Lau be Hungary, Székesfehérvár siti ai lau vara. Lagani 1,000 lalonai unai siti ai gau idauidau ia vara. Bona unuseniai tanobada tuarina iharuana ia vara murinai tano ai maka idauidau idia noho.

Lau maragi neganai egu tubuna tau bona tubuna hahine ese lau idia naria, idia lau lalokau henia, to egu tubuna hahine, Elisabeth lau lalokau henia bada. Badina lau ia durua Dirava do lau abidadama henia totona. Egu mauri lagani be 3 neganai, adorahi ibounai, ai ese inai guriguri Lohiabada ena Guriguri ai gwauraia. Ena be unai ai karaia, to unai guriguri ena anina lau diba lasi ela bona egu mauri lagani be 20.

Egu tubuna tau bona hahine ese lau idia naria badina egu tama sina be dina bona hanuaboi idia gaukara, unai amo ruma namona ta idia hoia diba. Hua ta lalonai nega rua emai famili ibounai idia aniani hebou. Unai nega namodia lalonai ai moale bada, bona do lau laloa boio diba lasi.

Lagani 1958 ai, egu tama sina ese ruma ta idia hoia bona ai toi be unai ruma dekenai ai noho. Egu tama sina ida lau noho dainai lau moale bada! To hua 6 murinai gau ta ia vara, egu tamana be kensa gorere ia abia bona ia mase.

Lau lalohisihisi bada. Lau laloatao lau guriguri bona lau gwau: “Dirava oi lau noia egu tamana oi hanamoa totona. Lau ura ai ida do ia noho, to dahaka dainai egu noinoi oi kamonai lasi?” Lau ura bada egu tamana ia noho gabuna lau diba. Lau laloa: ‘Reana guba dekenai ia lao? Eiava do ia mauri lou lasi, a?’ Bena edia tamana ia do noho natudia dekenai lau mama.

Lagani momo lalonai, kahirakahira dina ibounai lau be gara gabuna dekenai lau lao. Egu tamana ena gara badinai do lau tui diho bona lau guriguri bona do lau gwau: “Dirava lau ura diba egu tamana be edeseniai ia noho.” Danu, lau guriguri mauri ena anina lau diba totona.

Egu mauri lagani be 13 neganai, egu lalona lau hadaia German gado do lau dibaia totona. Lau laloa reana German gado ena buka idauidau amo egu henanadai edia haere do lau davaria. Lagani 1967 ai, siti ta ladana Jena ai German gado lau dibaia matamaia bena gabeai ist Germany dekenai lau lao. Bona mai ura bada ida German ena diba bada taudia edia buka, hegeregere taunimanima idia mauri ena anina idia herevalaia bukadia lau duahia. Ena be unai buka ta ta ese lalohadai namodia haida ia henia, to lau do daradara. Unai dainai haere maorona totona lau guriguri noho.

Lagani 1970 ai lau giroa lao Hungary dekenai, unuseniai Rose lau davaria bona ai headava. Unai nega ai tano be komiunis gavamani ese ia naria. Lau bona Rose ai headava murinai, Austria dekenai ai lao. Ai ura Sydney Australia dekenai do ai lao, badina egu vavana be unuseniai ia noho.

Daudau lasi murinai, Austria ai gaukara lau davaria. Dina ta, ai gaukara hebou tauna ta ia gwau egu henanadai ibounai edia haere be Baibel lalonai lau davaria diba. Baibel idia herevalaia bukadia rua be lau dekenai ia henia. Maoromaoro unai buka lau duahia ore bona lau ura diba ma haida lau abia. Unai dainai, Iehova Ena Witnes taudia dekenai revareva lau torea, badina idia ese unai buka idia halasia.

Lau bona Rose emai wedin anniversary ginigunana ai, Austria ai Witnes tau matamatana ta ese ai ia vadivadi henia. Bona lau ura henia pablikeisen ia mailaia bena Baibel stadi ia herevalaia bona lau abia dae. Lau ura bada diba lau abia dainai, wiki tamona lalonai nega rua ai stadi bona hora foa lalonai ai stadi!

Witnes taudia ese Baibel amo lau idia hadibaia gaudia dekenai lau hoa. Hungary gado Baibel amo Dirava ena ladana, Iehova idia hahedinaraia neganai lau hoa bada. Lagani 27 lalonai dubu dekenai lau lao, to nega ta Dirava ena ladana lau kamonai lasi. Lau moale badina Baibel amo egu henanadai edia haere maorona lau abia. Hegeregere, stadi amo lau diba mase taudia be gau ta idia diba lasi, bona unai be hegeregere idia mahuta boio bamona. (Hadibaia Tauna 9:​5, 10; Ioane 11:11-​15) Danu, lau dibaia gauna ma ta be Baibel ena gwauhamata tanobada matamata totona bona unai nega ai, ‘mase be do ia ore.’ (Apokalupo 21:​3, 4) Lau ura tanobada matamata ai egu tamana lau itaia lou, badina mase taudia be “do idia toreisi lou.”​​—Kara 24:15.

Rose be mai ura ida lau ia bamoa bona Baibel ai stadilaia. Senisi ai karaia haraga bona hua rua lalonai ai stadilaia bukana ai haorea! Kingdom Hall ai Witnes taudia edia hebou ibounai dekenai ai lao. Witnes taudia huanai idia hahedinaraia lalokau, heduru karana bona lalotamona ai itaia neganai ai moale bada.—Ioane 13:34, 35.

Lagani 1976 ai, lau bona Rose be gwaumaoro ai abia Australia dekenai ai noho totona. Maoromaoro Iehova ena Witnes taudia ai tahua. Emai kongrigeisen taudia be mai moale ida ai idia welkam henia. Lagani 1978 lalonai, ai be Witnes taudia ai ai lao.

Lau moale badina lagani daudau lalonai lau lalohekwarahilaia henanadai edia haere lau davaria. Iehova Dirava kahirakahira lau lao dainai, lau be Tama hereadaena lau davaria. (Iamesi 4:8) Bona lau moale badina tanobada matamata lalonai egu tamana korikorina do lau itaia lou.—Ioane 5:​28, 29.

Lagani 1989 ai, lau bona Rose ai palani Hungary dekenai do ai giroa lao bona ai abia dae gaudia be emai turadia, famili bona do ai davaria taudia dekenai ai herevalaia totona. Ai moale bada badina taunimanima handred momo dekenai Baibel ai hadibaia. Taunimanima 70 mai kahana be ai ida Iehova ena hesiai gaukara idia karaia, egu sisina danu.

Lagani 17 lalonai lau guriguri egu henanadai edia haere lau abia totona. Lagani 39 idia hanaia vadaeni bona lau do guriguri noho, to hari lau gwau diba: “Tanikiu bada, egu guba Tamana lalokauna e, badina lau maragi neganai lau gwauraia guriguri ibounai oi haerelaia.