Iesu be tanobada dekenai ia do mai lasi neganai, ia be guba dekenai ia noho aneru ta; unai dainai, ia be ita bamona lasi. (Ioane 8:23) Ia be Dirava ese ia havaraia tauna ginigunana, bona Dirava ia durua gau ibounai idia karaia totona. Iesu be Iehova sibona ese ia havaraia dainai, Baibel ese ia gwauraia diba, Dirava ena Natuna “korikorina.” Danu, Iesu be Dirava ena hereva gwauraia tauna dainai, Baibel ese ia gwauraia, “Hereva.”—Ioane 1:14.—Aonega Herevadia 8:22, 23, 30; Kolose 1:15, 16 duahia.

Dirava ese tanobada dekenai ena Natuna ia siaia dalana be inai: Iesu ena mauri be guba amo ia abia oho, bona rami-hebou Iuda kekenina ladana Maria, ena bogana lalonai ia atoa. Unai dainai, Iesu ena tamana be tanobada tauna ta lasi. (Luka 1:30-35) Iesu be tanobada dekenai ia mai ena badina be inai: (1) Dirava ena sivarai momokanina do ia hadibaia, (2) nega aukadia bona namodia ai Dirava ena ura ia karaia dalana be ita dekenai do ia haheitalaia, bona (3) ena mauri goevadaena do ia henia, iseda “mauri davana karaia totona.”—Mataio 20:28 duahia.

Mauri davana ena anina be tau ta ruhaia totona davana idia henia, haida ese idia hamasea lasi totona. (Esodo 21:29, 30) Dirava ese taunimanima ia karaia neganai, idia be do idia buruka lasi bona mase lasi. Unai be edena bamona ita hamomokania diba? Dirava ese tau ginigunana, Adamu, ia hamaoroa, bema ia ese Dirava ena taravatu ia utua, o Baibel ese ia gwauraia “kara dika” ia karaia, ia be do ia mase. Anina be,  bema Adamu ia kara dika lasi, ia be do ia mase lasi. (Genese 2:16, 17; 5:5) To Baibel ia gwau, Adamu dainai mase be tanobada ai ia “vareai.” Anina be, Adamu ese kara dika bona mase be ena bese ibounai dekenai ia henia hanai. Unai dainai, ta ese eda mauri davana ia karaia be gau badana, unai amo Adamu ese ia henia hanai gauna, mase, amo ita ia ruhaia.—Roma 5:12; 6:23 duahia.

Daika be ia hegeregere eda mauri davana ia karaia bena mase amo ita ia ruhaia? Ta ia mase neganai, ia sibona ena kara dika davana ia karaia. Ita be hegeregere lasi ma haida edia kara dika davana ita karaia, badina ita ibounai be goevadae lasi.—Salamo 49:7-9 duahia.

Iesu be goevadae tauna, ita bamona lasi. Bona ia sibona ena dika dainai ia mase be anina lasi, badina ia be kara dika ta ia karaia lasi. To, ia be ma haida edia kara dika dainai ia mase. Dirava be taunimanima ia lalokau henia bada dainai, ena Natuna ia siaia bona ita dainai ia mase. Iesu danu be ita ia lalokau henia dainai, ena Tamana ia kamonai henia, bona iseda kara dika dainai ena mauri ia henia.—Ioane 3:16; Roma 5:18, 19 duahia.

Iesu be tanobada ai ia noho neganai, gorere taudia ia hanamoa, mase taudia ia hatorea isi, bona hisihisi idauidau taudia ia durua. Unai amo ia hahedinaraia, vaira nega ai, ia idia kamonai henia taudia dekenai unai bamona kara namodia do ia karaia. (Mataio 15:30, 31; Ioane 5:28) Iesu ia mase murinai, Dirava ese ia hatorea isi lou, bona guba dekenai ia abia dae. (Efeso 1:20) Bena Iesu be Dirava ena idiba kahanai ia helai diho, bona unai nega amo ia naria noho ela bona Iehova ese siahu o maoro do ia henia, tanobada ibounai ia lohiaia totona. (Heberu 10:12, 13) To hari, Iesu be guba ai King gaukara ia karaia, bona ia murinai idia raka taudia ese unai sivarai namona be tanobada ibounai dekenai idia harorolaia noho.—Daniela 7:13, 14; Mataio 24:14 duahia.

Kahirakahira, Iesu ese ena siahu do ia gaukaralaia, hisihisi bona hisihisi idia havaraia taudia ia haorea totona. Iesu idia abidadama henia bona kamonai henia taudia ibounai be tanobada paradaisona ai do idia noho.—Salamo 37:9-11 duahia.