dekenai, haroro gaukara idia durua totona. Dahaka dainai edia tano idia rakatania? Dahaka ese idia ia durua Myanmar dekenai idia lao totona? Bona dahaka hahenamo idia moalelaia noho? Mani edia sivarai ita duahia.

Japan ai ia noho painia ta, ladana Kazuhiro, be lagani haida gunanai ia moru bona maserea, bena hospital dekenai idia abia lao badina epileptic gorere ia abia. Doketa ese ia hamaoroa lagani rua lalonai motuka do ia taria lasi. Kazuhiro be ia lalohekwarahi, bona sibona ia nanadaia. ‘Edena bamona lau ura henia gaukara do lau karaia?’​—painia gaukara. Iehova dekenai ia guriguri goadagoada, ia noia dala do ia kehoa ia painia noho totona.

Kazuhiro ia gwau: “Hua ta murinai, egu turana Myanmar ai, be egu sivarai ia kamonai. Lau ia rini henia bona ia gwau: ‘Myanmar ai basi idia gaukaralaia momo. Bema oi mai, ena be motuka oi taria lasi to oi haroro diba!’ Egu gorere dainai doketa lau nanadaia bema hegeregere Myanmar dekenai lau lao diba? Doketa ia gwau: ‘Myanmar amo kwarana harana ia stadilaia doketa ta be hari Japan dekenai do ia mai. So ia dekenai oiemu gorere do lau herevalaia. Bema gabeai oi moru bona maserea, ia ese oi ia durua diba.’ Doketa ese ia gwauraia herevana be Iehova amo haere lau abia bamona.”

Maoromaoro, Kazuhiro be e-mail ia siaia Myanmar brens ofesi dekenai, bona idia ia hadibaia, ia bona ena adavana idia ura Myanmar ai painia gaukara do idia karaia. Dina faiv murinai, brens ofesi be haere idia siaia, idia gwau: “Umui mai, ai be painia momo ai ura!” Kazuhiro bona ena adavana, Mari, be edia motuka idia hoihoilaia, visa bona peleni tiketi idia hoia. Hari Mandalay ai mai moale ida saini gado grup idia durua noho. Kazuhiro ia gwau: “Ai mamia inai ekspiriens ese emai abidadama Dirava ena gwauhamata Salamo 37:5 ai ia hagoadaia. Inai siri ia gwau: “Oiemu mauri  be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.’”

Lagani 2014 ai, Myanmar dekenai spesel hebouhebou ta idia karaia, Iehova ena Witnes taudia dekenai unai be hahenamo ta. Tadikaka taihu be tano idauidau amo idia mai unai hebouhebou totona. United States amo be taihu Monique, ena mauri lagani be 30 bamona, ia gwau: “Hebouhebou amo lau giroa mai neganai, Iehova dekenai lau guriguri egu mauri ai tahua gaudia haida lau atoa totona. Danu egu tahua gaudia be egu tama sina ida lau herevalaia. Ai ibounai ai laloa, Myanmar ai lau giroa lou be namo to nega daudau lalonai unai lau lalohadailaia bona gurigurilaia loulou murinai unai abia hidi lau karaia.” Monique ese unai ia karaia ena badina ia gwauraia.

Ia gwau: “Iesu be ia murinai idia raka taudia ia hagoadaia do idia karaia gaukara ‘ena davana idia laloa’ be namo. Unai dainai sibona lau nanadaia: ‘Egu moni be hegeregere unai lau karaia totona? Unai tano ai sibona durua totona moni gaukara ai nega bada do lau halusia, a? Ma ia gwau: Gabeai lau laloparara egu moni be ia hegeregere lasi tano ma ta ai lau lao totona.” To edena bamona ia lao?​—Luka 14:28.

Monique ia gwau: “Dina ta egu bosi hahine ia ura lau ia hereva henia. Unai dainai lau lalohekwarahi, reana egu gaukara amo lau do ia hadokoa. To, egu bosi be egu gaukara namona dainai lau ia hanamoa. Bena lau ia hamaoroa egu pei dekenai moni haida do ia atoa kau. Bona unai moni be ia hegeregere momokani lau ia durua totona!”

Lagani 2014  December amo, Monique be Myanmar dekenai ena hesiai gaukara ia karaia noho. Pablisa be momo lasi gabunai ia haroro dainai ena hemami be edena bamona? Ia gwau: “Iniseniai lau mai dainai, lau moale bada herea. Hari lau be Baibel stadi toi lau karaia noho. Egu stadi ta ena mauri lagani be 67. Nega momo lau ia hadavari henia neganai mai kiri ida lau do ia rosia. Baibel stadi amo, Dirava ena ladana Iehova ia dibaia neganai ia tai. Ia gwau: ‘Egu mauri lalonai inai be nega ginigunana lau kamonai Dirava ena ladana be Iehova. Oi be matamata sibona, to oi ese lau dekenai mai anina bada gauna oi hadibaia.’ Lau danu lau tai. Unai bamona ekspiriens ese ia hahedinarai Pablisa be momo lasi gabunai emu hesiai gaukara oi moalelaia diba.” Monique be vanegai sibona Basileia Evanelia Sikuli ai ia lao.

