Mabudlay gid kon madulaan ka sang obra kay wala ka na sing kita. Pero mabudlay pa gid ini kay mahimo nabalaka ka kag nasubuan kay indi mo na maatipan ang mga kinahanglan sang imo pamilya. Ang masunod nga mga panugda base sa mga prinsipio sa Biblia nga pirme masaligan makabulig sa imo sa sining mabudlay nga tion.

•   Isugid sa iban ang imo ginabatyag.

   Ang ginasiling sang Biblia: “Ang matuod nga abyan nagahigugma sa tanan nga tion.”—Hulubaton 17:17.

   Kon madulaan ka sang obra, posible masubuan ka, maakig, indi kabalo sang imo himuon, kag posible nga magbatyag ka nga wala ka na sing pulos. Kon isugid mo ini sa imo pamilya kag sa imo suod nga mga abyan, mabuligan ka nila nga maghaganhagan ang imo ginabatyag. Mahimo nga makahatag pa sila sang praktikal nga mga paagi para makakita ka sang bag-o nga obra.

•   Likawi ang sobra nga pagkabalaka.

   Ang ginasiling sang Biblia: “Indi gid ninyo pagkabalak-i ang buas, kay ang buas may kaugalingon nga mga kabalaka.”—Mateo 6:34.

   Ginapalig-on kita sang Biblia nga magplano sing abanse. (Hulubaton 21:5) Pero, nagalaygay man ini nga indi magkabalaka sing sobra parte sa palaabuton. Kay man, masami naton ginakabalak-an ang mga butang nga wala man nagakatabo. Mas maayo kon magpokus kita sa aton himuon para sa sini lang nga adlaw.

   Ang Biblia nagahatag sang praktikal nga mga laygay kon ano ang imo himuon kon na-stress ka na gid. Para sa dugang nga impormasyon, basaha ang artikulo nga “Kon Paano Atubangon ang Stress.”

•   Maghimo sing pagbag-o sa imo badyet.

   Ang ginasiling sang Biblia: “Nahibaluan ko kon paano magkabuhi . . . bugana man ukon ginakulang.”—Filipos 4:12.

   Mag-adjust sa imo sitwasyon subong. Nalakip sa sini ang pagbuhin sang imo mga ginagastuhan para indi magsobra ang imo gasto sangsa imo masarangan. Tinguhai man nga indi magpangutang kon posible.—Hulubaton 22:7

   Para sa dugang nga panugda kon paano ka maka-adjust sa imo sitwasyon subong, basaha ang artikulo nga “Ano ang Himuon Mo Kon Kulang ang Imo Ginakita?”

•   Gamita sing maayo ang imo tion.

   Ang ginasiling sang Biblia: “Mangin maalamon . . . , nga ginagamit sing maayo ang inyo tion.”—Colosas 4:5.

   Bisan pa wala ka na sing iskedyul para mag-obra, tinguhai nga i-iskedyul gihapon ang tanan mo nga hilikuton. Kon amo sini ang himuon mo, mamentinar mo ang maayo nga rutina sa imo kabuhi kag indi ka magbatyag nga wala ka sing pulos.

•   Testingi ang iban nga obra.

   Ang ginasiling sang Biblia: “May kaayuhan sa tanan nga sahi sang pagpangabudlay.”—Hulubaton 14:23.

   Magsulod sa obra nga lain sa obra mo sadto. Basi puede ka mag-obra sang kubos nga obra ukon sang obra nga mas gamay ang sueldo.

•   Indi mag-untat sa pagpangita sang obra.

   Ang ginasiling sang Biblia: “Isab-ug ang imo binhi sa aga tubtob sa gab-i; kay wala ka makahibalo kon diin ang magatubo.”—Manugwali 11:6.

   Indi mag-untat sa pagpangita sang obra. Sugiri ang iban nga nagapangita ka sang obra. Hambali ang imo mga paryente, kakilala, mga upod sa obra sadto, kag mga kaingod. Magkadto sa mga ahensia nga nagapangita sang trabahador, basaha ang mga pahibalo sa newspaper ukon ang mga poster nga nagatanyag sang trabaho, kag buksi ang mga website sang mga kompanya kay basi nagapangita sila sang mga aplikante. Ang matuod, mahimo nga madamo ka anay sang ma-submit nga mga résumé kag maagyan nga mga interbyu antes ka makakita sang bag-o nga obra.