Canada ai, Iehova ena Witnes tauna ta, Don, be ia hekwarahi dala dekenai idia noho taudia ia haroro henia totona. Don ia gwau: “Dala ai ia noho tauna ta ladana Peter ena dabua bona toana be miro momokani. Ia be badu momo tauna bona ia ura lasi taunimanima be ia idia hereva henia. Danu, ia ura lasi taunimanima ese ia do idia hebogahisi henia.” To lagani 14 lalonai, Don ia haheauka bona mai hebogahisi ida unai tauna ia kara henia.

Dina ta, Peter ese Don ia nanadaia: “Dahaka dainai lau oi hebogahisi henia noho? Taunimanima momo be unai bamona idia karaia lasi. Dahaka dainai lau oi laloa bada?” Peter ena lalona hamarerea totona, Don be mai aonega ida Baibel siri toi ia gaukaralaia. Matamanai, Peter ia nanadaia bema ia be Dirava ena ladana ia diba bena ia noia Baibel amo Salamo 83:18 do ia duahia. Gabeai, Don be Peter dekenai Roma 10:13, 14 ia duahia, ia gwau, “Iehova ena ladana dekenai idia boiboi taudia ibounai be hahemauri do idia abia.” Dokonai, Don ese Mataio 9:36 ia duahia, unai murinai Peter ia noia ia sibona ese unai siri do ia duahia. Unai siri ia gwau: “[Iesu be] hutuma ia itaia neganai ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” Vadaeni Peter be mai tai ida ia henanadai: “Lau be unai mamoe ta, a?”

Vadaeni Peter ese ena kara ia haidaua. Ia digu, ena besoso ia utua namonamo, bona Don ese ia henia dabua namodia ia hahedokilaia. Unai nega amo ia be hanaihanai ia goeva.

Nega ibounai Peter ese ena lalohadai be buka ta dekenai ia torea. Unai buka ena matana kahanai ia torea herevadia be moale sivaraidia lasi, to hari be idau. Ia torea herevana ta be inai: “Hari dina Dirava ena ladana lau dibaia. Lau guriguri neganai, Iehova dekenai lau guriguri diba. Lau moale badina Dirava ena ladana lau diba. Don ia gwau, Iehova be egu Turana ai ia lao diba, bona nega ibounai  lau do ia kamonai henia, herevana edena nega o gabu ai ia lau hereva henia.”

Peter ena hereva dokona be ena tadikaka bona taihuna dekenai ia torea. Ia gwau:

“Hari egu hemami be ia namo lasi. Lau be lau buruka vadaeni. Ena be inai be egu dina dokona, to lau diba Paradaiso ai egu turana [Don] do lau itaia lou. Bema hari inai oi duahia noho, lau be lau noho lasi. To bema egu fineral ai toana matamata ta itaia, ia umui hereva henia, bona mani inai bulu bukana umui duahia [ia ese “Mauri Ia lao Henia Hereva Momokanina” bukana ia herevalaia, unai buka be lagani haida gunanai ia abia]. * Inai buka ia gwau Paradaiso ai egu turana do lau itaia lou. Mai egu kudouna ibounai ida unai hereva lau abia dae. Emui lalokau tadikakana, Peter.”

Fineral murinai, Peter ena taihuna Ummi ia gwau: “Lagani rua gunanai, Peter ida lau herevahereva. Lagani momo lalonai ia be ia moale lasi, to unai be nega ginigunana lau itaia ia moale.” Don ia hamaoroa: “Inai buka do lau duahia, badina reana egu tadina ena kudouna ia hamarerea gauna be mai anina bada.” Danu, Ummi ese ena lalona ia hadaia Baibel be Dahaka Ia Hadibaia? bukana be Iehova ena Witnes tauna ta ida ia stadilaia totona.

Namona be ita danu ese taunimanima edia toana ita laloa lasi, lalokau ita hahedinaraia, bona mai haheauka ida taunimanima idauidau ita kara henia. (1 Tim. 2:3, 4) Bema unai ita karaia, taunimanima edia kudouna ita hamarerea diba, Peter hegeregerena, ena be iena toana be ia miro bada, to iena kudouna be ia namo. Momokani, “kudouna ia itaia” Diravana, ese kudou-maoro taudia edia kudouna ai hereva momokani ia hatubua diba.​—⁠1 Sam. 16:7; Ioa. 6:44.