Daku gid ang gingasto sa inaway.

•   “Sang nagligad nga tuig ang mga gobierno sa bilog nga kalibutan naggasto sang $2.2 ka trilyon sa pila ka inaway. Amo ini ang pinakadaku nga nagasto nila sa inaway sa bisan ano nga tuig halin sang una.”—The Washington Post, Pebrero 13, 2024.

 Magluwas nga daku ang gasto sa inaway, binagbinaga ang halit nga nahimo sini. Ari ang isa ka halimbawa: Ang inaway sa Ukraine.

•   Mga soldado. Ang pila ka eksperto nagapati nga halos 500,000 ka soldado ang napatay ukon nasamaran halin sang nagsugod ang inaway duha ka tuig ang nagligad.

•   Mga sibilyan. Sobra 28,000 ka tawo ang napatay ukon nasamaran, base sa ginsiling sang United Nations. Pero, ang isa ka senior UN official nagsiling: “Indi posible nga maisip kon ano kadamo nga kabuhi ang naguba bangod sining makahalalit nga inaway.” a

 Daku katama ang halit sang inaway kag kinagamo sa mga tawo sa bilog nga kalibutan.

•   114 ka milyon. Ang kadamuon sang mga tawo nga napilitan nga magbakwit bangod sang inaway kag pagpamintas sa bilog nga kalibutan asta sang Septiembre 2023.

•   783 ka milyon. Ang kadamuon sang mga tawo nga wala sang bastante nga pagkaon. “Ang kinagamo amo gihapon ang pinakadaku nga rason sang gutom, 70 ka porsiento sa mga tawo nga ginagutom sa kalibutan ang nagaistar sa mga lugar nga naapektuhan sang inaway kag pagpamintas.”—World Food Programme.

 May katapusan gid bala ang inaway? Malauman gid bala naton nga may paghidait? Maabot ayhan ang tion nga wala na sing pigado kag ang tanan malipay sa ginapatubas sang duta kag may bastante na nga pagkaon? Ano ang ginasiling sang Biblia?

 Gintagna sang Biblia nga may mga inaway sa bilog nga duta, ginasimbulo ini sang manugkabayo nga nagasakay sa kabayo.

•   “May isa pa nga naggua, isa ka kabayo nga daw kalayo ang kolor, kag ang isa nga nagasakay sa sini gintugutan sa pagkuha sing paghidait sa duta agod magpinatyanay sila, kag ginhatagan sia sing isa ka daku nga espada.”—Bugna 6:4.

 Ang simbuliko nga manugkabayo ginasundan sang duha pa nga nagarepresentar sang lapnag nga tiggulutom kag kamatayon bangod sang balatian kag iban pa nga rason. (Bugna 6:5-8) Para mahibaluan sing dugang ang parte sa sining tagna sa Biblia kag kon ngaa makasigurado kita nga nagakatabo na ini sa aton tion subong, basaha ang artikulo nga “Ang Apat ka Manugkabayo—Sin-o Sila?”

 Sa indi madugay, ang manggad sang kalibutan indi na paggamiton para sa inaway. Pero, indi ini resulta sang pagtinguha sang mga tawo. Ang Biblia nagasiling:

•   ‘Pauntaton sang Dios ang mga inaway sa bug-os nga duta.’—Salmo 46:9.

•   Dulaon sang Dios ang makahalalit nga epekto sang inaway. “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.

•   Siguraduhon sang Dios nga ang tanan magakabuhi nga may paghidait. “Ang akon katawhan magapuyo sa malinong nga puluy-an, sa mga balay nga may kalig-unan kag sa mga palahuwayan nga matawhay.”—Isaias 32:18.

 Base sa tagna sang Biblia, ang mga inaway kag iban pa nga nagakatabo subong nagapakita nga malapit na lang ang tion nga may paghidait na.

 Paano himuon sang Dios nga may paghidait na sa palaabuton? Himuon niya ini paagi sa iya gobierno sa langit, ukon Ginharian. (Mateo 6:10) Para mahibaluan kon ano ining Ginharian kag ano ang mahimo sini sa imo, tan-awa ang malip-ot nga video nga Ano ang Ginharian sang Dios?