Madamo gid kamo sang pagkaanggid sang imo tiayon—ina sang antes kamo ginkasal. Subong, bangod sa sayop nga pagpaabot nagalayo ang inyo buot sa isa kag isa, kag pamatyag mo daw priso kamo nga duha, sa baylo nga mangin malipayon nga magkaupod.

Mahimo mangin malipayon ang inyo kaangtanan. Pero, dapat mo anay hibaluon ang kabangdanan sang imo sayop nga pagpaabot.

Nakita mo na ang kamatuoran. Ang adlaw-adlaw nga pag-obra, pagpadaku sang kabataan, kag pagpakigbagay sa mga ugangan mahimo amat-amat nga nagaguba sang inyo kalipay. Dugang pa, mahimo man maapektuhan ang pag-asawahay sang wala ginapaabot nga mga problema—pareho sang problema sa kuarta ukon pag-atipan sang miembro sang pamilya nga may malala nga balatian.

Daw indi na maagwanta ang inyo kinatuhayan. Mahapos nga indi pagsapakon ang mga kinatuhayan kon naganobyohanay pa lang. Pero sang mag-asawahay na, makita sang lalaki kag babayi nga daku gid ang ila kinatuhayan sa pagpakigkomunikar, pagbadyet sang kuarta, ukon pagsolbar sang problema. Ang mga kinatuhayan nga sang una daw naugtan lang sang isa, subong daw indi na maagwanta.

Nagalayo ang inyo buot sa isa kag isa. Kon magdugay, ang masakit nga mga tinaga kag mga problema nga wala masolbar, mahimo bangdan nga indi na pag-ipabutyag sang isa ang iya nabatyagan sa iya tiayon, ukon ang mas malala pa sini, amo nga makapalambo sia sang emosyonal nga kaangtanan sa iban.

Indi matuod nga pagpaabot. Ang iban nagapakasal bangod nagapati sila nga nakita na nila ang tawo nga nagakabagay sa ila. Bisan pa ina nga ideya daw romantiko, mahimo ini mangin siod sa isa. Kon mag-abot na ang mga problema, nagakapaslawan ang mag-asawa, amo nga nagahunahuna sila nga nagsayop sila sa ila desisyon.

Magpokus sa maayo nga mga kinaiya sang imo tiayon. Tilawi ini: Isulat ang tatlo ka maayo nga kinaiya sang imo tiayon. Tagua ini, mahimo sa likod sang inyo piktyur sa kasal ukon sa imo gadyet. Tan-awa pirme ini nga listahan para mapahanumdom ka kon ngaa nagpakasal ka sa imo tiayon. Ang pagpokus sa maayo nga kinaiya sang imo tiayon magadala sing paghidait kag makabulig sa imo nga indi pagsapakon ang inyo mga kinatuhayan.—Prinsipio sa Biblia: Roma 14:19.

Maghinguyang sing tion sa isa kag isa. Antes kamo ginkasal, mahimo nga nagapain kamo sang tion para maghimo sang mga butang nga magkaupod. Ginaplano gid ninyo nga mag-updanay. Himua man ina subong. Planuha ang mga okasyon nga espesyal nga makaupdanay kamo sang imo tiayon, nga daw nagadeyt lang kamo. Ang paghimo sini makabulig nga magsuod kamo sa isa kag isa kag mahandaan ang wala ginapaabot nga mga problema.—Prinsipio sa Biblia: Hulubaton 5:18.

Ipabutyag ang imo nabatyagan. Kon nasakitan ka bangod sang ginsiling ukon ginhimo sang imo tiayon, mahimo ayhan nga mapalampas mo ini? Kon indi, mangin hamtong kag likawi nga indi sia pagbugnuhon. Kalmado nga istoryaha dayon ang imo tiayon, sa sina mismo nga adlaw kon posible.—Prinsipio sa Biblia: Efeso 4:26.

Hibalua ang kinatuhayan sang imo ginabatyag kag sang intension sang imo tiayon. Mahimo nga wala sa inyo ang luyag magsakit sang balatyagon sang kada isa. Pasaliga ang imo tiayon paagi sa sinsero nga pagpangayo sing patawad sa bisan ano nga nahimo mo nga nakasakit sa iya. Dayon istoryahi ninyo kon ano ang mga espesipiko nga dapat himuon para indi na ninyo masakit ang balatyagon sang kada isa. Sunda ang laygay sang Biblia: “Mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa.”—Efeso 4:32.

Mangin realistiko sa imo mga ginapaabot. Nakahibalo ang Biblia nga ang mga nagapangasawa “may kapipit-an sa ila unod.” (1 Corinto 7:28) Kon maeksperiensiahan mo ini, indi dayon maghinakop nga sala ang imo desisyon nga magminyo. Kundi, magbuligay kamo sang imo tiayon nga solbaron ang mga kinatuhayan kag “padayon nga batasa ninyo ang isa kag isa kag patawaron sing kinabubut-on ang isa kag isa.”—Colosas 3:13.