LAGANI haida gunanai, Roald bona Elsebeth edia mauri lagani be 47 bamona neganai, idia be Norway ena siti badana, Bergen ai mauri namona idia noholaia. Idia bona edia natuna kekeni, Isabel bona natuna mero Fabian, be hanaihanai kongrigeisen lalonai gaukara idauidau idia karaia. Roald be elda ta bona Elsebeth be painia ta, bona Isabel bona Fabian be pablisa namodia.

To, September 2009 ai, unai famili be abia hidi badana ta idia karaia​—⁠idia ura wiki ta lalonai gunika gabuna ta dekenai do idia haroro. Unai dainai Roald, Elsebeth bona Fabian, unai negai ena mauri lagani be 18, be Arctic Circle ai ia noho provinsi ta, Finnmark, ena gabu maragina, Nordkyn dekenai idia lao. Gunika hanua ta Kjøllefjord ai, haroro gaukara totona idia lao tadikaka bona taihu ma haida ida idia haroro hebou. Roald ia gwau: “Unai wiki ia matamaia neganai, lau moale badina palani lau karaia unai wiki ibounai lau haroro totona.” To unai wiki tamona murinai, Roald ia itaia gaukara bada ia noho dainai ia lalohekwarahi bada. Dahaka ia vara?

Roald ia gwau: “Finnmark ai, painia tadikaka ta ladana Mario ese ai ia nanadaia, bema ai ura Lakselv dekenai do ai lao bona kongrigeisen ta ai durua, ena pablisa ibounai be 23 sibona.” Roald be unai henanadai dainai ia hoa. Ia gwau: “Lau bona Elsebeth be pablisa momo lasi gabuna dekenai do ai lao ai laloa vadaeni, to ai laloa emai natudia idia bada bona ai idia rakatania neganai, unai do ai karaia.” To, Roald be unai gunika hanuana dekenai dina haida ia haroro murinai, ia itaia taunimanima idia ura bada Iehova do idia dibaia, bona harihari heduru idia abia be namo. Ia gwau: “Unai henanadai lau laloa momo bona hanuaboi haida lau mahuta namonamo lasi.” Bena Mario ese Roald bona ena famili be Lakselv dekenai ia abidia lao. Mario ia ura idia ese unai kongrigeisen maragina do idia itaia.

Lakselv ai elda rua sibona idia noho, bona idia ta, Andreas ese Roald bona ena famili dekenai Kingdom Hall bona gabu ma haida ia hahedinaraia. Kongrigeisen taudia ese Roald bona ena famili idia welkam henidia bona idia hamaoroa, do idia moale bema idia be unuseniai idia lao, Basileia ena gaukara durua totona. Andreas be mai kiri ida ia gwau, Roald bona Fabian totona moni gaukara ena intaviu ia hegaegaelaia vadaeni! Unai vadivadi taudia be dahaka do idia karaia?

Matamanai Fabian ia gwau: “Lau ura lasi iniseniai lau noho.” Ia laloa iena kongrigeisen ai ena turadia do ia rakatania, bona unai gabu maragina dekenai do ia noho be hegeregere lasi. Danu, elektrisen gaukara ena treinini ia do haorea lasi. To, Isabel (unai negai ena mauri lagani be 21) idia nanadaia neganai, mai moale ida ia gwau: “Egu mauri lalonai lau ura bada unai bamona do lau karaia!” To, gabeai ia gwau: “Unai lau laloa lou neganai lau daradara, ‘Inai be lalohadai maorona, eiava? Egu turadia do lau reaia, a? Egu kongrigeisen lau rakatania be namo, a? Iniseniai gau ibounai be idia hegeregere bona lau diba lau palanilaia gaudia do lau hagugurudia.’” Mario ena henanadai dekenai Elsebeth ena lalohadai be dahaka? Ia gwau: “Lau mamia Iehova be emai famili dekenai asainmen ta ia henia. To, vanegai sibona emai ruma ai hanamoa bona lagani 25 lalonai, ai haboua kohu ibounai lau laloa momo.”