Haida be Myanmarar ai idia mai ena badina ma ta be, 2013 Yearbook ai unai tano ena sivarai idia duahia. Taihu ta ladana Li, ena mauri lagani 30 mai kahana bamona be Saut ist Asia ai ia noho. Ia be ful-taim moni gaukara ia karaia, to Yearbook ai ia duahia sivarai dainai Myanmar ai lao lalohadaina ia abia. “Lagani 2014 Yangon ai, spesel hebouhebou ta dainai lau lao, bona unuseniai headava tau bona hahine ta lau hedavari henia, idia be Myanmar amo idia mai, idia be Chinese gado idia gaukaralaia taudia idia durua. Chinese gado lau diba dainai, egu lalona lau hadaia Myanmar dekenai do lau lao bona unuseniai Chinese grup do lau durua. Bena lau bona Monique, be Mandalay dekenai ai lao. Iehova ese ai ia hanamoa bena sikuli ta dekenai pat-taim tisa gaukara ai davaria, bona unai sikuli badinai ia noho ruma ta dekenai ai noho. Herevana dina ia siahu bona hekwakwanai haida lau davaria, to iniseniai egu hesiai gaukara lau moalelaia. Myanmar taudia momo be kohu momo lasi mauri idia noholaia, to idia be hemataurai taudia bona idia ura bada sivarai namona idia kamonai. Lau moale bada badina Iehova ese unai gaukara ia haharagaia noho dalana lau itaia. Lau abia dae momokani Iehova ena ura dainai Mandalay ai lau mai.”

Pablisa be momo lasi gabunai idia lao taudia momo ese guriguri ena namo idia mamia. Hegeregere Jumpei ena mauri lagani be 37, bona ena adavana Nao ena mauri lagani be 35. Idia be Japan ai saini gado kongrigeisen  idia durua noho. Dahaka dainai Myanmar dekenai idia lao? Jumpei ia gwau: “Lau bona egu adavana emai tahua gauna be, idau tano ai pablisa be momo lasi gabunai hesiai gaukara do ai karaia. Japan ai, emai saini gado kongrigeisen ai ia noho tadikaka ta be Myanmar dekenai ia lao. Herevana ai dekenai moni sisina sibona ia noho, to May 2010 lalonai, ai danu be Myanmar dekenai ai lao. Myanmar ai idia noho tadikaka bona taihu be mai moale ida ai idia welkam henia!” Myanmar ai saini gado grup ia durua dainai ena hemami be edena bamona? Ia gwau: “Momo idia ura bada. Saini gado vidio ai hahedinaraia neganai, taia kudima taudia momo be idia moale. Ai moale bada, badina abia hidi ai karaia Iehova ai hesiai henia totona iniseniai ai mai!”

Edena dala ai Jumpei bona Nao be tauanina dalanai sibodia idia naria? Jumpei ia gwau: “Lagani toi murinai, ai haboua moni ena kahana haida ai gaukaralaia vadaeni, bona vaira lagani ena ruma ena rent hoia totona, emai moni be hegeregere lasi. Lau bona egu adavana be hanaihanai mai kudouna ibounai ida ai guriguri. Dina ta, brens ofesi amo revareva ta ai abia, ai idia boiria nega sisina lalonai special painia gaukara do ai karaia totona. Iehova ai abidadama henia, bona ai mamia ia be ai ia rakatania lasi. Ia be dala idauidau dekenai ai ia naria.” Vanegai sibona, Jumpei bona ena adavana Nao danu be, Basileia Evanelia Sikuli dekenai idia lao.

Tadikaka Simone ena mauri lagani be 43, ia be Italy amo, bona ena adavana Anna, ena mauri lagani 37 be New Zealand amo. Dahaka ese idia ia hagoadaia Myanmar dekenai idia lao totona? Anna ia gwau. “Lau be 2013 Yearbook ai, Myanmar ena sivarai lau duahia”. Simone ia gwau: “Myanmar dekenai ai noho be hahenamo badana ta. Iniseniai, Iehova dekenai egu nega bada lau henia diba. Bema pablisa be momo lasi gabudia ai Iehova ita hesiai henia neganai, ita ia durua daladia do ita mamia bona unai be moale gauna.” (Sal. 121:5) Anna ia gwau: “Hari lau moale bada guna unai bamona moale lau mamia lasi. Kohu momo lasi maurina ai noholaia. Nega momo egu adavana ida lau gaukara, bona emai hebamo heheni karana ai moalelaia. Danu tura namodia haida ai davaria. Taunimanima be witnes taudia idia inai henia kava lasi, bona haroro gaukara ai momo idia ura sivarai namona idia kamonai!” Edena dala ai?

