Parte sa iya rekord sang mga hitabo sa kabuhi ni Jesus, si apostol Juan nagsulat: “Sia nga nakakita sini nagpanaksi, kag ang iya panaksi matuod, kag nahibaluan sini nga tawo nga nagahambal sia sang matuod nga mga butang, agod magpati man kamo.”—Juan 19:35.

 Ang isa ka rason nga masaligan ang rekord sang Ebanghelyo nanday Mateo, Marcos, Lucas, kag Juan amo nga sang ginsulat ini buhi pa ang madamo nga nakasaksi sang mga hitabo nga ginrekord. Suno sa pila ka reperensia, ang Ebanghelyo ni Mateo ginsulat sang mga 41 C.E., mga walo ka tuig sa tapos napatay ang Cristo. Madamo nga iskolar ang nagasiling nga ginsulat ini sang ulihi pa. Pero ginbaton sang halos kalabanan sa ila nga ang tanan nga tulun-an sang Cristianong Griegong Kasulatan ginsulat sang unang siglo C.E.

 Ang mga nakakita mismo kay Jesus kag nakasaksi sang iya kamatayon kag pagkabanhaw buhi pa sang ginsulat ang mga Ebanghelyo. Gani mapamatud-an nila kon eksakto ukon indi ang ginsulat diri. Si Propesor F. F. Bruce nagsiling: “Nangin epektibo gid ang pagbantala sang mga apostol kay indi lamang sila makasiling, ‘Nasaksihan namon ining mga butang,’ kundi ‘Subong sang nahibaluan man ninyo’ (Binuhatan 2:22).”