Emu mauri be Iehova dekenai oi gwauhamatalaia bona oi bapatiso lalohadaina ese oi ia hagaria, a? Bema oibe, inai atikol ese oi do ia durua unai gari oi hanaia totona.

Inai atikol lalonai

•  Edena bamona bema bapatiso murinai kara dika badana lau karaia?

•  Edena bamona bema bapatiso tauna ena gaukara dekenai lau gari?

•  Edena bamona bema lau hegeregere lasi Iehova lau hesiai henia totona?

•  Emu turadia edia hereva

 Gari ena badina: Reana kara dika badana ia karaia bona kongrigeisen amo idia atoa siri tauna ta oi diba. (1 Korinto 5:11-13) Reana oi laloa oi be unai bamona do oi karaia danu.

 “Bapatiso lau lalohadailaia neganai, dika kerere do lau karaia dainai lau gari. Bona lau laloa egu kara dainai egu tama sina do idia hemarai bada.”​—Rebekah.

 Siri badana: “Namona be kara dika tauna be ena dala kererena ia rakatania . . . Namona be Iehova dekenai ia giroa lou, badina ia dekenai do ia hebogahisi, iseda Dirava ese kara dika ibounai do ia gwauatao momokani.”​—Isaia 55:7.

 Inai oi laloa: Ena be idia helalo-kerehai lasi taudia be kongrigeisen amo idia atoa siri, to mai edia kudouna ibounai ida idia helalo-kerehai bona sisiba idia abia dae taudia dekenai Iehova be hebogahisi ia hahedinaraia.​—Salamo 103:13, 14; 2 Korinto 7:11.

 Mai anina bada gauna be inai: Ena be oi be goevadae lasi, to Dirava ena heduru amo hahetoho oi dadaraia diba. (1 Korinto 10:13) Laloatao, oi ese abia hidi do oi karaia, ma ta ese do karaia lasi, ani?

 “Lau gari badina lau laloa bapatiso murinai reana kara dika ta do lau karaia, to lau laloparara bema lau bapatiso lasi, unai danu be kerere. Danu lau itaia, bema gabeai do idia vara gaudia lau lalohekwarahilaia momo, hari lau karaia diba gauna do lau hagugurua diba lasi.”​—Karen.

 Point badana: Emu lalona oi hadaia diba kara dika badadia oi dadaraia totona​—Iehova ena hesiai taudia momo herea be unai bamona idia karaia.​—Filipi 2:12.

 Heduru ma haida oi ura? “Edena Dala ai Hahetoho Lau Dadaraia Diba?” itaia.

 Gari ena badina: Hegeregere, reana matamata taudia haida oi diba, idia be edia famili bona turadia idia rakatania, bona gabu daudauna idia lao Iehova idia hesiai henia totona. Bona oi lalohekwarahi, badina oi laloa tadikaka taihu do idia laloa oi danu be unai bamona oi karaia be namo.

 “Dala ia kehoa ia bapatiso vadaeni Keristani tauna be gaukara momo ia karaia totona, to taunimanima haida be idia redi lasi, eiava edia noho dalana be ia hegeregere lasi unai idia karaia totona.”​—Marie.

 Siri badana: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.”​—Galatia 6:4.

 Inai oi laloa: Namo lasi ma haida ida oi sibona oi hahegeregerea, to Mareko 12:30 ena hereva do oi laloa, ia gwau: ‘Emu Dirava do oi lalokau henia mai emu kudouna ibounai ida.’

 Namona be emu kudouna ibounai ida Iehova oi hesiai henia, ma ta ena kudouna amo unai oi karaia diba lasi. Bema Iehova oi lalokau henia, dala do oi tahua emu goada hegeregerena ai Ia oi hesiai henia totona.

 “Bapatiso be mai anina bada, bona ia be emu mauri do oi hametaua lasi. Bema tadikaka taihu goadadia oi bamoa, oi do idia durua totona. Metairametaira maduna haida oi abia neganai do oi moale. Bema bapatiso oi dadaraia, oi sibona emu mauri oi hadikaia.”​—Julia.

 Point badana: Iehova ese oi dekenai ia hahedinaraia lalokauna dainai, namona be emu kara amo oi hahedinaraia unai oi laloa bada. Unai ese oi do ia durua emu goada ibounai ida oi hesiai henia totona.​—1 Ioane 4:19.

 Heduru ma haida oi ura? “Egu Maduna Lau Huaia Namonamo, A?” itaia.

 Gari ena badina: Iehova be guba bona tanobada edia Lohia Badana, to ita taunimanima be anina lasi! Reana oi laloa, Iehova be oi ia itaia lasi!

 “Egu tama sina be Iehova ena Witnes Taudia dainai, lau laloa egu hetura karana Iehova ida be idia amo lau abia ‘ahuna’ ta, to Iehova sibona ese lau ia boiria lasi.”​—Natalie.

 Siri badana: “Tau ta be lau dekenai do ia mai diba, bema Tamana, lau ia siaia tauna ese ia veria mai.”​—Ioane 6:44.

 Inai oi laloa: Bapatiso oi lalohadailaia dainai, unai ese ia hamomokania Iehova be oi ia boiria iena turana ai oi lao totona. Iena boiboi oi abia dae be namo.

 Danu, laloatao, Iehova kahirakahira oi lao ena abia hidi be oi eiava ma ta ese do ia karaia lasi, unai abia hidi be Iehova sibona ese ia karaia. Bona Baibel ena gwauhamata be “Dirava kahirakahira umui lao, bona ia be umui kahirakahira do ia mai.”​—Iamesi 4:8.

 “Iehova oi diba bona ia ese oi ia veria mai ia dekenai ese ia hamomokania ia be oi ia lalokau henia. Unai dainai, bema oi laloa oi be hegeregere lasi ia oi hesiai henia totona, namona be sibona oi hamaoroa, Iehova be unai bamona ia laloa lasi. Bona ia be hanaihanai ia maoro.”​—Selina.

 Point badana: Bema Baibel ena taravatu hegeregerena bapatiso oi abia, unai ena anina be oi be hegeregere Iehova oi tomadiho henia totona. Oibe, ia oi tomadiho henia be maoro.​—Apokalupo 4:11.

 Heduru ma haida oi ura? “Dahaka dainai lau Guriguri be Namo?” itaia.