Anna ma ia gwau: “Dina ta, maketi gabuna ai iunivesiti stiuden ta lau haroro henia bona ia lau hadibaia nega ma ta do ai hedavari lou. Ai hedavari lou neganai, ena turana ta ida ia mai. Bona nega ta ai, ena turadia ma haida ida ia mai. Gabeai, ena turadia ibounai ia hakaua mai. To hari, idia ibounai faiv ida lau stadi.” Simone ia gwau: Haroro gaukara ai, taunimanima edia kara be namo bona idia ura diba dahaka ita harorolaia. Idia momo idia ura sivarai namona idia kamonai. To emai nega be ia hegeregere lasi idia ibounai ai haroro henia totona.”

To Myanmar dekenai do ai lao totona, edena bamona emai abia hidi ai karaia? Mizuho, ia be Japan amo, ia gwau: “Lau bona egu adavana Sachio, ai ura bada pablisa be momo lasi tanona ai hesiai gaukara do ai  karaia​—to edena gabu do ai lao? Myanmar ena sivarai be lagani 2013 ena Yearbook lalonai ai duahia, ia lalonai idia noho ekspiriens ese emai kudouna ia hamarerea, bena unai negai emai lalona ai hadaia Myanmar dekenai do ai lao bona unuseniai emai hesiai gaukara do ai karaia.” Sachio ma ia gwau: “Abia hidi ai karaia wiki tamona sibona do ai lao Yangon, Myanmar ena siti badana ai itaia totona. Unai loaloa kwadogina murinai emai lalona ai hadaia unuseniai do ai lao be namo.”

Rodney bona ena adavana, Jane, edia mauri lagani be 52 be Australia amo, bona edia natuna mero Jordan, bona natuna kekeni Danica, idia be lagani 2010 amo pablisa be momo lasi gabuna Myanmar dekenai hesiai gaukara idia karaia. Rodney ia gwau: “Taunimanima idia ura dikadika Dirava idia dibaia, unai ai itaia neganai ai moale bada. Famili haida do lau hagoadaia inai bamona gabu, Myanmar, ai idia mai totona.” Dahaka dainai? Ia gwau: “Badina unai bamona ekspiriens ese emai famili ena hetura karana Iehova ida ia hagoadaia! Matamata taudia momo edia nega bada be mobael fon, motuka, bona unai bamona gaudia ma haida dekenai idia haorea. Emai natudia be idia bisi, hereva matamatadia idia dibaia bona haroro gaukara ai idia gaukaralaia totona. Idia hekwarahi edena dala ai Baibel ena hereva amo ta do idia durua bona edena dala ai kongrigeisen hebou ai haere do idia henia, bona edia abidadama ia hagoadaia gaudia idia laloa bada.”

Tadikaka ta ladana Oliver ena mauri lagani 37 be United States amo, ese tano ma ta ai hesiai gaukara ia moalelaia ena badina ia gwauraia, ia gwau: “Egu noho dalana lau haidaua bona Iehova lau hesiai neganai, namo bada lau davaria. Danu egu tano lau rakatania bona gabu ma ta ai lau lao ese ia hahedinaraia herevana dahaka ia vara, to Iehova lau abidadama henia. Unuseniai idia noho tadikaka lau diba namonamo lasi, to emai abidadama be tamona bona unai ese ia hahedinaraia Dirava ena Basileia be inai tanobada ena gau ta ida ita hahegeregerea diba lasi.” Hari, Oliver bona ena adavana Anna, be mai ura bada ida Chinese-gado teritori ai idia haroro noho.

Australia amo ia mai taihu ta ladana Trazel, ia be lagani 2004 amo Myanmar dekenai ena hesiai gaukara ia karaia noho. Ia gwau: “Edia noho dalana ia hegeregere taudia lau hagoadaia, namona be pablisa momo lasi gabudia ai idia lao bona unuseniai edia hesiai gaukara idia karaia. Lau mamia, mai kudouna ibounai Iehova oi hesiai henia neganai, Ia ese emu hekwarahi do ia hanamoa. Guna, lau laloa lasi inai dala ai Dirava do lau hesiai noho. Unai be hahenamo bada.”

Myanmar ai, pablisa be momo lasi gabudia ai haroro gaukara idia karaia tadikaka taihu edia ekspiriens ese oi ia hagoadaia diba. Unai amo idia haroro lasi teritori ai kudou maoro taudia oi haroro henia diba. Oibe, pablisa momo lasi gabuna ai heduru idia henia noho tadikaka taihu edia boiboi herevana oi kamonai, idia gwau, “Mani emu kara, Myanmar dekenai umui mai bona ai umui durua!”