“Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4, Bag-ong Kalibutan nga Badbad.

 “Pagapahiran niya ang tanan nga mga luha sa ila mga mata. Wala na sing kamatayon, kasubo, paghibi, ukon kasakit. Ang daan nga mga butang wala na.”—Bugna 21:4, Maayong Balita nga Biblia.

 Nagpromisa ang Dios nga dulaon niya ang kasakit kag pag-antos nga naeksperiensiahan sang mga tawo subong kag pati man ang mga rason sini nga mga problema.

 “Pahiran niya ang tagsa ka luha sa ila mga mata.” Ginapadaku sini nga mga tinaga ang promisa ni Jehova a nga ginsulat ni manalagna Isaias nga ‘pahiran Niya ang luha sa tanan nga nawong.’ (Isaias 25:8; Bugna 7:17) Ini nga mga tinaga nagapakita sang mapinalanggaon nga pag-atipan sang Dios sa mga nagahibi bangod napatyan sila sang pinalangga ukon iban pa nga rason sang pag-antos.

 “Wala na sing kamatayon.” Ini nga ekspresyon puede man i-translate nga “indi na magaluntad ang kamatayon” ukon “dulaon na ang kamatayon.” Nagpromisa ang Dios nga dulaon ang kamatayon kag ang pag-antos nga resulta sini. Dugang pa, may ara sang pagkabanhaw. (1 Corinto 15:21, 22) Gani, ang kamatayon dulaon.—1 Corinto 15:26.

 “Ukon paglalaw ukon paghibi ukon kasakit pa.” Ang promisa sang Dios wala nagakahulugan nga indi na makabatyag sang kasakit ang mga tawo pareho sang pisikal nga kasakit nga nagapaandam sa aton sa mga katalagman ukon posible makahalit sa aton. Ini nga promisa nagasugid nga ang tanan nga mental, emosyonal, kag pisikal nga kasakit bangod sang sala b kag bangod indi kita perpekto, madula na.—Roma 8:21, 22.

 “Ang mga butang sang una nagtaliwan na.” Ining hingapusan nga ekspresyon nagsugid sang daku nga pagbag-o nga maeksperiensiahan sang mga tawo. Ang isa ka reperensia nagsiling: “Ang naandan nga pagkabuhi sang mga tawo, sa diin ang kamatayon, paglalaw, paghibi, kag kasakit indi malikawan, islan sang bag-o nga paagi sang pagkabuhi.” Ang mga tawo mabuhi sing wala katapusan sa duta nga may maayo nga kahimtangan, pareho sa orihinal nga katuyuan sang Dios.—Genesis 1:27, 28.

 Sa umpisa sang kapitulo 21, ginsugid ni apostol Juan ang nakita niya sa isa ka palanan-awon: “Nakita ko ang isa ka bag-o nga langit kag ang isa ka bag-o nga duta.” (Bugna 21:1) Ginasugid sini ang daku nga pagbag-o nga gintagna man sa iban nga mga bersikulo sa Biblia. (Isaias 65:17; 66:22; 2 Pedro 3:13) Ang gobierno sang Dios sa langit, ukon ang “bag-o nga langit,” magabulos sa tanan nga gobierno sang tawo kag magagahom sa “bag-o nga duta,” nga amo ang bag-o nga grupo sang mga tawo nga magakabuhi sa duta.—Isaias 65:21-23.

 Paano mabal-an nga ini nga palanan-awon parte sa kabuhi diri sa duta? Una, nag-umpisa ang promisa sang Dios sa sini nga mga tinaga: “Ang tolda sang Dios yara sa mga tawo.” (Bugna 21:3) Gani ini nga promisa ginhatag sa mga tawo sa duta, indi sa mga anghel sa langit. Ikaduha, ginsugid sang palanan-awon nga may isa ka kalibutan nga “wala na sing kamatayon.” (Bugna 21:4) Wala gid sang nagakapatay sa langit. Ang mga tawo sa duta lang ang nagakapatay. (Roma 5:14) Gani, mapatihan gid nga ini nga bersikulo nagasugid sang matabo sa duta sa palaabuton.

 Tan-awa ining malip-ot nga video para mahibaluan mo ang sumaryo sang libro sang Bugna.