Unai wiki ia ore murinai, Roald bona ena famili be Bergen dekenai idia giroa. To, idia ese edia Keristani tadikaka taihu Lakselv ai, idia lalodia noho. Elsebeth ia gwau: “Iehova lau guriguri henia momo bona Lakselv ai idia noho turadia lau tore henidia, bona idia dekenai laulau bona ekspiriens haida lau siaia.” Roald ia gwau: “Lakselv dekenai do ai lao ena abia hidi lau karaia haraga lasi. Lau laloa, bema egu famili ida unuseni ai lao, ai sibona ai naria diba, eiava lasi? Iehova lau guriguri henia momo, bona egu famili bona lo tadikaka lau hereva henidia.” Fabian ma ia gwau: “Lau laloa lou neganai, lau laloparara gau ta ese lau ia koua lasi lau lao totona. Iehova lau guriguri henia momo, bona Lakselv dekenai do ai lao urana be metairametaira ia goada.” Isabel be edena bamona? Ia be Bergen dekenai ia painia matamaia, bona Lakselv dekenai do idia lao totona ia hegaegae. Hua siks ia painia, bona sibona ena Baibel stadi ia karaia momo dainai, ia mamia ia hegeregere Lakselv dekenai do ia lao.

Lakselv dekenai do idia lao urana ia bada neganai, Roald bona ena famili ese gau haida idia karaia edia palani idia hagugurua totona. Roald be ena moni gaukara dekenai pei badana ia abia, to ena bosi ia noia bema namo, lagani ta gaukara amo do ia laga-ani. To bosi ia gwau, pat-taim gaukara ia karaia diba​—⁠wiki rua ia gaukara bona wiki siks ia laga-ani. Roald ia gwau: “Ena be egu pei be ia maragi momokani, to ai dekenai unai be hegeregere.”

Elsebeth ia gwau: “Egu adavana ese lau ia noia Lakselv dekenai ruma ta lau tahua, bona emai ruma Bergen dekenai be ma haida ese idia rentaia diba. Emai nega bona goada bada ai haorea, to dokonai ai kwalimu. Daudau lasi murinai, emai natudia be pat-taim gaukara idia davaria, bona ai idia durua aniani idia hoia bona PMV ena davana idia karaia totona.”

Isabel ia gwau: “Lakselv be taoni maragina dainai, egu painia gaukara durua totona moni gaukara lau davaria be auka. Nega haida, toana be moni gaukara ta do lau davaria lasi.” To, lagani tamona lalonai Isabel be pat-taim moni gaukara idauidau nain ia karaia,  unai dainai ena moni be hegeregere ia painia noho totona. Fabian be edena bamona? Ia gwau: “Elektrisien gaukara ena treinini lau haorea totona, lau be kampani ta dekenai lau gaukara be namo, bona Lakselv ai unai lau karaia. Gabeai, egu eksam ai lau kwalimu bona pat-taim gaukara ta lau davaria.”

Marelius bona ena adavana, Kesia, idia ura pablisa momo lasi gabuna idia lao danu. Marelius, hari ena mauri lagani be 29 ia gwau: “Hebouhebou dekenai tok bona intaviu momo be painia gaukara idia herevalaia, bona lau idia durua egu hesiai gaukara lau habadaia totona.” To Kesia, hari ena mauri lagani be 26, ia mamia ena famili taudia do ia rakatania be auka. Ia gwau: “Egu lalokau taudia do lau rakatania dainai lau lalohekwarahi.” Ma danu, Marelius be ful-taim moni gaukara ia karaia, unai amo edia ruma totona idia abia abitorehai ena davana ia karaia diba. Ia gwau: “Iehova ai noia ai do ia durua emai mauri lalonai gau haida ai haidaua totona, bona ia ese ai ia durua dainai, gabeai pablisa momo lasi gabuna ta dekenai ai lao.” Idia karaia gau ginigunana be, edia nega bada idia gaukaralaia Baibel idia stadilaia totona. Gabeai, edia ruma idia hoihoilaia, edia moni gaukara idia rakatania, bena August 2011 ai Norway ena not kahanai ia noho siti, Alta dekenai idia lao. Unuseniai, sibona idia naria totona, Marelius be akaun gaukara ia karaia bona Kesia be stoa ta ai ia gaukara.

