Ano ang Pagtamod sang mga Saksi ni Jehova sa Pagdiborsio?

I-PLAY

Ginasunod namon kon ano ang pagtamod sang Biblia sa pag-asawahay kag pagdiborsio. Ginhimo sang Dios ang pag-asawahay nga mangin permanente nga pag-updanay sang lalaki kag babayi. Suno sa Biblia, ang lamang nga basihan nga makadiborsio ang mag-asawa amo ang seksuwal nga imoralidad.—Mateo 19:5, 6, 9.

Ginabuligan bala sang mga Saksi ang mga may problema sa ila pag-asawahay?

Huo, ari ang pila ka paagi:

Publikasyon. Ang amon mga publikasyon may ara pirme artikulo nga nagapabakod sa pag-asawahay, bisan pa daw imposible na masolbar ang problema. Halimbawa, tan-awa ang mga artikulo nga “Hupti ang Katutom sa Imo Tiayon,” “Paano Magpatawad?,” kag “Pagpasag-uli sang Pagsalig sa Pag-asawahay.”
Miting. Ginabinagbinag namon ang praktikal nga mga laygay para sa pag-asawahay sa amon mga pagtilipon, asembleya, kag kombension.
Gulang. Ginabuligan sang mga gulang sa amon kongregasyon ang mga mag-asawa paagi sa pagpatalupangod sa ila sang mga bersikulo sa Biblia pareho sang Efeso 5:22-25.

Kinahanglan bala aprobahan sang mga gulang sa kongregasyon ang pagdiborsio sang isa ka Saksi?

Indi. Bisan pa ginapangabay ang mga gulang nga buligan ang mga mag-asawa nga may problema, wala sila sing awtoridad nga diktahan ang mag-asawa kon ano ang ila himuon. (Galacia 6:5) Pero, kon magdesisyon ang isa nga magdiborsio nga wala sing basihan sa Biblia, indi sia mahatagan sing pinasahi nga pribilehiyo sa kongregasyon kag indi sia hilway nga magminyo liwat suno sa talaksan sang Biblia.—1 Timoteo 3:1, 5, 12.

Ano ang pagtamod sang mga Saksi sa pagbulagay?

Ginapalig-on sang Biblia ang mag-asawa nga indi magbulagay bisan pa mabudlay ang ila sitwasyon. (1 Corinto 7:10-16) Madamo nga problema ang masolbar paagi sa hugot nga pagpangamuyo, pagtuman sa mga prinsipio sa Biblia, kag pagpakita sing gugma.—1 Corinto 13:4-8; Galacia 5:22.

Pero, mahimo magdesisyon ang isa ka Cristiano nga magbulag sa iya tiayon bangod sa pila ka grabe nga kahimtangan, pareho sang masunod:

Hungod nga indi pagsuporta.—1 Timoteo 5:8.
Pisikal nga pagpanakit.—Salmo 11:5.
Nabutang sa katalagman ang espirituwalidad. Halimbawa, mahimo ginapilit sang isa ang iya tiayon nga Saksi nga indi pagtumanon ang pila ka sugo sang Dios, kag ang tiayon mahimo magdesisyon nga magbulag kay amo lamang ini ang paagi nga ‘matuman niya ang Dios subong manuggahom sa baylo sang mga tawo.’—Binuhatan 5:29.