Madamo ang ginainom nga alkohol sang iban kon gina-stress sila, ginasubuan, ukon kon wala sing himuon. Mas madamo na bala ang ginainom mo subong? Kon huo, paano mo ini makontrol para indi ka mangin isa ka palahubog, ukon alcoholic? Binagbinaga ang pila ka praktikal nga mga impormasyon nga makabulig sa imo nga makontrol ang pag-inom.

•  Paano mo masiling nga insaktuhan lang ang imo pag-inom?

•  Paano mo mabal-an nga sobra na ang imo pag-inom?

•  Lima ka tip nga makabulig sa imo nga makontrol ang imo pag-inom

Ang ginasiling sang Biblia: “Indi ka mangin palainom sing alak.”—Hulubaton 23:20.

Binagbinaga: Wala ginadumilian sang Biblia ang insaktuhan nga pag-inom. (Manugwali 9:7) Pero, may ginasiling ang Biblia nga kinalain sang insaktuhan nga pag-inom, sobra nga pag-inom, kag pagpahubog. (Lucas 21:34; Efeso 5:18; Tito 2:3) Pero bisan indi ka man mangin isa ka palahubog, ang sobra nga pag-inom may malain nga epekto sa imo paghimo sang desisyon, panglawas, ukon relasyon sa iban.—Hulubaton 23:29, 30.

Madamo nga awtoridad ang nagasiling nga may daku nga kinalain ang insaktuhan nga pag-inom kag ang sobra nga pag-inom. Ginabase nila ini sa kasarangan nga kadamuon nga mainom sang isa ka tawo sa isa ka adlaw kag kon pila ka adlaw sia nagainom sa isa ka semana. a Pero, sarisari ang epekto sang alkohol sa lawas sang kada tawo, gani may mga tion nga nagdesisyon ang iban nga mas maayo kon indi na lang mag-inom. Suno sa World Health Organization:

“Mahimo nga sobra na ang bisan isa ukon duha lang ka tagay sang alkohol—halimbawa:

• Kon nagadrayb ukon naga-operate sang makinarya.

• Kon nagabusong ukon nagapatiti.

• Kon may ginatomar nga bulong.

• Kon may balatian.

• Kon indi mo makontrol ang imo pag-inom.”

Ang ginasiling sang Biblia: “Usisaon naton kag binagbinagon ang aton pagginawi.”—Panalambiton 3:40.

Binagbinaga: Maamligan mo ang imo kaugalingon batok sa malain nga epekto sang alkohol, kon regular mo nga ginausisa kon kada san-o ka nagainom, ang kadamuon sang imo ginainom, kag ginabag-o ini kon kinahanglanon. Bantayi ang masunod nga mga sinyales nga nagapakita nga mahimo nagasobra na ang imo pag-inom.

• Kinahanglan mo mag-inom para mangin malipayon. Pamatyag mo, kinahanglan mo mag-inom para makarelaks, maka-istorya, ukon maglingawlingaw. Nagainom ka kay gusto mo malipatan ang imo mga problema.

• Mas madamo na ang imo ginainom. Pirme ka na nagainom, mas maisog na nga ilimnon ang gusto mo, kag mas madamo ang kinahanglan mo imnon antes ka maigo.

• Apektado na ang imo trabaho kag pamilya. Halimbawa, nagakaubos na ang imo kuarta bangod sa imo pag-inom.

• Bisan nakainom ka na, gusto mo gihapon magdrayb, maglangoy, ukon mag-operate sang mga makinarya.

• Nabalaka na ang iban bangod sa imo pag-inom. Nagapangakig ka dayon kon hambalan ka nila. Ginatago mo na ang imo pag-inom, ukon kon ano gid kadamo ang imo ginainom.

• Nabudlayan ka na sa pag-untat sa pag-inom. Ginatinguhaan mo nga buhinan ang imo ginainom ukon untatan ini, pero indi mo mahimo.

1. Magplano.

Ang ginasiling sang Biblia: “Ang mga plano sang mapisan, pat-od nga magamadinalag-on.”—Hulubaton 21:5.

Tilawi ini: Magpili kon ano nga mga adlaw sa isa ka semana ka lang mainom. Limitahi ang kadamuon sang imo imnon sa sina nga mga adlaw. Kag magpain sang duha ka adlaw kada semana nga indi ka mag-inom.

“Kon regular ka nga wala nagainom sa mga adlaw nga ginpain mo kada semana, mas manubo ang tsansa nga pangitaon sang imo lawas ang alkohol,” siling sang isa ka alcohol education charity sa U.K.

2. Himua ang imo ginplano.

Ang ginasiling sang Biblia: ‘Tapusa ninyo ang inyo ginsugdan.’—2 Corinto 8:11.

Tilawi ini: Hibalua kag tandai kon ano kadamo ang imo ginainom. Magpangita sang ilimnon nga wala sing alkohol nga manamian mo, kag mag-stock sini sa imo balay.

“Ang paghimo sang bisan magagmay nga mga pagbag-o makabulig para malikawan mo ang mga problema nga resulta sang pag-inom,” siling sang U.S. National Institute on Alcohol Abuse and Alcoholism.

3. Mangin determinado.

Ang ginasiling sang Biblia: “Dapat nga ang inyo ‘Huo’ mangin huo kag ang inyo ‘Indi,’ indi.”—Santiago 5:12.

Tilawi ini: Mangin determinado pero matinahuron nga magpangindi kon may magtanyag sa imo nga mag-inom nga indi suno sa imo ginplano.

“Mas daku ang tsansa nga indi ka makainom kon mangindi ka dayon,” siling sang U.S. National Institute on Alcohol Abuse and Alcoholism.

4. Magpokus sa mga benepisyo.

Ang ginasiling sang Biblia: “Mas maayo pa ang katapusan sang isa ka butang sangsa pamuno sini.”—Manugwali 7:8.

Tilawi ini: Ilista ang mga rason ko ngaa gusto mo kontrolon ang imo pag-inom sang alkohol. Ilakip sa sini ang imo maayo nga pagtulog, ang imo maayo nga panglawas, maayo nga kaangtanan sa iban, kag indi ka pa magastuhan. Magpokus sa mga benepisyo kon ginapakig-istorya mo ang imo desisyon sa iban, indi sa mga kabudlayan.

5. Magpangayo sing bulig sa Dios.

Ang ginasiling sang Biblia: “Sa tanan nga butang may kusog ako paagi sa isa nga nagapabakod sa akon.”—Filipos 4:13.

Tilawi ini: Kon nabudlayan ka sa pagkontrol sang imo pag-inom, mangamuyo sa Dios nga buligan ka. Mangayo sa iya sing kusog nga makontrol mo ang imo kaugalingon. b Tun-i man ang kaalam nga makita sa iya Pulong, ang Biblia. Kon magpabulig ka sa Dios, makontrol mo ang imo pag-inom.