Knut bona Lisbeth, hari edia mauri lagani be 35 bamona, be Yearbook lalonai pablisa momo lasi gabudia idia lao taudia edia ekspiriens ese ia durudia. Lisbeth ia gwau: “Unai ekspiriens ese ai idia hagoadaia idau tano dekenai hesiai gaukara do ai karaia, to lau laloa lau be hegeregere lasi.” To, idia ese gau haida idia karaia edia palani idia hagugurua totona. Knut ia gwau: “Emai ruma ai hoihoilaia bona egu sinana ida ai noho, unai amo moni ai haboua diba. Gabeai, idau tano teritori dekenai haroro karana ai manadalaia totona, lagani ta bamona Bergen ena English gado kongrigeisen ta dekenai ai lao, bona unuseniai Lisbeth ena sinana ida ai noho.” Daudau lasi murinai, Knut bona Lisbeth idia hegeregere Uganda dekenai idia lao totona. Lagani ta lalonai, hua rua be Norway dekenai idia giroa bona moni gaukara idia karaia. Unai dala amo edia moni be hegeregere, hua 10 lalonai Uganda ai ful-taim hesiai gaukara idia karaia totona.

Pablisa momo lasi gabuna dekenai idia lao hesiai taudia idia kwalimu, a? Roald ia gwau: “Inai gunika gabuna dekenai emai famili be nega momo ai gaukara hebou. Bergen dekenai unai bamona ai karaia be auka. Unai dainai, emai hetura karana famili lalonai be ia goada. Danu, ai moale badina ai itaia emai natudia idia goada idia lao. Bona ai be kohu tahua momo karana ai laloa bada lasi, guna ai laloa bamona. Idia be anina lasi gaudia.”

 Danu, Elsebeth be gado ma ta ia dibaia. Dahaka dainai? Lakselv Kongrigeisen ena teritori ai Karasjok hanua ia noho, unai hanua taudia be Sami taudia. Sami taudia be Norway, Sweden, Finland, bona Russia edia not kahana ai idia noho taudia. Elsebeth be unai taudia ia haroro henia totona, Sami gado ia dibaia. Hari ia be Sami gado ai ia haroro diba. Elsebeth be unai teritori matamatana ia moalelaia noho, a? Ia be mai kiri ida ia gwau: “Lau be Baibel stadi siks lau karaia. Iniseni lau painia dainai, lau moale bada!”

Fabian be hari painia bona hesiai tauna ta. Ia gwau, ia bona Isabel ese edia kongrigeisen matamata lalonai, matamata taudia toi idia durua kongrigeisen ena gaukara idauidau lalonai idia vareai totona. Unai matamata taudia toi be haroro gaukara idia goadalaia noho. Idia rua be idia bapatiso bona March 2012 ai, heduru painia gaukara idia karaia. Idia ta be guna ia manoka, to Fabian bona Isabel ia tanikiu henia, badina idia ese ia idia durua ia goada lou totona. Fabian ia gwau: “Unai taihu ena hereva ese lau ia hamoalea. Ma ta ita hagoadaia be moale gauna!” Isabel ia gwau: “Inai asainmen dekenai lau ‘mamia, bona lau diba, Iehova be namo.’” (Sal. 34:8, BHḡ) Ma ia gwau: “Unai sibona lasi, to iniseniai hesiai gaukara lau karaia be mai ena moale!”

Ena be Marelius bona Kesia dekenai kohu be momo lasi, to Iehova ena hesiai gaukara idia moalelaia bada. Hari, Alta kongrigeisen dekenai pablisa 41 idia noho. Marelius ia gwau: “Guna negadia ai laloa neganai, hari emai mauri be ia idau momokani bona unai ese ai ia hagoadaia. Iehova ai tanikiu henia, badina iniseni ai painia diba bona emai hesiai gaukara ai moalelaia bada.” Kesia ma ia gwau: “Iehova abidadama henia momokani karana lau dibaia, bona ia ese ai ia naria. Danu, lau davaria egu varavara taudia amo gabu daudau lau noho dainai, unai ese lau ia durua, guna idia ai vadivadi henia negadia lau laloa bada. Alta dekenai ai lao dainai, lau lalohisihisi lasi.”

Uganda dekenai Knut bona Lisbeth be edena bamona? Knut ia gwau: “Unai be tano idauna bona ena kastom danu be idau dainai, nega sisina daudau lalonai edia mauri dalana ai manadalaia. Nega ta ta ranu bona paoa be lasi bona emai bogana idia hisihisi, to Baibel stadi momo ai karaia diba!” Lisbeth ia gwau: “Emai noho gabuna kahirakahira dekenai, teritori haida be sivarai namona idia do kamonai lasi. To unuseni ai lao neganai, ai itaia taunimanima be Baibel idia duahia, bona ai idia noia idia ai hadibaia totona. Unai bamona manau taudia dekenai Baibel ena sivarai ai hadibaia be moale bada gauna!”