Dirava momokanina ese gau ibounai ia havaraia. Ia be matamana lasi bona dokona lasi. (Salamo 90:2) Ia be Baibel amo sivarai namona ia halasia Diravana. (1 Timoteo 1:11) Dirava ese ita ia havaraia dainai, ia sibona ita tomadiho henia be namo.—Apokalupo 4:11 duahia.

Dirava be Lauma dainai, ita itaia diba lasi. Momokani, ia ese ita tanobada taudia ia hereaia. (Ioane 1:18; 4:24) To, Dirava ese ia karaia gaudia amo ena kara ita dibaia diba. Hegeregere, flaoaflaoa bona au huahua idauidau ese ena lalokau bona aonega idia hahedinaraia. Danu, guba bona tanobada edia bada ese ena siahu idia hahedinaraia.—Roma 1:20 duahia.

Baibel duahia karana amo danu, Dirava ena kara ita dibaia diba. Hegeregere, Baibel amo Dirava ia ura henia gaudia, ia ura henia lasi gaudia, taunimanima ia kara henia daladia, edia kara hegeregeredia davana ia henia daladia, bona gau ma haida ita dibaia.—Salamo 103:7-10 duahia.

Iesu ia gwau: “Aiemai Tamana guba dekenai oi noho, namona be ibounai ese oiemu ladana do idia hahelagaia.” (Mataio 6:9) Ena be Dirava ena dagi ladadia be momo, to ena ladana korikorina be tamona. Taunimanima edia gado ta ta ai, unai ladana idia gwauraia daladia be idauidau. Hiri Motu gado ai ita gwau, “Iehova.” To, haida idia gwau, “Yahweh.”—Salamo 83:18 duahia.

Haida ese Dirava ena ladana korikorina be Baibel momo herea amo idia kokia, bona ena gabu ai dagi ladadia, hegeregere Lohiabada o Dirava, idia torea. To, toretore taudia ese Baibel idia torea neganai, Dirava ena ladana korikorina, Iehova, be  nega 7,000 bamona Baibel lalonai idia torea. Iesu ese Dirava ena sivarai be taunimanima dekenai ia hadibaia neganai, Dirava ena ladana korikorina ia hadibaia danu.—Ioane 17:26 duahia.

Oi laloa Iehova Dirava be ita ia laloa bada lasi dainai ita ibounai ese hisihisi ita davaria, a? Haida idia gwau, Dirava be dika gaudia o hisihisi amo ita ia tohoa, to edia lalohadai be koikoi.—Iamesi 1:13 duahia.

Dirava ese ita ta ta dekenai ura kwalimu (freedom) ia henia, sibona eda abia hidi ita karaia totona. Unai ese ia hahedinaraia, Dirava be ita ia laloa bada bona matauraia. To, eda ura kwalimu ita gaukaralaia namonamo, a? Hegeregere, ita ese Dirava hesiai henia karana ita abia hidi, a? (Iosua 24:15) To, momo be ma haida hadikaia karadia idia abia hidi o karaia dainai, hutuma idia hisihisi. Iehova be taunimanima edia kara gageva ia itaia, bona iena lalohisihisi be ia bada momokani.—Genese 6:5, 6 duahia.

Iehova Dirava be ita ia laloa bada. Ia ura mauri do ita moalelaia. Kahirakahira, ia ese hisihisi bona hisihisi idia havaraia taudia do ia haorea. To, badina namona ta ia noho dainai, Dirava ese nega kwadogina ai idia vara hisihisi idauidau ia koua lasi. Karoa 8 ai, unai badina do ita dibaia.—2 Petero 2:9; 3:7, 13 duahia.

Iehova ia ura guriguri amo ia ita hereva henia—ia ita tura henia dalana ta be unai. Ia be ita ta ta ia laloa bada. (Salamo 65:2; 145:18) Ia ura eda dika ia gwauatao. Ia itaia, ita gaukara goada ia hamoalea karadia ita karaia, ena be nega haida kerere ita karaia danu. Unai dainai, ena be ita goevadae lasi, to Dirava ita tura henia diba.—Salamo 103:12-14; Iamesi 4:8 duahia.

Iehova ese ita ia havaraia dainai, namona be ia ita lalokau henia—unai ese ma haida lalokau henia karana ia hereaia be namo. (Mareko 12:30) Dirava oi lalokau henia dainai, ena sivarai ma haida oi stadilaia bona ia ura henia karadia oi karaia neganai, iena turana ai do oi lao.—1 Timoteo 2:4; 1 Ioane 5:3 duahia.